Duteronome 19:1-21

19  “Fa Jehofa Modimo wa gago a fedisa ditšhaba+ tse Jehofa Modimo wa gago a go nayang lefatshe la tsone, mme o di gapetse thuo e bile o ntse mo metseng ya tsone le mo matlong+ a tsone,  o itomololele metse e meraro mo gare ga lefatshe la gago le Jehofa Modimo wa gago a le go nayang gore o le rue.+  O ipaakanyetse tsela, mme o kgaoganye karolo ya naga ya gago e Jehofa Modimo wa gago a neng a e go naya go nna thuo gore e nne dikarolo tse tharo, mme e nne ya mmolai ope gore a tshabele kwa go yone.  “Jaanong kgang ya mmolai yo o tla tshabelang gone gore a tshele ke eno: Fa a itaya mongwe ka ene a sa itse e bile a ne a ntse a sa mo tlhoa;+  kgotsa fa a tsena le mongwe ka ene mo sekgweng a ya go rwalela dikgong, a bo a tsholetsa seatla gore a iteye ka selepe a reme setlhare, mme tshipi e bo e somoga mo loreng+ lwa logong, e bo e itaya mongwe ka ene a bo a swa, a a tshabele mo go mongwe wa metse eno mme a tshele.+  Go seng jalo, mmusolosi+ wa madi, ka gonne pelo ya gagwe e gotetse, a ka nna a leleka mmolai a ba a mo tshware, e re ka tsela e le telele; mme a ka nna a itaya moya wa gagwe gore o swe, le mororo a sa atlholelwa loso,+ ka gonne a ne a ntse a sa mo tlhoa.  Ke gone ka moo ke go laelang ke re, ‘O itomololele metse e meraro.’+  “Mme fa Jehofa Modimo wa gago a atolosa karolo ya gago ya naga go ya ka se a neng a se ikanela borragomogologolwane,+ e bile a go neile lefatshe lotlhe le a solofeditseng go le naya borragomogologolwane,+  ka gonne o tla boloka taelo eno yotlhe e ke e go laolelang gompieno ka go e dira, go rata Jehofa Modimo wa gago le go tsamaya mo ditseleng tsa gagwe ka metlha,+ foo o oketse e meraro eno ka metse e mengwe e meraro, 10  gore go se ka ga tshololelwa madi+ ape a a se nang molato mo gare ga lefatshe la gago le Jehofa Modimo wa gago a le go nayang go nna boswa, le gore o se ka wa nna le molato ope wa madi.+ 11  “Mme fa go direga gore go bo go na le motho yo o tlhoileng+ mongwe ka ene, mme a mo lalela a ba a mo tsogologela a itaya moya wa gagwe gore o swe mme a bo a swa,+ mme motho yono a bo a tshabela kwa go mongwe wa metse eno, 12  foo banna ba bagolwane ba motse wa gagabo ba rome ba mo ntshe koo, mme ba mo tsenye mo seatleng sa mmusolosi wa madi, mme a swe.+ 13  Leitlho la gago le se ka la mo utlwela botlhoko,+ mme o tlose molato wa go tsholola madi a a se nang molato mo Iseraele,+ gore o bone molemo. 14  “O se ka wa busetsa matshwao a molelwane wa mongwe ka wena kwa morago,+ fa bagologolwane ba tla bo ba tlhomile melelwane mo bosweng jwa gago jo o tla bo ruang mo lefatsheng le Jehofa Modimo wa gago a le go nayang gore o le rue. 15  “Go se ka ga tsoga mosupi a le mongwe fela kgatlhanong le motho ka ga tlolo epe kgotsa boleo+ bope, mo kgannyeng ya boleo bope jo a ka nnang a bo dira. Kgang e tlhomamisiwe ka molomo wa basupi ba le babedi kgotsa ka molomo wa basupi ba le bararo.+ 16  Fa go direga gore mosupi yo o rerang bosula a tsogologele motho gore a mo latofatse+ ka botlhanogi, 17  batho ba babedi ba ba ganetsanang ba eme fa pele ga ga Jehofa, fa pele ga ba e tla bong e le baperesiti le baatlhodi mo metlheng eo.+ 18  Mme baatlhodi ba batlisise ka kelotlhoko,+ mme fa mosupi e le mosupi wa maaka e bile a tlisitse tatofatso ya maaka kgatlhanong le morwarraagwe, 19  lo mo dire se a neng a rerile go se dira morwarraagwe,+ mme o tlose se se bosula mo gare ga gago.+ 20  Ka jalo ba ba salang ba tla utlwa ba bo ba boifa, mme ba ka se tlhole ba dira sepe se se bosula jaaka seno gape mo gare ga gago.+ 21  Mme leitlho la gago le se ka la mo utlwela botlhoko:+ moya o tla tswela moya, leitlho le tswele leitlho, leino le tswele leino, seatla se tswele seatla, lonao lo tswele lonao.+

Dintlha Tse di Kwa Tlase