2 Dikgosi 14:1-29

14  Mo ngwageng wa bobedi wa ga Jehoashe+ morwa Jehoahase kgosi ya Iseraele, Amasia+ morwa Jehoashe kgosi ya Juda a nna kgosi.  O ne a na le dingwaga di le masome a mabedi le botlhano fa a simolola go busa, mme a busa dingwaga di le masome a mabedi le borobongwe mo Jerusalema. Mme leina la ga mmaagwe e ne e le Jehoadine+ wa Jerusalema.  Mme a tswelela go dira se se neng se thokgame mo matlhong a ga Jehofa,+ mme fela e seng jaaka Dafide rraagwemogologolwane.+ O ne a dira go ya ka sotlhe se Jehoashe rraagwe a neng a se dirile.+  Ke mafelo a a kwa godimo fela a a neng a se ka a nyelela.+ Batho ba ne ba sa ntse ba ntsha ditlhabelo le go kuisa musi wa setlhabelo mo mafelong a a kwa godimo.+  Mme ga diragala gore fela fa bogosi bo sena go nitama mo seatleng sa gagwe, a simolola go kgemetha batlhanka ba gagwe ba ba neng ba kgemethile+ kgosi rraagwe.+  Mme a se ka a bolaya bomorwa bakgemethi, go ya ka se se kwadilweng mo bukeng ya molao wa ga Moshe se Jehofa a neng a se ntshitse e le taelo a re:+ “Borre ga ba a tshwanela go bolawa ka ntlha ya barwa, le barwa ga ba a tshwanela go bolawa ka ntlha ya borre; mme mongwe le mongwe o tshwanetse go bolaelwa boleo jwa gagwe.”+  Ene a kgemetha Baedoma+ mo Mokgatšheng wa Letswai,+ banna ba le dikete di le lesome, mme a tshwara Sela mo ntweng, mme leina la yone la bidiwa Joketheele go fitlha mo letsatsing leno.  Mme Amasia a romela barongwa kwa go Jehoashe morwa Jehoahase morwa Jehu kgosi ya Iseraele, a re: “Tla. A re lebanye difatlhego.”+  Foo Jehoashe kgosi ya Iseraele a roma kwa go Amasia kgosi ya Juda, a re: “Mofero o o mitlwa o o neng o le kwa Lebanona o ne a wa roma kwa mosedareng+ o o neng o le kwa Lebanona, o re: ‘Naya morwaake morwadio go nna mosadi.’ Le fa go ntse jalo, phologolo ya naga e e neng e le kwa Lebanona e ne ya feta mme ya gataka mofero o o mitlwa.+ 10  Ruri o kgemethile+ Edoma, mme pelo ya gago e go tsholeditse.+ Ipelele tlotlo+ ya gago mme o nne mo ntlong ya gago. Ke ka ntlha yang fa o tshwanetse go tsena mo ntweng+ mo maemong a a maswe+ mme o we, wena mmogo le Juda?” 11  Mme Amasia a se ka a reetsa.+ Ka jalo Jehoashe kgosi ya Iseraele a tla, mme ba lebana difatlhego,+ ene le Amasia kgosi ya Juda, kwa Bethe-shemeshe+ wa Juda. 12  Mme Juda a fenngwa fa pele ga Iseraele,+ mo mongwe le mongwe a neng a tshabela kwa mogopeng wa gagwe. 13  Mme e ne e le Amasia kgosi ya Juda morwa Jehoashe morwa Ahasia yo Jehoashe kgosi ya Iseraele a neng a mo tshwara kwa Bethe-shemeshe, mme morago ga moo ba tla mo Jerusalema mme a bula phatlha mo loboteng lwa Jerusalema kwa Kgorong ya Eferaime+ go fitlha kwa Kgorong ya Kgokgotsho,+ dikubita di le makgolo a manè. 14  Mme a tsaya gouta yotlhe le selefera le dilwana tsotlhe tse di neng di fitlhelwa mo ntlong ya ga Jehofa+ le mo matlotlong a ntlo ya kgosi le ba ba tshwaretsweng go rekololwa mme a boela kwa Samarea. 