Dipalo 3:1-51

3  Jaanong tseno e ne e le dikokomana tsa ga Arone le Moshe mo letsatsing le Jehofa a neng a bua le Moshe ka lone mo Thabeng ya Sinai.+  Mme ano e ne e le maina a bomorwa Arone: leitibolo e bong Nadabe le Abihu,+ Eliasare+ le Ithamare.+  Ano e ne e le maina a bomorwa Arone, baperesiti ba ba tloditsweng ba diatla tsa bone di neng di tsentswe maatla gore ba dire e le baperesiti.+  Le fa go ntse jalo, Nadabe le Abihu ba ne ba swela fa pele ga ga Jehofa fa ba ne ba isa molelo o o seng kafa molaong+ fa pele ga ga Jehofa mo nageng ya Sinai; mme ba se ka ba nna le bana bape ba basimane. Mme Eliasare+ le Ithamare+ ba tswelela go dira e le baperesiti mmogo le Arone rraabone.  Mme Jehofa a bua le Moshe a re:  “Atametsa lotso lwa ga Lefi,+ o ba emise fa pele ga moperesiti Arone, mme ba mo direle.+  Mme ba boloke boikarabelo jwa bone mo go ene le boikarabelo jwa bone mo phuthegong yotlhe fa pele ga mogope wa bokopanelo ka go dira tirelo ya mo motlaaganeng.  Ba tlhokomele dilwana+ tsotlhe tsa mogope wa bokopanelo, le boikarabelo jwa bomorwa Iseraele ka go dira tirelo ya mo motlaaganeng.+  O ise Balefi kwa go Arone le bomorwawe. Ke ba ba neilweng, ba a ba neilweng go tswa mo go bomorwa Iseraele.+ 10  O tlhome Arone le bomorwawe, mme ba tlhokomele boperesiti jwa bone;+ mme motswakwa ope fela yo o atamelang a bolawe.”+ 11  Mme Jehofa a tswelela go bua le Moshe a re: 12  “Fa e le nna, bona! ke tsaya Balefi mo go bomorwa Iseraele mo boemong jwa maitibolo+ otlhe a a bulang sebopelo sa bomorwa Iseraele; mme Balefi e tla nna ba me. 13  Gonne leitibolo lengwe le lengwe ke la me.+ Mo letsatsing la fa ke ne ke itaya leitibolo lengwe le lengwe kwa lefatsheng la Egepeto+ ke ne ka iitshepisetsa leitibolo lengwe le lengwe mo Iseraele go simolola ka motho go fitlha ka phologolo.+ A tshwanetse go nna a me. Ke nna Jehofa.” 14  Jehofa a bua gape le Moshe mo nageng ya Sinai+ a re: 15  “Kwadisa bomorwa Lefi kafa ntlong ya borraabone ka malapa a bone. O kwadise motho mongwe le mongwe wa monna go simolola ka yo o nang le kgwedi go ya kwa godimo.”+ 16  Mme Moshe a simolola go ba kwadisa ka taelo ya ga Jehofa, fela jaaka a ne a laetswe. 17  Mme bano e ne ya nna bomorwa Lefi+ ka maina a bone: Gereshone le Kohathe le Merari.+ 18  Jaanong ano e ne e le maina a bomorwa Gereshone ka malapa a bone: Libeni le Shimei.+ 19  Mme bomorwa Kohathe+ ka malapa a bone e ne e le Amerame le Isehare,+ Heberone le Usiele. 20  Mme bomorwa Merari+ ka malapa a bone e ne e le Maheli+ le Mushi.+ Ano e ne e le malapa a Balefi kafa ntlong ya borraabone. 21  Mo go a ga Gereshone go ne go na le lelapa la Balibeni+ le lelapa la Bashimei.+ Ano e ne e le malapa a Bagereshone. 22  Ba ba kwadisitsweng ba one e ne e le palo ya batho botlhe ba banna go simolola ka ba ba nang le kgwedi go ya kwa godimo.+ Ba ba kwadisitsweng ba one ba ne ba le dikete di le supa le makgolo a matlhano.+ 23  Malapa a Bagereshone a ne a le kafa morago ga motlaagana.+ A ne a thibeletse kafa bophirima. 24  Mme kgosana ya ba ntlo ya ga rre ya Bagereshone e ne e le Eliasafe morwa Laele. 25  Mme boikarabelo jwa bomorwa Gereshone+ mo mogopeng wa bokopanelo e ne e le motlaagana le mogope,+ sebipo+ sa one le sesiro sa kgoro+ ya mogope wa bokopanelo, 26  le matsela a a lepeletseng+ a lolwapa le sesiro sa kgoro+ ya lolwapa se se dikologileng motlaagana le sebeso, le megala ya one ya mogope,+ tsotlhe tse di amanang le tirelo yotlhe ya one. 27  Mme mo go a ga Kohathe go ne go na le lelapa la Baamerame le lelapa la Baisehare le lelapa la Baheberone le lelapa la Bausiele. Ano e ne e le malapa a Bakohathe.+ 28  Mo palong ya batho botlhe ba banna go simolola ka ba ba nang le kgwedi go ya kwa godimo go ne go na le ba ba dikete di le robedi le makgolo a le marataro, ba ba tlhokometseng boikarabelo jwa lefelo le le boitshepo.