Baatlhodi 18:1-31

18  Mo malatsing ao go ne go se na kgosi mo Iseraele.+ Mme mo malatsing ao lotso lwa Badana lo ne lo ipatlela boswa jo lo ka nnang mo go jone; ka gonne go tla go fitlha mo letsatsing leo ba ne ba ise ba nne le boswa bope mo gare ga ditso tsa Iseraele.+  Kgabagare bomorwa Dana ba roma banna ba le batlhano ba losika lwa bone, banna ba ba tswang mo gare ga bone, banna ba e neng e le diganka, ba tswa kwa Sora+ le kwa Eshataole,+ gore ba ye go tlhola+ lefatshe le go le tlhotlhomisa. Ka jalo ba ba raya ba re: “Tsamayang, lo tlhotlhomise lefatshe.” Fa nako e ntse e tsamaya ba tsena mo kgaolong e e dithaba ya Eferaime+ go fitlha fela kwa ntlong ya ga Mika+ mme ba lala gone bosigo.  Fa ba le gaufi le ntlo ya ga Mika, ba lemoga lentswe la lekau, e leng Molefi, mme ba fapogela teng. Mme ba mo raya ba re: “O tlisitswe ke mang fano, mme o dirang mo lefelong leno, le gone o tlisitswe ke eng fano?”  Mme ene a ba raya a re: “Mika o ntiretse jaana le jaana gore a tle a nthape,+ le gore ke direle jaaka moperesiti+ wa gagwe.”  Foo ba mo raya ba re: “Tsweetswee, botsa+ Modimo+ gore re itse gore a tsela e re e tsamayang e tla atlega.”  Jalo moperesiti a ba raya a re: “Tsamayang ka kagiso. Tsela e lo e tsamayang e fa pele ga ga Jehofa.”  Ka jalo banna ba batlhano bano ba tsamaya mme ba goroga kwa Laishe+ mme ba bona kafa batho ba ba neng ba le mo go yone ba neng ba nna ka boipelego kafa mokgweng wa Basidona ka gone, ba didimetse e bile ba sa belaele,+ mme ga bo go se na mofenyi ope yo o gatelelang yo o neng a tshwenya sepe mo lefatsheng, fa bone ba ne ba le kgakala le Basidona+ e bile ba sa amane ka gope le batho.  Kgabagare ba tla mo go bomorwarraabone kwa Sora+ le Eshataole,+ mme bomorwarraabone ba simolola go ba raya ba re: “Go tsamaile jang ka lona?”  Foo ba re: “A ko lo nanogeng mme re ye go ba tlhasela; gonne re bone lefatshe, mme bonang! le molemo thata.+ Mme lo a okaoka. Lo se ka lwa nna bobodu kaga go tsamaya lo ya go tsena lo gapa lefatshe.+ 10  Fa lo tsena, lo tla goroga mo bathong ba ba sa belaeleng,+ mme lefatshe leo le atlhame thata; gonne Modimo o le tsentse mo seatleng sa lona,+ lefelo le le sa tlhaeleng selo le fa e le sa mofuta ofe se se mo lefatsheng.”+ 11  Foo banna ba le makgolo a le marataro ba ba ikgatlhileng ka dibetsa tsa ntwa, ba ba tswang mo losikeng lwa Badana, ba tswa gone, ke gore mo Sora le Eshataole.+ 12  Mme ba tsena mo tseleng ba ya go thibelela kwa Kiriathe-jearime+ kwa Juda. Ke gone ka moo ba biditseng lefelo leo Mahane-dane+ go tla go fitlha mo letsatsing leno. Bonang! O kwa bophirima jwa Kiriathe-jearime. 13  Morago ga moo ba fetela kwa pele go tswa foo go ya kwa kgaolong e e dithaba ya Eferaime mme ba fitlha kwa ntlong ya ga Mika.+ 14  Foo banna ba batlhano ba ba neng ba ile go tlhola+ lefatshe la Laishe+ ba araba mme ba raya bomorwarraabone ba re: “A lo ne lo itse gore mo matlong ano go na le khiba le modingwana wa terafime+ le setshwantsho se se setilweng+ le sefikantswe se se thetsweng?+ Mme jaanong lo gopole se lo tshwanetseng go se dira.”+ 15  Jalo ba fapogela gone ba tla mo ntlong ya lekau, e leng Molefi,+ kwa ntlong ya ga Mika, mme ba simolola go mmotsa gore o ne a tswelela jang.