2 Ditiragalo 31:1-21

31  Mme fela fa ba fetsa seno sotlhe, Baiseraele+ botlhe ba ba neng ba fitlhelwa koo ba tswela kwa metseng ya Juda,+ mme ba thuba dipilara+ tse di boitshepo ba bo ba rema dikota+ tse di boitshepo le go rutla mafelo a a kwa godimo+ le dibeso+ ba di tlosa mo Juda+ yotlhe le Benjamine le mo Eferaime+ le Manase+ go fitlha ba fetsa; morago ga moo bomorwa Iseraele botlhe ba boela kwa metseng ya bone, mongwe le mongwe kwa thuong ya gagwe.  Foo Hesekia a tlhoma makgamu+ a baperesiti le a Balefi+ mo makgamung a bone, lengwe le lengwe tumalanong le tirelo ya lone ya baperesiti+ le ya Balefi+ ka ga tshupelo e e fisiwang+ le ditlhabelo tsa kabalano+ gore ba direle+ le go ntsha ditebogo+ le pako+ mo dikgorong tsa mathibelelo a ga Jehofa.  Go ne go na le karolo ya kgosi e e tswang mo dithotong+ tsa yone ka namana ya ditshupelo tse di fisiwang,+ ya ditshupelo tse di fisiwang tsa moso+ le tsa maitseboa, le ditshupelo tse di fisiwang tsa bosabata+ le tsa bongwedi+ ba basha le tsa dipaka+ tsa moletlo, go ya ka se se kwadilweng mo molaong wa ga Jehofa.+  Go feta moo, a bolelela batho, banni ba Jerusalema, gore ba ntshe karolo ya baperesiti+ le ya Balefi,+ gore ba tle ba ngaparele+ molao wa ga Jehofa+ thata.  Mme e rile fela lefoko le tswa, bomorwa Iseraele+ ba oketsa mabutswapele a dijo tsa ditlhaka,+ beine e ntšha,+ le leokwane+ le tswina ya dinotshe+ le kungo yotlhe ya tshimo,+ mme ba tlisa nngwesomeng ya sengwe le sengwe ka bontsi.+  Mme bomorwa Iseraele le Juda ba ba neng ba nna mo metseng ya Juda,+ le bone ba tlisa sa bosome sa dikgomo le dinku le sa bosome sa dilo tse di boitshepo,+ dilo tse di itshepiseditsweng Jehofa Modimo wa bone. Ba ne ba di tlisa mme ka jalo ba ntsha mekoakoa.  Ba simolola mekoa mo kgweding ya boraro+ ka go baya o o kwa tlasetlase, mme ba fetsa mo kgweding ya bosupa.+  E rile Hesekia le dikgosana+ ba tla mme ba bona mekoa, ba baka+ Jehofa le batho ba gagwe Iseraele.+  Fa nako e ntse e tsamaya Hesekia a botsa baperesiti le Balefi kaga mekoa+ eno. 10  Foo Asaria+ moperesiti yo mogolo wa ntlo ya ga Sadoke+ a mo raya a re, ee, a re: “Go tloga ka nako ya fa ba simolola go tlisa moneelo+ mo ntlong ya ga Jehofa go ntse go jewa go kgorwa+ e bile go na le mo gontsi mo go salang;+ gonne Jehofa ka boene o segofaditse batho ba gagwe,+ mme mo go setseng ke letlotlo le legolo leno.” 11  Foo Hesekia a re go baakanngwe diphaposi tsa bojelo+ mo ntlong ya ga Jehofa. Ka jalo ba di baakanya. 12  Mme ba nna ba tlisa moneelo+ le sa bosome+ le dilo tse di boitshepo ka boikanyegi;+ mme Konania wa Molefi o ne a ba okametse e le moeteledipele, mme Shimei morwarraagwe e ne e le wa bobedi. 13  Mme Jehiele le Asasia le Nahathe le Asahele le Jerimothe le Josabade le Eliele le Isemakia le Mahathe le Benaia e ne e le balaodi mo letlhakoreng la ga Konania le Shimei morwarraagwe, ka taelo ya ga kgosi Hesekia, mme Asaria+ e ne e le moeteledipele wa ntlo ya Modimo wa boammaaruri. 14  Mme Kore morwa Imina wa Molefi e ne e le molebedi wa kgoro+ go ela kwa botlhaba,+ a tlhokomela meneelo e e dirwang ka go rata+ ya Modimo wa boammaaruri, go ntsha moneelo+ wa ga Jehofa le dilo tse di boitshepotshepo.+ 15  Mme mo taolong ya gagwe go ne go na le Edene le Miniamine le Jeshua le Shemaia, Amaria le Shekania, mo metseng ya baperesiti, mo tirong e ba e abetsweng,+ go naya bomorwarraabone mo makgamung+ ka go lekana, ba bagolo le ba bannye ka go lekana;+ 16  kwantle ga go kwadisiwa ga batho ba banna kafa losikeng+ go simolola ka ba ba nang le dingwaga di le tharo go ya kwa godimo,+ botlhe ba ba tlang mo ntlong ya ga Jehofa e le mokgwa wa letsatsi le letsatsi, mo tirelong ya bone ka maikarabelo a bone go ya ka makgamu a bone. 17  Mono ke go kwadisiwa kafa losikeng ga baperesiti ka ntlo ya borraabone+ le ga Balefi,+ go simolola ka ba ba nang le dingwaga di le masome a mabedi+ go ya kwa godimo, ka maikarabelo a bone mo makgamung+ a bone; 18  a go kwadisiwa kafa losikeng ga bana botlhe ba bone ba bannye, basadi ba bone le bomorwaabone le bomorwadiabone, phuthego yotlhe, ka gonne ba ne ba iitshepisetsa+ se se boitshepo mo tirong e ba e abetsweng;+ 19  le bomorwa Arone,+ e bong baperesiti, mo dinageng+ tsa mafulo a metse ya bone. Mo metseng yotlhe e e farologaneng go ne go na le banna ba ba neng ba tlhaotswe ka maina, gore ba neye motho mongwe le mongwe wa monna mo baperesiting dikarolo le botlhe ba ba kwadisitsweng kafa losikeng mo Balefing. 20  Mme Hesekia a dira jalo mo Juda yotlhe, mme a tswelela a dira se se molemo+ le se se siameng+ le se se ikanyegang+ fa pele ga ga Jehofa Modimo wa gagwe. 21  Mme mo tirong nngwe le nngwe e a neng a e simolola mo tirelong+ ya ntlo ya Modimo wa boammaaruri le mo molaong+ le mo taelong ya go batla+ Modimo wa gagwe, o ne a dira ka pelo yotlhe+ ya gagwe, mme a atlega.+

Dintlha Tse di Kwa Tlase