Ekesodo 2:1-25

2  Fa go sa ntse go ntse jalo, monna mongwe wa ntlo ya ga Lefi a ya go tsaya morwadia Lefi.+  Mme mosadi yoo a ima a ba a tshola ngwana wa mosimane. E rile a bona kafa a neng a le montle ka gone, a nna a mo fitlhile+ dikgwedi di le tharo tsa modikologo wa ngwedi.+  E rile a sa tlhole a kgona go mo fitlha,+ foo a mo tseela seroto sa koma a se dila ka bitumena le boka+ a tsenya ngwana mo go sone mme a se baya mo gare ga matlhaka+ fa lotshitshing lwa noka ya Nile.  Mo godimo ga moo, kgaitsadie a ema kgakajana go bona gore go ne go tla dirwa eng ka ene.+  Morago ga nakonyana morwadia Faro a tla go tlhapa mo Nokeng ya Nile, mme batlhokomedi ba gagwe ba basadi ba ne ba tsamaya fa thoko ga Noka ya Nile. Mme a bona seroto mo gare ga matlhaka. A roma lelata la gagwe ka yone nako eo gore le tle le sone.+  E rile a se bula a bona ngwana, mme bona, mosimane o ne a lela. Foo a mo tlhomogela pelo,+ le mororo a ne a re: “Yono ke mongwe wa bana ba Bahebera.”  Foo kgaitsadie a raya morwadia Faro a re: “A nka ya go go biletsa ka mo go kgethegileng mosadi yo o amusang mo basading ba Bahebera gore a go amusetse ngwana yono?”  Ka jalo morwadia Faro a mo raya a re: “Tsamaya!” Morweetsana a akofa a tsamaya mme a bitsa mmaagwe ngwana.+  Foo morwadia Faro a mo raya a re: “Tsaya ngwana yono o tsamaye ka ene mme o mo nkamusetse, mme ke tla go naya tuelo ya gago.”+ Ka jalo mosadi a tsaya ngwana a mo amusa. 10  Mme ngwana a gola. Foo a mo tlisa kwa go morwadia Faro, mme a nna morwawe;+ a mo raya leina a re Moshe a ba a re: “Ke ka gonne ke mo ntshitse mo metsing.”+ 11  Jaanong go ne ga diragala mo metlheng eo, fa Moshe a ntse a nonofa, gore a tswele kwa go bomorwarraagwe gore a tle a lebe mekgweleo e ba neng ba e sikara;+ mme a bona Moegepeto mongwe a itaya Mohebera mongwe wa bomorwarraagwe.+ 12  Ka jalo a leba kwa le kwa mme a bona go sa bonale ope. Foo a bolaya Moegepeto a bo a mo fitlha mo motlhabeng.+ 13  Lefa go ntse jalo, a tswa mo letsatsing le le latelang mme bona, ga bo go le banna ba babedi ba Bahebera ba lwa. Ka jalo a raya yo o neng a le phoso a re: “O iteelang molekane wa gago?”+ 14  Foo a re: “Ke mang yo o go tlhomileng go nna kgosana le moatlhodi mo go rona?+ A o ikaeletse go mpolaya fela jaaka o bolaile Moegepeto?”+ Jaanong Moshe a boifa mme a re: “Eleruri selo seno jaanong se a itsiwe!”+ 15  Morago ga moo Faro a utlwalela selo seno, mme a leka go bolaya Moshe;+ mme Moshe a tshaba+ mo go Faro gore a ye go nna kwa lefatsheng la Midiana;+ mme a nna fa sedibeng. 16  Jaanong moperesiti+ wa Midiana o ne a na le bana ba le supa ba basetsana, mme ba tla jaaka gale ba ga metsi ba tlatsa mekoro gore ba nose letsomane+ la ga rraabone. 17  Badisa ba tla jaaka gale mme ba ba leleka. Foo Moshe a nanoga a thusa basadi bano a ba a nosa letsomane+ la bone. 18  Ka jalo e rile ba tla gae kwa go Reuele+ rraabone, a tsholetsa lentswe a re: “Go tla jang gore lo bo lo tlile gae ka bonako jaana gompieno?” 19  Foo ba re: “Moegepeto+ mongwe o ne a re golola mo seatleng sa badisa mme, mo godimo ga moo, o ne a ba a re gela metsi gore a nose letsomane.” 20  Foo a raya bomorwadie a re: “Mme o kae? Ke ka ntlha yang fa lo tlogetse monna yoo kwa morago? Mmitseng, gore a tle a je senkgwe.”+ 21  Morago ga moo Moshe a bontsha fa a rata go nna le monna yono, mme a naya Moshe Siphora+ morwadie. 22  Moragonyana a tshola ngwana wa mosimane mme a mo raya leina a re Gereshome,+ ka gonne, o ne a re: “Ke fetogile moagi wa moeng mo lefatsheng le sele.”+ 23  Mme ga diragala mo malatsing a mantsi ao gore labofelo kgosi ya Egepeto e swe,+ mme bomorwa Iseraele ba nna ba fegelwa ka ntlha ya bokgoba le go lela ka go ngongorega,+ mme go lela ga bone ba kopa thuso ga nna ga tlhatlogela kwa Modimong wa boammaaruri ka ntlha ya bokgoba.+ 24  Fa nako e ntse e tsamaya Modimo a utlwa+ go fegelwa+ ga bone mme Modimo a gakologelwa kgolagano ya gagwe le Aborahame, Isake le Jakobe.+ 25  Ka jalo Modimo a leba bomorwa Iseraele mme Modimo a ba tsaya tsia.

Dintlha Tse di Kwa Tlase