2 Samuele 10:1-19

10  Mme ga diragala morago ga moo gore kgosi ya bomorwa Amona+ e swe, mme Hanune morwaayone a simolola go busa mo boemong jwa yone.+  Foo Dafide a re: “Ke tla direla Hanune morwa Nahashe bopelonomi jwa lorato, fela jaaka rraagwe a ne a ntirela bopelonomi jwa lorato.”+ Ka gone Dafide a romela batlhanka ba gagwe+ gore ba ye go mo gomotsa kaga rraagwe, mme batlhanka ba ga Dafide ba tsena mo lefatsheng la bomorwa Amona.  Le fa go ntse jalo, dikgosana tsa bomorwa Amona tsa raya Hanune morena wa tsone tsa re: “A Dafide o tlotla rrago mo matlhong a gago fa a go romeletse bagomotsi? A Dafide ga a romela batlhanka ba gagwe kwa go wena gore a hukutse motse le go o tlhola+ le go o ribegetsa?” +  Ka jalo Hanune a tsaya batlhanka ba ga Dafide a beola sephatlo sa ditedu+ tsa bone, a sega diaparo tsa bone ka bogare go fitlha mo maragong a bo a ba tsamaisa.+  Moragonyana batho ba go begela Dafide, mme a akofa a roma gore ba kgatlhantshiwe, ka gonne banna bano ba ne ba ikutlwa ba tlhabisitswe ditlhong thata; mme kgosi ya tswelela ya re: “Nnang mo Jeriko+ go fitlha ditedu tsa lona di gola thata. Ke gone lo tla boang.”  Fa nako e ntse e tsamaya bomorwa Amona ba bona gore ba ne ba nkgela Dafide maswe,+ mme bomorwa Amona ba romela gore go ye go thapiwa Basiria ba kwa Bethe-rehobe+ le Basiria ba kwa Soba,+ banna ba ba tsamayang ka dinao ba le dikete di le masome a mabedi, le kgosi ya kwa Maaka,+ banna ba le sekete, le Ishetoba, banna ba le dikete di le lesome le bobedi.  E rile Dafide a utlwa ka gone, foo a roma Joabe le masole otlhe le banna ba ba thata.+  Mme bomorwa Amona ba simolola go tswa mme ba tlhomagana kafa thulaganyong ya tlhabano kwa botsenong jwa kgoro, le Basiria ba kwa Soba le ba kwa Rehobe,+ le Ishetoba le Maaka ba le bosi kwa nageng e e bulegileng.+  E rile Joabe a bona gore ditlhaselo tsa tlhabano di ne di mo tlela go tswa kafa pele le kafa morago, a akofa a tlhopha bangwe ba banna botlhe ba ba tlhophilweng+ ka kelotlhoko kwa Iseraele mme a ba tlhomaganya kafa thulaganyong gore ba ye go kopana le Basiria. 10  Mme batho ba bangwe botlhe a ba tsenya mo seatleng sa ga Abishai+ morwarraagwe, gore a ba tlhomaganye kafa thulaganyong gore ba ye go kopana le bomorwa Amona.+ 11  Mme a tswelela a re: “Fa Basiria ba nna thata go mpheta, foo o mpoloke; mme fa bomorwa Amona ba ka nna thata mo go wena, le nna ke tla tla go go boloka.+ 12  O nonofe, gore re itshupe re le pelokgale+ mo boemong jwa batho ba rona le mo boemong jwa metse ya Modimo+ wa rona; mme Jehofa o tla dira se se molemo mo matlhong a gagwe.”+ 13  Foo Joabe le batho ba ba neng ba na le ene ba ya go tlhabana le Basiria, mme ba tshaba fa pele ga gagwe.+ 14  Mme bomorwa Amona, ba ne ba bona gore Basiria ba ne ba tshabile, mme ba tshaba fa pele ga ga Abishai ba bo ba tsena mo motseng.+ Morago ga moo Joabe a boa kwa go bomorwa Amona a tla mo Jerusalema.+ 15  E rile Basiria ba bona gore ba ne ba fentswe fa pele ga Iseraele, ba iphutha mmogo. 16  Ka jalo Hadadesere+ a roma mme a ntsha Basiria ba ba neng ba le mo kgaolong ya Noka;+ mme go tswa foo ba tla mo Helame, Shobake+ molaodi wa masole a ga Hadadesere a le fa pele ga bone. 17  Fa go ne go begelwa Dafide, ka yone nako eo a phutha Iseraele yotlhe mme a kgabaganya Joredane a tla mo Helame. Jaanong Basiria ba tlhomagana kafa thulaganyong gore ba ye go kopana le Dafide mme ba simolola go tlhabana le ene.+ 18  Mme Basiria ba tshaba+ fa pele ga Iseraele; mme mo Basirieng Dafide a bolaya banna ba ba kgweetsang dikara ba le makgolo a le supa le bapalami+ ba dipitse ba le dikete di le masome a manè, mme a tlhaba Shobake molaodi wa masole a bone mo o neng a swela gone foo.+ 19  E rile dikgosi+ tsotlhe, batlhanka ba ga Hadadesere, ba bona gore ba ne ba fentswe fa pele ga Iseraele, ba akofa ba dira kagiso le Iseraele+ mme ba simolola go ba direla;+ mme Basiria ba ne ba boifa go tlhola ba leka go boloka bomorwa Amona gape.+

Dintlha Tse di Kwa Tlase