+ 29  Malapa a bomorwa Kohathe a ne a thibeletse kafa letlhakoreng la motlaagana kafa borwa.+ 30  Mme kgosana ya ba ntlo ya ga rre ya malapa a Bakohathe e ne e le Elisafane morwa Usiele.+ 31  Mme boikarabelo jwa bone+ e ne e le Letlole+ le tafole+ le setlhomo sa lobone+ le dibeso+ le dilwana+ tsa lefelo le le boitshepo tse ba neng ba direla ka tsone le sesiro,+ le tirelo yotlhe ya sone. 32  Mme kgosana ya dikgosana tsa Balefi e ne e le Eliasare+ morwa moperesiti Arone, yo o neng e le molebedi wa ba ba tlhokomelang boikarabelo jo ba nang le jone mo lefelong le le boitshepo. 33  Mo go a ga Merari go ne go na le lelapa la Bamaheli+ le lelapa la Bamushi.+ Ano e ne e le malapa a ga Merari.+ 34  Mme ba ba kwadisitsweng ba one kafa palong ya batho botlhe ba banna go simolola ka ba ba nang le kgwedi go ya kwa godimo ba ne ba le dikete di le thataro le makgolo a mabedi.+ 35  Mme kgosana ya ba ntlo ya ga rre ya malapa a ga Merari e ne e le Suriele morwa Abihaile. Ba ne ba thibeletse kafa letlhakoreng la motlaagana ntlheng ya bokone.+ 36  Bolebedi jo bomorwa Merari ba neng ba bo abetswe e ne e le go okamela dimati+ tsa motlaagana le mephakalego+ ya one le dipilara+ tsa one le metheo ya one e e khuti le dilwana+ tsotlhe tsa one le tirelo+ yotlhe ya one, 37  le dipilara+ tsa lolwapa go dikologa le metheo ya tsone e e khuti le dimapo+ tsa tsone tsa mogope le megala ya tsone ya mogope. 38  Mme ba ba thibelelang fa pele ga motlaagana ntlheng ya botlhaba, fa pele ga mogope wa bokopanelo ntlheng ya botlhabatsatsi, e ne e le Moshe le Arone le bomorwawe, ba ba tlhokomelang boikarabelo jwa lefelo le le boitshepo,+ jaaka boikarabelo jwa bomorwa Iseraele. Mme motswakwa ope fela yo o atamelang o ne a bolawa.+ 39  Botlhe ba ba kwadisitsweng ba Balefi ba Moshe le Arone ba neng ba ba kwadisa ka taelo ya ga Jehofa ka malapa a bone, batho botlhe ba banna go simolola ka ba ba nang le kgwedi go ya kwa godimo, ba ne ba le dikete di le masome a mabedi le bobedi. 40  Foo Jehofa a raya Moshe a re: “Kwadisa maitibolo otlhe a bomorwa Iseraele a e leng batho ba banna go simolola ka ba ba nang le kgwedi go ya kwa godimo,+ mme o tseye palo ya maina a bone. 41  Mme o ntseele Balefi—ke nna Jehofa—mo boemong jwa maitibolo otlhe mo go bomorwa Iseraele,+ le diruiwa tsa Balefi mo boemong jwa maitibolo otlhe mo diruiweng tsa bomorwa Iseraele.”+ 42  Mme Moshe, fela jaaka Jehofa a ne a mo laetse, a kwadisa maitibolo otlhe mo go bomorwa Iseraele. 43  Mme maitibolo otlhe a batho ba banna ka palo ya maina go simolola ka ba ba nang le kgwedi go ya kwa godimo ba bone ba ba kwadisitsweng ba nna dikete di le masome a mabedi le bobedi le makgolo a mabedi le masome a supa le boraro. 44  Jehofa a tswelela go bua le Moshe a re: 45  “Tsaya Balefi mo boemong jwa maitibolo otlhe mo go bomorwa Iseraele, le diruiwa tsa Balefi mo boemong jwa diruiwa tsa bone; mme Balefi e nne ba me.+ Ke nna Jehofa. 46  Mme jaaka tlhwatlhwa ya thekololo+ ya ba ba makgolo a mabedi le masome a supa le boraro ba ba tswang mo maitibolong a bomorwa Iseraele, ba ba fetang Balefi,+ 47  o tseele mongwe le mongwe dishekele di le tlhano.+ O di tseye mo shekeleng ya lefelo le le boitshepo. Shekele ke digera di le masome a mabedi.+ 48  Mme o neye Arone le bomorwawe madi e le tlhwatlhwa ya thekololo ya bao ba ba fetang.” 49  Ka jalo Moshe a tsaya madi a tlhwatlhwa ya kgololo mo go ba ba neng ba feta tlhwatlhwa ya thekololo ya Balefi. 50  A tsaya madi mo maitibolong a bomorwa Iseraele, dishekele di le sekete makgolo a le mararo le masome a le marataro le botlhano, ka shekele ya lefelo le le boitshepo. 51  Morago ga moo Moshe a naya Arone le bomorwawe madi a tlhwatlhwa ya thekololo kafa taelong ya ga Jehofa, fela jaaka Jehofa a ne a laetse Moshe.

Dintlha Tse di Kwa Tlase