Baatlhodi 2:1-23

2  Mme moengele wa ga Jehofa+ a tlhatloga go tswa Gilegala a ya kwa Bokime+ mme a re: “Ke ne ka lo ntsha kwa Egepeto ka lo tlisa mo lefatsheng le ke neng ka ikanela borraalonamogologolwane+ ka lone. Mo godimo ga moo, ke ne ka re, ‘Le ka motlha nka se tlole kgolagano ya me le lona.+  Mme lona, lo se ka lwa dira kgolagano le banni ba lefatshe leno.+ Lo rutle dibeso tsa bone.’+ Mme ga lo a reetsa lentswe la me.+ Ke ka ntlha yang fa lo dirile selo seno?+  Ka jalo le nna ke rile, ‘Ga nkitla ke ba leleka fa pele ga lona, mme ba tla nna diru mo go lona,+ le medimo ya bone e tla lo hepisa.’”+  Mme ga diragala ya re fela fa moengele wa ga Jehofa a sena go bolelela bomorwa Iseraele botlhe mafoko ano, batho ba tsholetsa mantswe ba lela.+  Ka gone ba raya lefelo leo leina ba re Bokime. Mme ba ntshetsa Jehofa setlhabelo mo go lone.  E rile Joshua a tsamaisa batho, bomorwa Iseraele ba tsamaya, mongwe le mongwe a ya bosweng jwa gagwe, go ya go rua lefatshe.  Mme batho ba tswelela ba direla Jehofa ka malatsi otlhe a ga Joshua le malatsi otlhe a banna ba bagolwane ba ba neng ba nna ba tshela morago ga ga Joshua e le ba ba neng ba bone tiro yotlhe e kgolo ya ga Jehofa e a neng a e diretse Iseraele.  Mme Joshua morwa Nune, motlhanka wa ga Jehofa, a swa a na le dingwaga di le lekgolo le lesome.  Ka jalo ba mo fitlha mo karolong ya naga ya boswa jwa gagwe mo Timenathe-herese mo kgaolong e e dithaba ya Eferaime, kwa bokone jwa Thaba ya Gaashe. 10  Mme kokomana eo yotlhe le yone ya phuthelwa kwa go borraabo,+ mme ga simolola ga tsoga kokomana e nngwe morago ga bone e e neng e sa itse Jehofa kgotsa tiro e a neng a e diretse Iseraele.+ 11  Mme bomorwa Iseraele ba simolola go dira se se neng se le bosula mo matlhong a ga Jehofa+ le go direla Bobaale.+ 12  Ka gone ba tlogela Jehofa Modimo wa borraabo yo o neng a ba ntshitse kwa lefatsheng la Egepeto+ mme ba sala medimo e mengwe morago e e neng e le mo gare ga medimo ya ditšhaba tse di neng di ba dikologile+ mme ba simolola go e ikobela, ba bo ba kgopisa Jehofa.+ 13  Ba tlogela Jehofa jalo mme ba simolola go direla Baale le ditshwantsho tsa Ashethorethe.+ 14  Foo bogale jwa ga Jehofa jwa tukela Iseraele,+ mo a neng a ba tsenya mo diatleng tsa bathopi, mme ba simolola go ba thopa;+ a bo a ba rekisetsa mo diatleng tsa baba ba bone ba ba ba dikologileng,+ mme ba ne ba sa tlhole ba kgona go ema fa pele ga baba ba bone.+ 15  Gongwe le gongwe kwa ba neng ba tswela teng, seatla sa ga Jehofa se ne se le kgatlhanong le bone gore se ba tlisetse masetlapelo,+ fela jaaka Jehofa a ne a buile le fela jaaka Jehofa a ne a ba ikanetse;+ mme ba tsena mo mathateng a magolo.+ 16  Ka jalo Jehofa o ne a tle a tsose baatlhodi,+ mme ba ne ba tle ba ba boloke mo seatleng sa bathopi ba bone.+ 17  Ba ne ba se ka ba reetsa le bone baatlhodi ba bone, mme ba ne ba akafala+ le medimo+ e mengwe ba bo ba e ikobela. Ba ne ba fapoga ka bonako mo tseleng e borraabonemogologolwane ba neng ba tsamaya mo go yone ka go utlwa ditaelo tsa ga Jehofa.+ Ga ba a ka ba dira jalo. 18  E rile Jehofa a ba tsosetsa baatlhodi,+ Jehofa a nna le moatlhodi yoo, mme a ba boloka mo seatleng sa baba ba bone ka malatsi otlhe a moatlhodi yoo; gonne Jehofa o ne a tle a ikwatlhaye+ fa ba fegelwa ka ntlha ya bagateledi+ ba bone le ba ba neng ba ba kgoromeletsa kwa le kwa. 19  Mme go ne go diragala gore fa moatlhodi a sena go swa, ba bo ba retologa ba senya go feta borraabo ka go latela medimo e mengwe gore ba e direle ba bo ba e ikobele.+ Ga ba a ka ba ithiba mo ditlwaelong tsa bone le mo boitshwarong jwa bone jwa botlhogoethata.+ 20  La bofelo bogale jwa ga Jehofa jwa tukela+ Iseraele mme a re: “Ka lebaka la go bo setšhaba seno se tlodile kgolagano+ ya me e ke neng ka e laolela borraabonemogologolwane mme se sa reetsa lentswe la me,+ 21  le nna ga nkitla ke boa gore ke leleke fa pele ga bone le fa e le se le sengwe sa ditšhaba tse Joshua a di tlogetseng fa a swa, 22  gore ke leke+ Iseraele ka tsone, gore a ba tla boloka tsela ya ga Jehofa ka go tsamaya mo go yone fela jaaka borraabo ba ne ba e boloka, kgotsa nnyaa.” 23  Ka jalo Jehofa a letla ditšhaba tseno gore di nne ka go sa di leleke ka bonako,+ mme a se ka a di tsenya mo seatleng sa ga Joshua.

Dintlha Tse di Kwa Tlase