Ekesodo 30:1-38

30  “Mme o dire sebeso go nna lefelo la go fisetsa maswalo;+ o se dire ka logong lwa mokala.  Se le boleele jwa kubita le boatlhamo jwa kubita, se nne le matlhakore a le manè a a lekalekanang, mme bogodimo jwa sone e nne dikubita di le pedi. Dinaka tsa sone di ntshe ntlha mo go sone.+  Mme o se manege gouta e e itshekileng, fa godimo ga sone le matlhakore a sone go dikologa le dinaka tsa sone;+ o se direle molelwane wa gouta go dikologa.  Gape o se direle mehiri e mebedi ya gouta. O e dire kwa tlase ga molelwane wa sone mo matlhakoreng a sone a mabedi, mo matlhakoreng a sone a mabedi a a lebaganeng, e re ka e tshwanetse go nna ditshegetso tsa dikota tse se tsholediwang ka tsone.+  O dire dikota tsa logong lwa mokala o bo o di manega gouta.+  O se beye fa pele ga sesiro se se gaufi le letlole la tshupo,+ fa pele ga sekhurumelo se se mo godimo ga Tshupo, fa ke tla itlhagisang kwa go wena gone.+  “Mme Arone a kuise maswalo a a nkgisitsweng monate+ mosi mo go sone.+ Moso le moso, fa a baakanya dipone,+ a a kuise mosi.  Mme fa Arone a tshuba dipone fa gare ga maitseboa a mabedi, a a kuise mosi. Ke maswalo fa pele ga ga Jehofa ka metlha mo nakong ya dikokomana tsa lona.  Lo se ka lwa isa maswalo a a seng kafa molaong+ mo go sone kgotsa tshupelo e e fisiwang kgotsa tshupelo ya dijo tsa ditlhaka; gape lo se ka lwa tshela tshupelo ya senō mo go sone. 10  Mme Arone a dire tetlanyo mo dinakeng tsa sone gangwe ka ngwaga.+ A se direle tetlanyo gangwe ka ngwaga ka mangwe a madi a tshupelo ya boleo+ ya tetlanyo mo nakong ya dikokomana tsa lona. Se boitshepotshepo mo go Jehofa.” 11  Mme Jehofa a tswelela go bua le Moshe, a re: 12  “Nako le nako fa o tsaya palo ya bomorwa Iseraele jaaka palo ya batho ya bone,+ foo ba tshwanetse gore mongwe le mongwe wa bone a ntshetse moya wa gagwe thekololo e e yang kwa go Jehofa fa o tsaya palo ya bone,+ gore go se ka ga nna le sebetso sepe mo go bone fa o tsaya palo ya bone.+ 13  Seno ke se botlhe ba ba fetelang kwa go ba ba badilweng ba tla se ntshang: sephatlo sa shekele ka shekele ya lefelo le le boitshepo.+ Digera di le masome a mabedi tse di lekanang le shekele. Sephatlo sa shekele ke moneelo o o yang kwa go Jehofa.+ 14  Mongwe le mongwe yo o fetelang kwa go ba ba kwadisitsweng go simolola ka ba ba dingwaga di le masome a mabedi le go ya kwa godimo o tla ntsha moneelo wa ga Jehofa.+ 15  Bahumi ba se ka ba ntsha mo go oketsegileng, le ba maemo a a kwa tlase ba se ka ba ntsha se se kwa tlase ga sephatlo sa shekele,+ gore lo ntshe moneelo wa ga Jehofa gore lo direle meya ya lona tetlanyo.+ 16  Mme o tseye madi a selefera a tetlanyo mo go bomorwa Iseraele mme o a ntshetse tirelo ya mogope wa bokopanelo,+ gore ruri a tle a nne segopotso sa bomorwa Iseraele fa pele ga ga Jehofa, gore lo direle meya ya lona tetlanyo.” 17  Mme Jehofa a bua gape le Moshe, a re: 18  “O dire mogotšwana wa go tlhapela+ wa kgotlho le setlhomo sa one sa kgotlho, mme o o beye fa gare ga mogope wa bokopanelo le sebeso o bo o tshela metsi mo go one.