Dipalo 18:1-32

18  Mme Jehofa a raya Arone a re: “Wena le bomorwao mmogo le ntlo ya ga rrago lo tla arabela tlolo e e diretsweng lefelo le le boitshepo,+ e bile wena mmogo le bomorwao lo tla arabela tlolo e e diretsweng boperesiti+ jwa lona.  Gape atametsa le bomorwarrago ba lotso lwa ga Lefi, lotso lwa ga rrago, lo lo nang le wena, gore ba golaganngwe le wena le gore ba go direle,+ wena mmogo le bomorwao, fa pele ga mogope wa Tshupo.+  Mme ba boloke boikarabelo jwa bone mo go wena le boikarabelo jwa bone mo mogopeng+ otlhe. Ke dilwana tsa lefelo le le boitshepo fela le sebeso tse ba sa tshwanelang go di atamela gore ba se ka ba swa,+ bone kgotsa lona.  Mme ba golaganngwe le wena ba bo ba boloke boikarabelo jwa bone mo mogopeng wa bokopanelo ka ga tirelo yotlhe ya mogope, mme motswakwa ope a se ka a lo atamela.+  Mme lo boloke boikarabelo jwa lona mo lefelong le le boitshepo+ le boikarabelo jwa lona mo sebesong,+ gore go se ka ga nna le kgalefo+ e nngwe gape kgatlhanong le bomorwa Iseraele.  Mme nna, bona! ke tsere bomorwarraalona, e bong Balefi, mo go bomorwa Iseraele,+ e le mpho ya lona,+ e le ba ba neetsweng Jehofa gore ba tsweledise tirelo ya mogope wa bokopanelo.+  Mme wena mmogo le bomorwao lo dibele boperesiti jwa lona ka ga sengwe le sengwe se se amanang le sebeso le ka ga se se leng mo teng ga sesiro;+ mme lo dire tirelo.+ Ke tla naya boperesiti jwa lona jaaka tirelo e e leng mpho, mme motswakwa yo o atamelang a bolawe.”+  Mme Jehofa a bua gape le Arone a re: “Fa e le nna, bona! Ke go tlhomile gore o boloke meneelo e ke e ntshediwang.+ Ke e neile wena le bomorwao mo dilong tsotlhe tse di boitshepo tsa bomorwa Iseraele e le seabe, e le kabelo ka bosakhutleng.+  E nne ya gago mo dilong tse di boitshepotshepo, mo tshupelong e e dirwang ka molelo, tshupelo nngwe le nngwe ya bone mmogo le tshupelo nngwe le nngwe ya bone ya dijo tsa ditlhaka+ le tshupelo nngwe le nngwe ya bone ya boleo+ le tshupelo nngwe le nngwe ya bone ya molato,+ tse ba tla di mpusetsang. Ke selo se se boitshepotshepo mo go wena le bomorwao. 10  O e jele mo lefelong le le boitshepotshepo.+ E jewe ke motho mongwe le mongwe wa monna.+ E nne selo se se boitshepo mo go wena.+ 11  Mme seno ke sa gago: moneelo+ wa mpho ya bone mmogo le ditshupelo tsotlhe tse di fokwang+ tsa bomorwa Iseraele. Ke di neile wena le bomorwao mmogo le bomorwadio,+ go nna kabelo ka bosakhutleng. Mongwe le mongwe yo o phepa mo ntlong ya gago a ka e ja.+ 12  “Leokwane lotlhe le le a gaisang otlhe le beine yotlhe e ntšha e e di gaisang tsotlhe le dijo tsa ditlhaka, mabutswapele+ a tsone, a ba tla a nayang Jehofa, ke di go neile.+ 13  Mabutswapele a ntlha otlhe a tsotlhe tse di mo lefatsheng la bone, a ba tla a tlisang kwa go Jehofa, e nne a gago.+ Mongwe le mongwe yo o phepa mo ntlong ya gago a ka nna a a ja. 14  “Sengwe le sengwe se se neetsweng mo Iseraele e nne sa gago.+ 15  “Sengwe le sengwe se se bulang sebopelo,+ sa nama ya mofuta mongwe le mongwe, se ba tla se isetsang Jehofa, mo mothong le mo phologolong, e nne sa gago. Le fa go ntse jalo, ruri o golole leitibolo la batho; + le leitibolo la phologolo e e itshekologileng o le golole.+ 16  O le golole ka tlhwatlhwa ya lone ya kgololo go simolola ka le le nang le kgwedi go ya pele, ka tlhwatlhwa e e akanyeditsweng, dishekele di le tlhano tsa selefera ka shekele ya lefelo le le boitshepo.