Dipalo 12:1-16

12  Jaanong Miriame le Arone ba simolola go bua kgatlhanong le Moshe ka ntlha ya mosadi wa Mokushe yo a neng a mo tsere, ka gonne o ne a tsere mosadi wa Mokushe.+  Mme ba nna ba re: “A Jehofa o buile ka Moshe a le nosi fela? A ga a bua le ka rona?”+ Mme Jehofa o ne a reeditse.+  Mme monna yono Moshe e ne e le motho yo o boikokobetso+ thata go gaisa batho botlhe ba ba neng ba le mo godimo ga lefatshe.  Foo Jehofa a raya Moshe le Arone le Miriame ka tshoganyetso a re: “Tswelang kwa mogopeng wa bokopanelo, ka boraro jwa lona.” Ka jalo ba tswa ka boraro jwa bone.  Morago ga moo Jehofa a fologa a le mo pilareng ya leru+ mme a ema fa kgorong ya mogope mme a bitsa Arone le Miriame. Foo ba tswa boobabedi.  Mme a tswelela a re: “Tsweetswee, utlwang mafoko a me. Fa go ne go ka nna le moporofeti wa ga Jehofa mo go lona, ke ne ke tla mo ikitsise mo ponatshegelong.+ Ke ne ke tla bua le ene mo torong.+  Ga go a nna jalo ka motlhanka wa me Moshe!+ O neetswe go tlhokomela ntlo ya me yotlhe.+  Ke bua le ene molomo le molomo,+ ka gone ke a mmontsha, e seng ka dithamalakane;+ mme o bona ponalo ya ga Jehofa.+ Ke ka ntlha yang, he, fa lo ne lwa se ka lwa boifa go bua kgatlhanong le motlhanka wa me, kgatlhanong le Moshe?”+  Mme bogale jwa ga Jehofa jwa ba tukela, mme a tsamaya. 10  Mme leru la tswa mo godimo ga mogope, mme bona! Miriame a bo a iteilwe ka lepero a le mosweu jaaka kapoko.+ Foo Arone a retologela kwa go Miriame, mme bona! o ne a iteilwe ka lepero.+ 11  Ka yone nako eo Arone a raya Moshe a re: “Tshwarelo morena wa me! Tsweetswee, o se ka wa re balela boleo jo ka jone re dirileng ka boeleele le jo re bo dirileng!+ 12  Tsweetswee, o se ka wa mo tlogela a nna jaaka mongwe yo o suleng,+ yo go jegileng sephatlo sa nama ya gagwe ka nako ya fa a ne a tswa mo sebopelong sa ga mmaagwe!” 13  Mme Moshe a simolola go goela kwa go Jehofa a re: “Ao tlhe Modimo, tsweetswee! Mo fodise, tsweetswee!”+ 14  Foo Jehofa a raya Moshe a re: “Fa rraagwe a ne a ka mo kgwela mathe+ mo sefatlhegong, a o ne a se kitla a kokobediwa malatsi a le supa? A a tlhaolelwe kwa ntle+ ga bothibelelo+ malatsi a le supa, mme morago ga moo a a letlwe go tsena.”+ 15  Ka gone Miriame a tlhaolelwa kwa ntle ga bothibelelo malatsi a le supa,+ mme batho ba se ka ba bolola go fitlha Miriame a letlwa go tsena. 16  Morago ga moo batho ba bolola go tswa mo Haserothe+ mme ba thibelela mo nageng ya Parana.+

Dintlha Tse di Kwa Tlase