2 Bakorintha 8:1-24

8  Jaanong bakaulengwe, re lo itsise ka ga bopelonomi jo bo sa re tshwanelang jwa Modimo jo bo neilweng diphuthego tsa Makedonia,+  gore mo nakong ya teko e kgolo fa ba ne ba bogisega boipelo jo bogolo jwa bone le lehuma le legolo la bone di ne tsa dira gore dikhumo tsa bone tsa go aba ka bopelotshweu di tote.+  Gonne go ya ka se tota ba se kgonang,+ ee, ke a supa, seno se ne se feta seo tota ba neng ba se kgona,  fa bone ka go rata ga bone ba ne ba nna ba re kopa tshiamelo ya go aba ka bopelonomi ba rapela thata le gore ba nne le seabe mo bodireding jo bo laoletsweng baitshepi.+  Mme e seng fela jaaka re ne re solofetse, mme sa ntlha ba ne ba ineela mo Moreneng+ le mo go rona ka thato ya Modimo.  Seno se ne sa dira gore re kgothaletse Tito+ gore, fela jaaka e ne e le ene yo o neng a go simolola mo go lona, jalo gape o tshwanetse go digela gone go aba mono ga bopelonomi mo go lona.  Le fa go ntse jalo, fela jaaka lo tota mo go sengwe le sengwe,+ mo tumelong le mo lefokong le mo kitsong+ le mo tlhoafalong yotlhe le mo loratong lono lwa rona mo go lona, e kete gape lo ka tota mo go abeng mono ga bopelonomi.  Ga ke bue ka tsela ya go lo laola,+ mme ka ntlha ya tlhoafalo ya ba bangwe le go leka bommatota jwa lorato lwa lona.  Gonne lo itse bopelonomi jo bo sa re tshwanelang jwa Morena wa rona Jesu Keresete, gore le fa a ne a humile o ne a humanega ka ntlha ya lona,+ gore lo tle lo hume+ ka lehuma la gagwe. 10  Mme mo go seno ke ntsha kgopolo eno:+ gonne kgang eno e tswela lona mosola,+ ka jaana mo e setseng e le ngwaga o o fetileng lo ne lwa simolola e seng fela go dira mme le go batla go dira;+ 11  jaanong, feleletsang le go go dira, gore fela jaaka lo ne lo iketleeleditse go batla go dira, jalo gape lo tle lo go feleletsa ka se lo nang le sone. 12  Gonne sa ntlha, fa go iketleetsa go le teng, go amogelesega segolobogolo go ya ka se motho o nang le sone,+ e seng go ya ka se motho a se nang sone. 13  Gonne ga ke reye gore go nne motlhofo mo go ba bangwe,+ mme go nne thata mo go lona; 14  mme gore gone fela jaanong, go lekalekanya mo go setseng ga lona go tle go tlose go tlhaelelwa ga bone, gore mo go setseng ga bone le gone go tle go tlose go tlhaelelwa ga lona, gore go tle go nne le go lekalekanya.+ 15  Fela jaaka go kwadilwe go twe: “Motho yo o nang le mo gontsi o ne a se ka a nna le mo gontsi thata, le motho yo o nang le mo gonnye o ne a se ka a nna le mo gonnye thata.”+ 16  Jaanong a go lebogwe Modimo ka a lo tsenyeditse tlhoafalo e e tshwanang mo pelong ya ga Tito,+ 17  ka gonne eleruri o arabetse fa a ne a kgothadiwa, mme e re ka a tlhoafetse thata, o ya kwa go lona ka go rata ga gagwe. 18  Mme re mo romela le mokaulengwe yo go bakwa ga gagwe ka ga dikgang tse di molemo go anameng mo diphuthegong tsotlhe. 19  E seng seo fela, mme gape o ne a tlhomiwa+ ke diphuthego gore a nne motsamaimmogo le rona wa mpho eno ya bopelonomi e re tla e tsamaisang gore re galaletse+ Morena le go supa mogopolo wa rona o o etleetsegileng.+ 20  Ka gone re tila gore go nne le motho ope yo o re bonang molato+ ka ga katso eno+ ya bopelontle e e tshwanetseng go tsamaisiwa ke rona. 21  Gonne re “aba ka boikanyegi, e seng fela mo ponong ya ga Jehofa, mme le mo ponong ya batho.”+ 22  Mo godimo ga moo, re ba romela le mokaulengwe wa rona yo re mmoneng gantsi mo dilong di le dintsi gore o tlhoafetse, mme jaanong a tlhoafetse bogolo ka ntlha ya tshepo ya gagwe e kgolo mo go lona. 23  Le fa go ntse jalo, fa go na le potso epe ka ga Tito, ke motlhakanedi le nna le modirimmogo+ gore lo solegelwe molemo; kgotsa fa e le ka ga bakaulengwe ba rona, ke baaposetoloi ba diphuthego le kgalalelo ya ga Keresete. 24  Jalo ba bontsheng bosupi jwa lorato lwa lona le jwa se re neng ra ipelafatsa+ ka sone ka ga lona, fa pele ga sefatlhego sa diphuthego.

Dintlha Tse di Kwa Tlase