Dipalo 9:1-23
9 Mme Jehofa a bua le Moshe mo nageng ya Sinai mo ngwageng wa bobedi wa go tswa ga bone kwa lefatsheng la Egepeto, mo kgweding ya ntlha,+ a re:
2 “Jaanong bomorwa Iseraele ba tshwanetse go baakanya setlhabelo sa tlolaganyo+ mo nakong+ ya sone e e tlhomilweng.
3 Lo se baakanye mo nakong ya sone e e tlhomilweng mo letsatsing la bolesome le bonè mo kgweding eno fa gare ga maitseboa a mabedi.+ Lo se baakanye+ go ya ka melao yotlhe ya yone le mekgwa yotlhe ya yone ya gale le gale.”
4 Ka jalo Moshe a bua le bomorwa Iseraele gore ba baakanye setlhabelo sa tlolaganyo.
5 Foo ba baakanya setlhabelo sa tlolaganyo mo kgweding ya ntlha, mo letsatsing la bolesome le bonè la kgwedi fa gare ga maitseboa a mabedi, mo nageng ya Sinai. Bomorwa Iseraele ba dira kafa go sotlhe se Jehofa a neng a se laetse Moshe.+
6 Jaanong ga bo go na le banna ba ba neng ba itshekolotswe ke moya wa motho+ mo ba neng ba sa kgone go baakanya setlhabelo sa tlolaganyo mo letsatsing leo. Ka gone ba itlhagisa fa pele ga ga Moshe le Arone mo letsatsing+ leo.
7 Foo banna bao ba mo raya ba re: “Re itshekolotswe ke moya wa motho. Ke ka ntlha yang fa re tshwanetse ra thibelwa go isetsa Jehofa tshupelo+ mo nakong ya yone e e tlhomilweng mo gare ga bomorwa Iseraele?”
8 Foo Moshe a ba raya a re: “Emang foo, mme mmang ke utlwe se Jehofa a tla se laelang ka ga lona.”+
9 Foo Jehofa a bua le Moshe a re:
10 “Bua le bomorwa Iseraele o re, ‘Le fa go ka direga gore motho ope wa lona kgotsa wa dikokomana tsa lona a bo a itshekolotswe ke moya+ kgotsa a dule a tsere loeto lo loleele, le ene o tshwanetse go baakanyetsa Jehofa setlhabelo sa tlolaganyo.
11 Ba se baakanye mo kgweding ya bobedi,+ mo letsatsing la bolesome le bonè fa gare ga maitseboa a mabedi. Ba se je mmogo le dikuku tse di sa bedisiwang le merogo e e galakang.+
12 Ba se ka ba letla ga sala sepe sa sone go fitlha mo mosong,+ mme ba se ka ba roba lerapo lepe mo go sone.+ Ba se baakanye go ya ka molao otlhe wa tlolaganyo.+
13 Mme fa motho a ne a itshekile kgotsa go sa direga gore a bo a dule a tsere loeto a bo a tlhokomologa go baakanya setlhabelo sa tlolaganyo, moya oo o kgaolwe mo bathong ba one,+ ka gonne ga o a ka wa isa tshupelo ya ga Jehofa mo nakong ya yone e e tlhomilweng. Motho yoo o tla arabela boleo jwa gagwe.+
14 “‘Mme fa go direga gore moagi wa moeng a bo a agile le lona e le moeng, le ene o tshwanetse go baakanyetsa Jehofa setlhabelo sa tlolaganyo.+ A dire go ya ka molao wa tlolaganyo le go ya ka mokgwa wa sone wa gale le gale.+ Go tshwanetse ga nna le molao o le mongwe fela mo go lona, mo moaging wa moeng le mo mothong wa lefatshe la lona.’”+
15 Jaanong mo letsatsing la go tlhomiwa ga motlaagana+ leru le ne la bipa motlaagana wa mogope wa Tshupo,+ mme mo maitseboeng se se neng se bonala e le molelo+ se ne se nna mo godimo ga motlaagana go fitlha mo mosong.
16 Ke tsela e go neng ga tswelela ka yone ka metlha: Leru le ne le o bipa motshegare, le ponalo ya molelo bosigo.+
17 Mme le fa e le leng fela fa leru le tlhatloga le tswa mo godimo ga mogope, bomorwa Iseraele ba ne ba bolola morago fela ga moo,+ mme lefelo le leru le neng le aga mo go lone, ke lone le bomorwa Iseraele ba neng ba thibelela mo go lone.+
18 Bomorwa Iseraele ba ne ba bolola ka taelo ya ga Jehofa, gape ba ne ba thibelela+ ka taelo ya ga Jehofa. Ba ne ba nna ba thibeletse malatsi otlhe a leru le neng le ntse mo godimo ga motlaagana ka one.
19 Mme fa leru le ne le lelefatsa go nna ga lone mo godimo ga motlaagana malatsi a le mantsi, bomorwa Iseraele le bone ba ne ba boloka boikarabelo jwa bone mo go Jehofa gore ba se ka ba bolola.+
20 Mme ka dinako tse dingwe leru le ne le nna malatsi a le mmalwa mo godimo ga motlaagana. Ba ne ba nna ba thibeletse ka taelo+ ya ga Jehofa, mme ba bolola ka taelo ya ga Jehofa.
21 Ka dinako tse dingwe leru+ le ne le nna go simolola maitseboa go fitlha mo mosong; mme leru le ne le itsholetsa mo mosong, ba bo ba bolola. Fa leru le ne le itsholetsa motshegare kgotsa bosigo, le bone ba ne ba bolola.+
22 Fa leru le ne le lelefatsa go nna ga lone mo godimo ga motlaagana malatsi a le mabedi kgotsa kgwedi kgotsa malatsi a a oketsegileng ka go aga mo godimo ga one, bomorwa Iseraele ba ne ba nna ba thibeletse ba sa bolole, mme fa le itsholetsa, ba ne ba bolola.+
23 Ba ne ba thibelela ka taelo ya ga Jehofa, gape ba ne ba bolola ka taelo ya ga Jehofa. Ba ne ba boloka boikarabelo+ jwa bone mo go Jehofa ka taelo ya ga Jehofa ka Moshe.+
