1 Ditiragalo 19:1-19

19  Mme ga diragala morago ga moo gore Nahashe+ kgosi ya bomorwa Amona a swe, mme morwawe a simolola go busa mo boemong jwa gagwe.+  Foo Dafide a re: “Ke tla direla Hanune morwa Nahashe bopelonomi jwa lorato,+ ka gonne rraagwe o ne a ntirela bopelonomi jwa lorato.”+ Ka jalo Dafide a roma barongwa go ya go mo gomotsa ka ga rraagwe, mme batlhanka ba ga Dafide ba tsena mo lefatsheng la bomorwa Amona+ kwa go Hanune go ya go mo gomotsa.  Le fa go ntse jalo, dikgosana tsa bomorwa Amona tsa raya Hanune tsa re: “A Dafide o tlotla rrago mo matlhong a gago ka go bo a go romeletse bagomotsi? A batlhanka ba gagwe ga ba a tla kwa go wena+ gore ba hukutse lefatshe thata le go ribegetsa le go tlhola lefatshe?”  Ka jalo Hanune a tsaya batlhanka ba ga Dafide+ a ba beola+ a ba a sega diaparo tsa bone ka bogare go fitlha fa maragong+ a bo a ba tsamaisa.+  Moragonyana batho ba ya mme ba begela Dafide ka banna bano; mme a akofa a roma gore ba kgatlhantshiwe, ka gonne ba ne ba fetogile banna ba ba tlhabisitsweng ditlhong thata; mme kgosi ya re: “Nnang mo Jeriko+ go fitlha ditedu tsa lona di gola thata. Ke gone lo tla boang.”  Fa nako e ntse e tsamaya bomorwa Amona ba bona gore ba ne ba nkgela+ Dafide maswe, mme Hanune+ le bomorwa Amona ba romela ditalenta tsa selefera di le sekete+ gore ba ithapele dikara+ le bapalami ba dipitse go tswa Mesopotamia le go tswa kwa Arame-maaka+ le go tswa kwa Soba.+  Ka jalo ba ithapela dikara+ di le dikete di le masome a mararo le bobedi le kgosi ya Maaka le batho ba yone.+ Foo ba tsena mme ba thibelela fa pele ga Medeba; mme fa e le bomorwa Amona bone, ba phuthega mmogo go tswa kwa metseng ya bone mme jaanong ba tla ntweng.  E rile Dafide a utlwa ka gone, a akofa a roma Joabe+ le masole otlhe le banna ba ba thata.+  Mme bomorwa Amona ba simolola go tswa mme ba tlhomagana kafa thulaganyong ya tlhabano kwa kgorong ya motse, mme dikgosi+ tse di neng di tlile di ne di le tsosi mo nageng e e bulegileng. 10  E rile Joabe a bona gore ditlhaselo tsa tlhabano di ne di mo tlela go tswa kafa pele le kafa morago, a akofa a tlhopha bangwe ba banna botlhe ba ba tlhophilweng ka kelotlhoko kwa Iseraele mme a ba tlhomaganya kafa thulaganyong gore ba ye go kopana le Basiria.+ 11  Mme batho ba bangwe botlhe a ba tsenya mo seatleng sa ga Abishai+ morwarraagwe, gore ba tlhomagane kafa thulaganyong gore ba ye go kopana le bomorwa Amona.+ 12  Mme a tswelela a re: “Fa Basiria+ ba nna thata go mpheta, foo o mpoloke;+ mme fa bomorwa Amona ba ka nna thata go mpheta, le nna ke tla go boloka.+ 13  O nonofe,+ gore re itshupe re le pelokgale mo boemong jwa batho ba rona le mo boemong jwa metse ya Modimo wa rona;+ mme fa e le Jehofa, o tla dira se se molemo mo matlhong a gagwe.”+ 14  Foo Joabe le batho ba ba neng ba na le ene ba atamela fa pele ga Basiria ba ya go tlhabana,+ mme ba tshaba+ fa pele ga gagwe. 15  Fa e le bomorwa Amona bone, ba ne ba bona gore Basiria ba ne ba tshabile, mme le bone ba tshaba+ fa pele ga ga Abishai morwarraagwe mme ba tsena mo motseng.+ Moragonyana Joabe a tla mo Jerusalema. 16  E rile Basiria ba bona gore ba ne ba fentswe+ fa pele ga Iseraele, ba roma barongwa mme ba ntsha Basiria ba ba neng ba le mo kgaolong ya Noka,+ Shofake molaodi wa masole a ga Hadadesere a le fa pele ga bone. 17  Fa go ne go begelwa Dafide, ka yone nako eo a phutha Iseraele yotlhe mme a kgabaganya Joredane a tla kwa go bone mme a tlhomagana kafa thulaganyong kgatlhanong le bone.+ E rile Dafide a tlhomagana kafa thulaganyong ya tlhabano gore a ye go kopana le Basiria, ba simolola go tlhabana le ene. 18  Mme Basiria ba tshaba+ ka ntlha ya Iseraele; Dafide a bolaya ba le dikete di le supa ba Basiria ba ba kgweetsang dikara le banna ba le dikete di le masome a manè ba ba tsamayang ka dinao, a bolaya+ Shofake molaodi wa masole ka boene. 19  E rile batlhanka ba ga Hadadesere ba bona gore ba ne ba fentswe fa pele ga Iseraele,+ ba dira kagiso ka bonako le Dafide mme ba simolola go mo direla;+ mme Siria e ne e sa batle go leka go tlhola e boloka bomorwa Amona.+

Dintlha Tse di Kwa Tlase