2 Samuele 5:1-25
5 Fa nako e ntse e tsamaya ditso tsotlhe tsa Iseraele tsa tla kwa go Dafide+ kwa Heberone+ tsa re: “Bona! Rona ka borona re lerapo la gago le nama ya gago.+
2 Maabane le mo nakong e e fetileng+ fa Saulo a ne a le kgosi ya rona, ke wena yo o neng o etelela Iseraele pele go tswa le go e tsenya.+ Mme Jehofa a go raya a re, ‘Wena ka bowena o tla disa+ batho ba me Iseraele, e bile wena ka bowena o tla nna moeteledipele+ wa Iseraele.’”
3 Ka jalo banna botlhe ba bagolwane+ ba Iseraele ba tla kwa kgosing kwa Heberone, mme Kgosi Dafide a dira kgolagano+ le bone kwa Heberone fa pele ga ga Jehofa; mme morago ga moo ba tlotsa+ Dafide go nna kgosi ya Iseraele.+
4 Dafide o ne a na le dingwaga di le masome a mararo fa a nna kgosi. O ne a busa e le kgosi dingwaga di le masome a manè.+
5 O ne a busa e le kgosi ya Juda kwa Heberone dingwaga di le supa le dikgwedi di le thataro;+ mme a busa e le kgosi kwa Jerusalema+ dingwaga di le masome a mararo le boraro a busa Iseraele yotlhe le Juda.
6 Ka gone kgosi le banna ba yone ba ya kwa Jerusalema go ya go tlhasela Bajebuse+ ba ba nnang mo lefatsheng leo, mme ba simolola go raya Dafide ba re: “Ga o kitla o tsena fano, mme difofu le digole ruri di tla go faposa,”+ bone ba akanya gore: “Dafide ga a kitla a tsena fano.”
7 Le fa go ntse jalo, Dafide a thopa kago e e thata ya Siona,+ ke gore, Motse wa ga Dafide.+
8 Ka jalo Dafide a bua mo letsatsing leo a re: “Ope fela yo o kgemethang Bajebuse,+ a a tsene ka mogogoro wa metsi,+ a kopane le digole le difofu, tse di tlhoilweng ke moya wa ga Dafide!” Ke gone ka moo ba reng: “Sefofu le segole ga di kitla di tsena mo ntlong.”
9 Mme Dafide a nna mo kagong e e thata, mme ya bidiwa Motse wa ga Dafide; mme Dafide a simolola go aga gotlhe fela go tswa kwa Thoteng+ le mo teng.
10 Ka gone Dafide a tswelela a gola thata,+ mme Jehofa Modimo wa masomosomo+ o ne a na le ene.+
11 Mme Hirame+ kgosi ya Ture a romela barongwa+ kwa go Dafide, le ditlhare+ tsa mosedara le badira ka dikgong le badira ka maje a dipota, mme ba simolola go agela Dafide+ ntlo.
12 Mme Dafide a simolola go itse gore Jehofa o ne a mo tlhomamisitse ka thata go nna kgosi ya Iseraele+ le gore o ne a godisitse+ bogosi jwa gagwe ka ntlha ya batho ba gagwe Iseraele.+
13 Fa go sa ntse go ntse jalo, Dafide a nna a tsaya bagadingwana+ ba ba oketsegileng le basadi+ ba ba tswang kwa Jerusalema fa a sena go tswa kwa Heberone; mme Dafide a tswelela a tsholelwa bana ba bantsi ba basimane le ba basetsana.
14 Mme ano ke maina a ba a ba tsholetsweng kwa Jerusalema: Shammua+ le Shobabe+ le Nathane+ le Solomone,+
15 le Ibehare le Elishua+ le Nefege+ le Jafia,+
16 le Elishama+ le Eliada le Elifelete.+
17 Mme Bafilisitia ba utlwa gore ba ne ba tloditse Dafide go nna kgosi ya Iseraele.+ Foo Bafilisitia botlhe ba tlhatloga ba tla go batla Dafide. E rile Dafide a utlwa ka gone, a fologela kwa lefelong le go leng thata go le atamela.+
18 Mme Bafilisitia bone, ba tsena mme ba nna ba tsamayatsamaya mo lebaleng le le kwa tlase la Refaime.+
19 Mme Dafide a simolola go botsa+ Jehofa, a re: “A ke tlhasele Bafilisitia? A o tla ba tsenya mo seatleng sa me?” Foo Jehofa a raya Dafide a re: “Tlhatloga, gonne ruri ke tla tsenya Bafilisitia mo diatleng tsa gago.”+
20 Ka jalo Dafide a tla kwa Baale-perasime,+ mme Dafide a ba kgemetha gone koo. Foo a re: “Jehofa o thubagantse baba ba me+ kwa pele gape, jaaka phatlha e e dirilweng ke metsi.” Ke gone ka moo a neng a bitsa leina la lefelo leo a re Baale-perasime.+
21 Ka gone ba tlogela medingwana ya bone+ foo, ka jalo Dafide le banna ba gagwe ba e tsaya.+
22 Moragonyana Bafilisitia ba tlhatloga gape+ mme ba tsamayatsamaya mo lebaleng le le kwa tlase la Refaime.+
23 Foo Dafide a botsa+ Jehofa, mme a re: “O se ka wa tlhatloga. Potologela ka kwa morago ga bone, mme o ba tlhasele ka kwa pele ga ditlhatshana tsa bakha.+
24 Mme a go diragale gore, fa o utlwa modumo wa go gwanta kwa godimo ga ditlhatshana tsa bakha, ka nako eo o dire ka bofefo,+ ka gonne ka nako eo Jehofa o tla bo a dule kwa pele ga gago go kgemetha bothibelelo jwa Bafilisitia.”+
25 Ka jalo Dafide a dira ka tsela eo, fela jaaka Jehofa a ne a mo laetse,+ mme a kgemetha+ Bafilisitia go tswa kwa Geba go ya fela kwa Gesere.