+ 19  Mme Arone le bomorwawe ba tlhape diatla le dinao mo go one.+ 20  Fa ba tsena mo mogopeng wa bokopanelo ba tla tlhapa ka metsi gore ba se ka ba swa, kgotsa fa ba atamela sebeso gore ba direle, gore ba kuise tshupelo e e dirwang ka molelo mosi ba e kuisetsa Jehofa.+ 21  Mme ba tlhape diatla le dinao gore ba se ka ba swa,+ mme e tshwanetse go nna molao mo go bone ka bosakhutleng, mo go ene le bana ba gagwe go ya le dikokomana+ tsa bone.” 22  Mme Jehofa a tswelela go bua le Moshe, a re: 23  “Fa e le wena, itseele dinkgisa monate tsa boleng jo bo kwa godimo:+ mera+ wa marothodi a a gatsetseng a dielo di le makgolo a le matlhano, le sinamone+ e e botshe ya sephatlo sa selekanyo seo, dielo di le makgolo a mabedi le masome a matlhano, le kalamose+ e e botshe ya dielo di le makgolo a mabedi le masome a matlhano, 24  le kasia+ ya dielo di le makgolo a matlhano ka shekele ya lefelo le le boitshepo,+ le leokwane la motlhware la selekanyo sa hine.+ 25  Foo o itirele leokwane le le tlotsang le le boitshepo ka tsone, setlolo, motswako o e leng tiro ya modiri wa setlolo.+ E tshwanetse go nna leokwane le le tlotsang le le boitshepo.+ 26  “Mme o tlotse mogope wa bokopanelo+ ka lone le letlole la tshupo, 27  le tafole le dilwana tsotlhe tsa yone le setlhomo sa lobone le dilwana tsa sone le sebeso sa maswalo, 28  le sebeso sa tshupelo e e fisiwang le dilwana tsotlhe tsa sone le mogotšwana le setlhomo sa one. 29  Mme o di itshepise gore di nne boitshepotshepo.+ Ope fela yo o di amang o tshwanetse go bo a le boitshepo.+ 30  Mme o tlotse Arone+ le bomorwawe,+ mme o ba itshepise gore ba ntirele e le baperesiti.+ 31  “Mme o tla bua le bomorwa Iseraele, o re, ‘Leno e tshwanetse go nna leokwane le le tlotsang le le boitshepo mo go nna mo nakong ya dikokomana tsa lona.+ 32  Ga le a tshwanela go tshasiwa mo nameng ya batho, mme o se ka wa dira lepe le le tshwanang le lone ka motswako wa lone. Ke selo se se boitshepo. Le tshwanetse go tswelela e le selo se se boitshepo mo go lona. 33  Ope fela yo o dirang setlolo se se tshwanang le lone a ba a tshasa lengwe la lone mo go yo e leng motswakwa o tshwanetse go kgaolwa mo bathong ba gagabo.’”+ 34  Mme Jehofa a tswelela a raya Moshe a re: “Itseele dinkgisa monate:+ marothodi a setakate le maswalo a lonko lo lo monate le galabano e e nkgisitsweng monate+ le lebano le le itshekileng. Sengwe le sengwe sa tsone se lekane le se sengwe. 35  Mme o se dire maswalo,+ motswako wa setswaiso, tiro ya modiri wa setlolo, o o tsentsweng letswai,+ o o itshekileng, selo se se boitshepo. 36  Mme o thuge mongwe wa one o o dire loupa lo lo boleta o bo o baya mongwe wa one fa pele ga Tshupo mo mogopeng wa bokopanelo,+ fa ke tla itlhagisang kwa go wena gone.+ O nne boitshepotshepo mo go lona. 37  Mme maswalo a o tla a dirang ka motswako ono, lo se ka lwa a itirela.+ A tshwanetse gore mo go lona a tswelele a le selo se se boitshepo mo go Jehofa.+ 38  Le fa e le mang yo o dirang ape a a tshwanang le one gore a ipelele lonko lwa one o tshwanetse go kgaolwa mo bathong ba gagabo.”+

Dintlha Tse di Kwa Tlase