Duteronome 31:1-30

31  Foo Moshe a ya a bua mafoko ano le Iseraele yotlhe  a ba raya a re: “Ke na le dingwaga di le lekgolo le masome a mabedi gompieno.+ Ga nkitla ke tlhola ke letlelelwa go tswa le go tsena,+ jaaka Jehofa a ntheile a re, ‘Ga o kitla o kgabaganya Joredane+ eno.’  Jehofa Modimo wa gago ke ene a kgabaganyang fa pele ga gago.+ Ene ka boene o tla nyeletsa ditšhaba tseno fa pele ga gago, mme o e leleke.+ Joshua ke ene a kgabaganyang fa pele ga gago,+ fela jaaka Jehofa a buile.  Mme Jehofa o tla ba dira fela jaaka a dirile Sihone+ le Oge,+ dikgosi tsa Baamore, le lefatshe la bone, fa a ne a ba nyeletsa.+  Mme Jehofa o ba lo tlogeletse,+ mme lo ba dire go ya ka taelo yotlhe e ke e lo laetseng.+  Lo nne pelokgale lo nonofe.+ O se ka wa boifa kgotsa wa garoga pelo fa pele ga bone,+ ka gonne Jehofa Modimo wa gago ke ene a gwantang le wena. Ga a kitla a go latlha le fa e le go go tlogela gotlhelele.”+  Mme Moshe a bitsa Joshua a mo raya fa pele ga matlho a Iseraele yotlhe a re: “O nne pelokgale o nonofe,+ ka gonne wena—o tla tlisa setšhaba seno mo lefatsheng le Jehofa a neng a ikanela borraabonemogologolwane gore o tla le ba naya, mme wena ka bowena o tla le ba naya go nna boswa.+  Mme Jehofa ke ene a gwantang fa pele ga gago. Ene ka boene o tla nna le wena.+ Ga a kitla a go latlha le fa e le go go tlogela gotlhelele. O se ka wa boifa kgotsa wa tshoga.”  Foo Moshe a kwala molao+ ono a o naya baperesiti bomorwa Lefi,+ basikari ba letlole la kgolagano+ ya ga Jehofa, le banna botlhe ba bagolwane ba Iseraele. 10  Mme Moshe a ba laela, a re: “Kwa bokhutlong jwa dingwaga dingwe le dingwe di le supa, mo nakong e e tlhomilweng ya ngwaga wa kgololo,+ mo moletlong wa diobo,+ 11  fa Iseraele yotlhe e tla go bona sefatlhego sa ga Jehofa+ Modimo wa gago mo lefelong le a tla le tlhophang,+ o bale molao ono fa pele ga Iseraele yotlhe e utlwa.+ 12  Phutha batho,+ banna le basadi le ba bannye le moagi wa gago wa moeng yo o mo teng ga dikgoro tsa gago, gore ba reetse le gore ba ithute,+ e re ka ba tshwanetse go boifa Jehofa Modimo+ wa lona le go tlhokomela go diragatsa mafoko otlhe a molao ono. 13  Mme bomorwaabone ba ba iseng ba itse ba reetse,+ mme ba ithute go boifa Jehofa Modimo wa lona malatsi otlhe a lo tshelang ka one mo lefatsheng le lo kgabaganyang Joredane lo ya go le rua.”+ 14  Morago ga moo Jehofa a raya Moshe a re: “Bona! Malatsi a gore o swe a atametse.+ Bitsa Joshua, mme lo eme mo mogopeng wa bokopanelo, gore ke tle ke mo tlhome.”+ Ka jalo Moshe le Joshua ba ya mme ba ema mo mogopeng wa bokopanelo.+ 15  Foo Jehofa a bonala kwa mogopeng mo pilareng ya leru, mme pilara ya leru ya simolola go ema fa kgorong ya mogope.+ 16  Jaanong Jehofa a raya Moshe a re: “Bona! O lala le borragomogologolwane;+ mme batho bano ba tla nanoga+ ba akafala le medimo e sele ya lefatshe le ba yang kwa go lone,+ mo gare ga bone, mme ba tla ntlogela ba roba kgolagano ya me+ e ke e dirileng le bone.