15  Fa e le ditiragalo tse dingwe tsotlhe tsa ga Jehoashe, se a se dirileng le thata ya gagwe le kafa a neng a tlhabana le Amasia kgosi ya Juda ka teng, a ga di a kwalwa mo bukeng+ ya ditiragalo tsa metlha ya dikgosi tsa Iseraele? 16  La bofelo Jehoashe a lala le borraagwemogologolwane+ mme a fitlhwa kwa Samarea+ le dikgosi tsa Iseraele, mme Jeroboame+ morwawe a simolola go busa mo boemong jwa gagwe. 17  Mme Amasia+ morwa Jehoashe kgosi ya Juda a tswelela a tshela morago ga loso lwa ga Jehoashe+ morwa Jehoahase kgosi ya Iseraele dingwaga di le lesome le botlhano.+ 18  Fa e le ditiragalo tse dingwe tsotlhe tsa ga Amasia, a ga di a kwalwa mo bukeng+ ya ditiragalo tsa metlha ya dikgosi tsa Juda?+ 19  Kgabagare ba golagana go mo logela leano la boferefere+ kwa Jerusalema, mme a tshabela kwa Lakishe;+ ba roma gore a latelelwe kwa Lakishe mme ba mmolaela teng.+ 20  Ka jalo ba mo tsaya ka dipitse mme a fitlhwa+ mo Jerusalema le borraagwemogologolwane mo Motseng wa ga Dafide.+ 21  Go tswa foo batho botlhe ba Juda ba tsaya Asaria,+ a na le dingwaga di le lesome le borataro+ ka nako eo, mme ba mo dira kgosi mo boemong jwa ga rraagwe, e bong Amasia.+ 22  Ene ka boene o ne a aga Elathe+ mme a e busetsa Juda morago ga kgosi e sena go lala le borraayonemogologolwane. 23  Mo ngwageng wa bolesome le botlhano wa ga Amasia morwa Jehoashe kgosi ya Juda, Jeroboame+ morwa Jehoashe kgosi ya Iseraele a nna kgosi mo Samarea dingwaga di le masome a manè le bongwe. 24  Mme a tswelela go dira se se bosula mo matlhong a ga Jehofa. O ne a se ka a tloga mo maleong otlhe a ga Jeroboame morwa Nebate, a a leofisitseng+ Iseraele ka one. 25  Ke ene yo o neng a busetsa molelwane wa Iseraele go tloga kwa botsenong jwa Hamathe+ go ya go fitlha kwa lewatleng la Areba,+ go ya ka lefoko la ga Jehofa Modimo wa Iseraele yo o buileng ka motlhanka wa gagwe Jona+ morwa Amitai, moporofeti yo o neng a tswa kwa Gathe-hefere. 26  Gonne Jehofa o ne a bone pogisego e e botlhoko thata ya Iseraele.+ Go ne go se na ope yo o se nang thuso kgotsa yo o se nang mosola, le fa e le mothusi wa Iseraele.+ 27  Mme Jehofa o ne a solofeditse go se phimole leina la Iseraele kafa tlase ga magodimo.+ Ka gone o ne a ba boloka+ ka seatla sa ga Jeroboame morwa Jehoashe. 28  Fa e le ditiragalo tse dingwe tsotlhe tsa ga Jeroboame le sotlhe se a se dirileng le thata ya gagwe, kafa a tlhabaneng ka teng le kafa a buseditseng Damaseko+ le Hamathe+ ka teng kwa Juda kwa Iseraele, a ga di a kwalwa mo bukeng ya ditiragalo tsa metlha ya dikgosi tsa Iseraele? 29  La bofelo Jeroboame a lala le borraagwemogologolwane, le dikgosi tsa Iseraele, mme Sekarea+ morwawe a simolola go busa mo boemong jwa gagwe.

Dintlha Tse di Kwa Tlase