Dipalo 20:1-29

20  Mme bomorwa Iseraele, phuthego yotlhe, ya tla mo nageng ya Tsine+ mo kgweding ya ntlha, mme batho ba nna mo Kadeshe.+ Ke kwa Miriame+ a neng a swela gone e bile ke kwa a neng a fitlhwa gone.  Jaanong phuthego+ ya bo e se na metsi, mme ba simolola go phuthegela Moshe le Arone.+  Mme batho ba omana+ le Moshe ba re: “Re ka bo bogolo re ne ra swa fa bomorwarraarona ba ne ba swa fa pele ga ga Jehofa!+  Ke ka ntlha yang fa lo tlisitse phuthego ya ga Jehofa mo nageng eno gore rona le dipelesa tsa rona re tle go swela mo go yone?+  Le gone ke ka ntlha yang fa lo re ntshitse kwa Egepeto lo re tlisa mo lefelong le le bosula leno?+ Ga se lefelo la peo le difeige le mefine le digaranata,+ e bile ga go na metsi a go nwa.”  Foo Moshe le Arone ba tswa fa pele ga phuthego ba ya kwa kgorong ya mogope wa bokopanelo mme ba wa ka difatlhego,+ mme kgalalelo ya ga Jehofa ya ba bonalela.+  Foo Jehofa a bua le Moshe a re:  “Tsaya thobane+ mme o phuthe phuthego, wena le Arone morwarrago, mme o bue le lefika le legolo fa pele ga matlho a bone gore le ntshe metsi a lone; mme o ba ntshetse metsi mo lefikeng le legolo mme o nose phuthego le dipelesa tsa bone.”+  Ka jalo Moshe a tsaya thobane fa pele ga ga Jehofa,+ fela jaaka a ne a mo laetse. 10  Morago ga moo Moshe le Arone ba phuthela phuthego fa pele ga lefika le legolo, mme a ba raya a re: “Utlwang jaanong, batsuolodi ke lona!+ A re tla lo ntshetsa metsi mo lefikeng le legolo le?”+ 11  Foo Moshe a tsholetsa seatla a itaya lefika le legolo ka thobane gabedi; mme metsi a mantsi a simolola go tswa, mme phuthego le dipelesa tsa yone tsa simolola go nwa.+ 12  Moragonyana Jehofa a raya Moshe le Arone a re: “E re ka lo se kile lwa bontsha tumelo mo go nna gore lo intshepise+ fa pele ga matlho a bomorwa Iseraele, ga lo kitla lo tsenya phuthego eno mo lefatsheng le ke tla e le nayang.”+ 13  Ano ke metsi a Meriba,+ ka gonne bomorwa Iseraele ba ne ba omana le Jehofa, mo a neng a itshepisiwa mo gare ga bone. 14  Morago ga moo Moshe a roma barongwa kwa kgosing ya Edoma+ ba tswa kwa Kadeshe a re: “Morwarrago Iseraele+ o buile jaana, ‘Wena ka bowena o itse mathata otlhe a a re wetseng ka tshoganyetso.+ 15  Borraarona ba ne ba fologela kwa Egepeto,+ mme ra nna kwa Egepeto malatsi a le mantsi;+ mme Baegepeto ba simolola go re gobatsa ba bo ba gobatsa le borraarona.+ 16  La bofelo re ne ra lelela kwa go Jehofa+ mme a utlwa lentswe la rona mme a roma moengele+ a re ntsha kwa Egepeto; mme bona, re mo Kadeshe, motse o o kwa ntlheng ya karolo ya gago ya naga. 17  Tsweetswee, mma re ralale lefatshe la gago. Ga re kitla re ralala tshimo kgotsa tshimo ya mofine, e bile ga re kitla re nwa metsi a sediba. Re tla gwanta mo tseleng ya kgosi.+ Ga re kitla re fapogela kafa mojeng kgotsa kafa molemeng,+ go fitlha re ralala karolo ya gago ya naga.’” 18  Le fa go ntse jalo, Edoma a mo raya a re: “O se ka wa nthalala, e se re kgotsa ka tswa ke tla go go kgatlhantsha ka tšhaka.” 19  Mme bomorwa Iseraele ba mo raya ba re: “Re tla tlhatloga ka tsela e kgolo; mme fa nna le diruiwa tsa me re ka nwa metsi a gago, ke tla ntsha le tlhwatlhwa ya one.+ Ga ke batle sepe fa e se go ralala ka dinao+ tsa me.” 20  A nna a re: “O se ka wa ralala.”+ Foo Edoma+ a tswa a tla go kopana le ene ka batho ba bantsi thata le ka seatla se se nonofileng. 21  Ka jalo Edoma a gana gore Iseraele a ralale karolo ya gagwe ya naga.+ Ka gone Iseraele a mo furalela.+ 22  Mme bomorwa Iseraele, phuthego yotlhe, ya bolola mo Kadeshe+ ya tla mo Thabeng ya Hore.+ 23  Foo Jehofa a raya Moshe le Arone mo Thabeng ya Hore fa molelwaneng wa lefatshe la Edoma a re: 24  “Arone o tla phuthelwa kwa bathong ba gagabo,+ gonne ga a kitla a tsena mo lefatsheng le ke tla le nayang bomorwa Iseraele, mo lefatsheng le lo tsuologetseng taelo ya me mo go lone ka ga metsi a Meriba.+ 25  Tsaya Arone le Eliasare morwawe mme o ba tlhatlosetse mo Thabeng ya Hore. 26  O apole Arone diaparo+ tsa gagwe, mme o di apese Eliasare+ morwawe; Arone o tla phuthwa mme a swele gone.+ 27  Ka jalo Moshe a dira fela jaaka Jehofa a ne a laetse; mme ba palama Thaba ya Hore fa pele ga matlho a phuthego yotlhe. 28  Foo Moshe a apola Arone diaparo tsa gagwe a di apesa Eliasare morwawe, morago ga moo Arone a swela koo kwa godimo ga thaba.+ Mme Moshe le Eliasare ba fologa thaba 29  Mme phuthego yotlhe ya bona gore Arone o ne a sule, mme ntlo yotlhe ya Iseraele ya tswelela e lelela Arone malatsi a le masome a mararo.+

Dintlha Tse di Kwa Tlase