+ 17  Foo bogale jwa me bo tla ba tukela mo letsatsing leo,+ mme ke tla ba tlogela+ ke ba fitlhela sefatlhego sa me,+ mme ba tla nna selo sa go lailwa; ba tla tlelwa ke masetlapelo a le mantsi le matshwenyego,+ ba tla patelesega go bua mo letsatsing leo ba re, ‘A ga se ka ntlha ya gore Modimo wa rona ga a mo gare ga rona go bo re tletswe ke masetlapelo ano?’+ 18  Fa e le nna, ke tla fitlha sefatlhego sa me gotlhelele mo letsatsing leo ka ntlha ya bosula jotlhe jo ba bo dirileng, ka gonne ba retologetse kwa medimong e mengwe.+ 19  “Mme jaanong ikwaleleng pina eno+ mme lo e rute bomorwa Iseraele.+ E tsenyeng mo melomong ya bone gore pina eno e tle e nne mosupi wa me kgatlhanong le bomorwa Iseraele.+ 20  Gonne ke tla ba tlisa mo lefatsheng le ke le ikanetseng borraabonemogologolwane,+ le le elang mashi le tswina ya dinotshe,+ mme ruri ba tla ja+ ba kgora ba nona+ ba bo ba retologela kwa medimong e mengwe,+ mme ruri ba tla e direla ba bo ba ntshwara ka go tlhoka tlotlo le go tlola kgolagano ya me.+ 21  Mme go tla diragala gore fa ba tlelwa ke masetlapelo a mantsi+ le matshwenyego, pina eno e tla araba fa pele ga bone jaaka mosupi, ka gonne ga e a tshwanelwa go lebalwa mo melomong ya bana ba bone, gonne ke itse tshekamelo ya bone+ sentle e ba nnang le yone gompieno pele ga ke ba tlisa mo lefatsheng le ke ikanneng kaga lone.” 22  Ka jalo Moshe a kwala pina eno mo letsatsing leo, gore a e rute bomorwa Iseraele.+ 23  Mme a tlhoma Joshua morwa Nune+ a re: “O nne pelokgale o bo o nonofe,+ ka gonne wena—o tla tlisa bomorwa Iseraele mo lefatsheng le ke le ba ikanetseng,+ mme nna ka bonna ke tla nna le wena.” 24  Mme ga diragala gore fela fa Moshe a fetsa go kwala mafoko a molao ono mo bukeng go fitlha bowelong jwa one,+ 25  Moshe a laela Balefi, basikari ba letlole la kgolagano+ ya ga Jehofa, a re: 26  “Lo tseye buka eno ya molao+ lo e beye kafa letlhakoreng la letlole+ la kgolagano ya ga Jehofa Modimo wa lona, mme e nne bosupi foo kgatlhanong le lona.+ 27  Gonne nna—ke itse botsuolodi+ jwa lona sentle le thamo ya lona e e thata.+ Fa e le gore fa ke sa ntse ke tshela le lona gompieno lo itshupile lo na le boitshwaro jwa botsuolodi mo go Jehofa,+ a bo go tla nna jalo bogolo jang ne morago ga loso lwa me! 28  Phuthelang banna botlhe ba bagolwane ba ditso tsa lona kwa go nna le badiredi ba lona,+ mme mma ke bue mafoko ano ba utlwa, mme mma ke tseye magodimo le lefatshe go nna basupi kgatlhanong le bone.+ 29  Gonne ke itse sentle gore morago ga loso lwa me ruri lo tla dira bosula, mme lo tla fapoga tsela e ke lo e laoletseng;+ mme lo tla welwa ke masetlapelo+ kwa bokhutlong jwa metlha, ka gonne lo tla dira se se bosula mo matlhong a ga Jehofa gore lo mo kgopise ka ditiro tsa diatla tsa lona.”+ 30  Mme Moshe a bua mafoko a pina eno phuthego yotlhe ya Iseraele e utlwa go fitlha bowelong jwa one:+

Dintlha Tse di Kwa Tlase