+ 16  Mo nakong eo yotlhe banna ba ba makgolo a marataro ba ba ikgatlhileng ka dibetsa tsa bone tsa ntwa,+ ba e neng e le ba bomorwa Dana,+ ba ne ba eme fa botsenong jwa kgoro. 17  Jaanong banna ba batlhano ba ba neng ba ile go tlhola lefatshe+ ba tlhatloga, gore ba tsene teng ba tseye setshwantsho se se setilweng+ le khiba+ le modingwana wa terafime+ le setshwantsho se se thetsweng.+ (Mme moperesiti+ o ne a eme fa botsenong jwa kgoro le banna ba ba makgolo a marataro ba ba ikgatlhileng ka dibetsa tsa ntwa.) 18  Mme bano ba tsena mo ntlong ya ga Mika ba tsaya setshwantsho se se setilweng, khiba le modingwana wa terafime le setshwantsho se se thetsweng.+ Morago ga moo moperesiti+ a ba raya a re: “Lo dira eng?” 19  Mme ba mo raya ba re: “Didimala. Baya seatla sa gago mo molomong wa gago, mme o tsamaye le rona o nne rre+ le moperesiti+ wa rona. Ke eng se se botoka, gore o tswelele o le moperesiti wa ntlo ya monna a le mongwe+ fela kgotsa gore o nne moperesiti wa lotso le lelapa kwa Iseraele?”+ 20  Foo pelo ya moperesiti ya itumela,+ mme jaanong a tsaya khiba le modingwana wa terafime le setshwantsho se se setilweng+ mme a tla mo gare ga batho. 21  Foo ba retologa ba tsamaya mme ba baya bana ba bannye le diruiwa le dilo tse di tlhwatlhwakgolo kwa pele ga bone.+ 22  Bone ba ne ba setse ba tsamaile sekgala go tswa kwa ntlong ya ga Mika fa banna ba ba neng ba le mo matlong a a gaufi le ntlo ya ga Mika+ ba ne ba phuthiwa mmogo ba bo ba leka go tshwara bomorwa Dana mo tseleng. 23  Fa ba ne ba ntse ba goela kwa go bomorwa Dana, foo ba gadima mme ba raya Mika ba re: “Mathata a gago ke eng+ go bo lo phuthilwe mmogo?” 24  Jalo a re: “Lo tsere medimo+ ya me e ke e dirileng,+ le moperesiti,+ lo bo lo tsamaya, mme ke setse ka eng?+ Go tla jang gore lo ntheye lo re, ‘Mathata a gago ke eng?’” 25  Foo bomorwa Dana ba mo raya ba re: “A lentswe la gago le se ka la utlwala gaufi le rona, e se re kgotsa banna ba ba moya+ o bogalaka ba lo tlhasela, mme wa latlhegelwa ke moya wa gago le ke moya wa ba ntlo ya gago.” 26  Mme bomorwa Dana ba nna ba tsamaya mo tseleng; mme Mika a bona gore ba ne ba nonofile go mo feta,+ jalo a retologa mme a boela kwa ntlong ya gagwe. 27  Mme bone, ba tsaya se Mika a neng a se dirile le moperesiti+ yo o neng a fetogile wa gagwe, mme ba nna ba ya ntlheng ya Laishe,+ ba tsogologela batho ba ba didimetseng le ba ba sa belaeleng sepe.+ Ba ba kgemetha ka bogale jwa tšhaka, mme motse ba o fisa ka molelo. 28  Go ne go se na mogolodi, ka gonne go ne go le kgakala le Sidona,+ mme ba ne ba sa amane ka gope le batho; mme e ne e le kwa lebaleng le le kwa tlase le e neng e le la ga Bethe-rehobe.+ Foo ba aga motse mme ba nna mo go one.+ 29  Mo godimo ga moo, ba bitsa leina la motse oo Dana ka leina la ga rraabone, Dana,+ yo o neng a tsaletswe Iseraele.+ Le fa go ntse jalo, Laishe e ne e le leina la motse ono la ntlha.+ 30  Morago ga moo bomorwa Dana ba ikemisetsa setshwantsho se se setilweng;+ mme Jonathane+ morwa Gereshome,+ morwa Moshe, ene le bomorwawe ba nna baperesiti ba lotso lwa Badana go fitlha letsatsi le lefatshe leo le isitsweng botshwarwa ka lone.+ 31  Mme ba boloka setshwantsho se se setilweng sa ga Mika, se a neng a se dirile, ba se itlhometse ka malatsi otlhe a ntlo+ ya Modimo wa boammaaruri e neng ya tswelela e le kwa Shilo+ ka one.

Dintlha Tse di Kwa Tlase