+ Ke digera di le masome a mabedi.+ 17  Ke poo ya leitibolo fela kgotsa kwanyana e tonanyana ya leitibolo kgotsa podi ya leitibolo e o se kitlang o e golola.+ Tsone ke dilo tse di boitshepo. O kgatšhe madi+ a tsone mo sebesong, mme o kuise mafura a tsone mosi jaaka tshupelo e e dirwang ka molelo ya lonko lo lo ritibatsang lo lo yang kwa go Jehofa.+ 18  Nama ya tsone e nne ya gago. Jaaka sehuba sa tshupelo e e fokwang le jaaka leoto la moja, e nne ya gago.+ 19  Meneelo+ yotlhe e e boitshepo, e bomorwa Iseraele ba tla e ntshetsang Jehofa, ke e neile wena le bomorwao mmogo le bomorwadio , go nna kabelo ka bosakhutleng.+ Ke kgolagano ya letswai ka bosakhutleng fa pele ga ga Jehofa e e diretsweng wena mmogo le bana ba gago.”+ 20  Mme Jehofa a tswelela a raya Arone a re: “Ga o na go nna le boswa mo lefatsheng la bone, e bile ga go na kabelo epe e e tla nnang ya gago mo gare ga bone.+ Ke nna kabelo ya gago le boswa jwa gago mo gare ga bomorwa Iseraele.+ 21  “Mme bona! ke neile bomorwa Lefi sa bosome+ sengwe le sengwe mo Iseraele go nna boswa e le tuelo ya tirelo ya bone e ba e dirang, tirelo ya mogope wa bokopanelo. 22  Mme bomorwa Iseraele ba se ka ba tlhola ba atamela mogope wa bokopanelo go ipakela boleo mme ba swa.+ 23  Mme Balefi ka bobone ba dire tirelo ya mogope wa bokopanelo, e bile ke bone ba tshwanetseng go arabela tlolo+ ya bone. Ke molao ka bosakhutleng mo nakong ya dikokomana tsa lona gore ba se ka ba bona thuo ya boswa mo gare ga bomorwa Iseraele. 24  Gonne sa bosome sa bomorwa Iseraele, se ba tla se ntshetsang Jehofa e le moneelo, ke se neile Balefi go nna boswa. Ke gone ka moo ke ba reileng ka re, ‘Ba se ka ba bona thuo ya boswa+ mo gare ga bomorwa Iseraele.’” 25  Morago ga moo Jehofa a bua le Moshe a re: 26  “Mme o bue le Balefi, o ba reye o re, ‘Lo tla amogela sa bosome mo go bomorwa Iseraele se ke se lo neileng se tswa mo go bone go nna boswa+ jwa lona, mme lo ntshe moneelo o o tswang mo go sone e le moneelo o o yang kwa go Jehofa wa sa bosome sa sa bosome.+ 27  Mme e tshwanetse ya tsewa e le moneelo wa lona, jaaka dijo tsa ditlhaka tsa seboana+ le jaaka kungo e e tletseng ya beine kgotsa segatisetso sa leokwane. 28  Ka tsela eno le lona lo tla ntshetsa Jehofa moneelo go tswa mo di tsa bosomeng tsotlhe tsa lona tse lo tla di amogelang mo go bomorwa Iseraele, mme moneelo o o yang kwa go Jehofa o o tswang mo go tsone lo o neye moperesiti Arone. 29  Go tswa mo dimphong tsotlhe tse di tlang mo go lona, lo tla ntshetsa Jehofa moneelo wa mofuta mongwe le mongwe, wa o o e gaisang yotlhe wa one,+ jaaka selo sengwe se se boitshepo se se tswang mo go tsone.’ 30  “Mme o ba reye o re, ‘Fa lo ntsha moneelo o o e gaisang yotlhe,+ ruri o tla kaiwa e le kungo ya seboana mo Balefing le kungo ya beine kgotsa segatisetso sa leokwane. 31  Mme lo o je mo lefelong lengwe le lengwe, lona le ba ntlo ya lona, ka gonne ke tuelo ya lona ya tirelo ya lona ya mo mogopeng wa bokopanelo.+ 32  Mme lo se ka lwa ipakela boleo jwa one fa lo ntsha moneelo o o e gaisang yotlhe wa tsone, mme lo se ka lwa itshepolola dilo tse di boitshepo tsa bomorwa Iseraele, gore lo se ka lwa swa.’”+

Dintlha Tse di Kwa Tlase