1 Ditiragalo 16:1-43

16  Ka jalo ba tsenya letlole la Modimo wa boammaaruri+ mme ba le baya mo teng ga mogope o Dafide a neng a o le tlhometse;+ mme ba simolola go isa ditshupelo tse di fisiwang le ditlhabelo tsa kabalano fa pele ga Modimo wa boammaaruri.+  E rile Dafide a fetsa go isa tshupelo e e fisiwang+ le ditlhabelo tsa kabalano,+ a segofatsa+ batho mo leineng la ga Jehofa.+  Mo godimo ga moo, a kgaoganyetsa+ Baiseraele botlhe, monna le mosadi, mongwe le mongwe senkgwe se se kgolokwe le kuku ya leungo la mokolane le kuku ya morara o o swabisitsweng.  Foo a baya bangwe ba Balefi+ jaaka badiredi+ fa pele ga letlole la ga Jehofa, gore ba gakologelwe+ ba bo ba leboge+ le go baka+ Jehofa Modimo wa Iseraele,  Asafe+ e le tlhogo, mme a latelwa ke Sekarea, le Jeiele le Shemiramothe le Jehiele le Matithia le Eliabe le Benaia le Obede-edome le Jeiele,+ ka mofuta wa diletswa tsa megala le ka diharepa,+ le Asafe+ ka disemebala a leletsa kwa godimo,+  le Benaia le Jahasiele e bong baperesiti ka diterompeta+ fa pele ga letlole la kgolagano ya Modimo wa boammaaruri ka metlha.  E ne ya nna mo letsatsing leo Dafide a neng a ntsha moneelo+ lekgetlo la ntlha a leboga+ Jehofa ka Asafe+ le bomorwarraagwe:   “Ntshetshang Jehofa+ ditebogo; bitsang leina la gagwe,+Itsiseng ditiro tsa gagwe mo ditšhabeng!+   Mo opeleleng,+ mo leletseng pina,+Tlhatlhanyang ka ditiro tsotlhe tsa gagwe tse di gakgamatsang.+ 10  Ipelafatseng ka leina la gagwe+ le le boitshepo,+A pelo ya ba ba batlang Jehofa e ipele.+ 11  Batlang Jehofa le nonofo ya gagwe,+Batlang sefatlhego sa gagwe ka metlha.+ 12  Gakologelwang ditiro tsa gagwe tse di gakgamatsang tse a di dirileng,+Dikgakgamatso tsa gagwe le ditshwetso tsa boatlhodi tsa molomo wa gagwe,+ 13  Lona bana ba ga Iseraele motlhanka wa gagwe,+Lona bomorwa Jakobe, ba ba tlhophilweng ba gagwe.+ 14  Ke Jehofa Modimo+ wa rona; ditshwetso tsa gagwe tsa boatlhodi+ di mo lefatsheng lotlhe. 15  Gakologelwang kgolagano ya gagwe ka bosakhutleng,+Lefoko le a le laetseng, go fitlha dikokomaneng tse di sekete,+ 16  Kgolagano e a neng a e dira le Aborahame,+Le maikano ao a a diretseng Isake.+ 17  E leng polelo e a neng a e boloka e eme e le molao mo go Jakobe,+E le kgolagano e e nnang ka bosakhutleng mo go Iseraele,+ 18  A re, ‘Ke tla go naya lefatshe la Kanana,+Go nna kabelo ya boswa jwa gago,’+ 19  E ne e le fa lo ne lo le mmalwa ka palo,+Ee, lo le mmalwa thata, e bile lo le baagi ba baeng mo go lone.+ 20  Mme ba nna ba tsamayatsamaya go tswa setšhabeng go ya setšhabeng,+Le go tswa bogosing go ya kwa setšhabeng+ se sengwe. 21  O ne a se ka a letla ope go ba tsietsa,+Mme o ne a kgalemela dikgosi+ ka ntlha ya bone, 22  A re, ‘Lo se ka lwa ama batlodiwa ba me,E bile lo se ka lwa dira baporofeti ba me sepe se se bosula.’+ 23  Opelelang Jehofa lona lotlhe ba lefatshe!+Letsatsi le letsatsi, itsiseng poloko e a e nayang!+ 24  Bolelang kgalalelo ya gagwe mo ditšhabeng,Ditiro tsa gagwe tse di gakgamatsang mo ditšhabeng tsotlhe. 25  Gonne Jehofa o mogolo e bile o tshwanelwa thata ke go bakwa,+E bile o tshwanetse go boifiwa go feta medimo e mengwe yotlhe.+ 26  Gonne medimo yotlhe ya ditšhaba ke medimo e e se nang mosola.+Fa e le Jehofa ene, o dirile magodimo.+ 27  Seriti le bontlentle di fa pele ga gagwe,+Nonofo le boipelo di kwa lefelong la gagwe.+ 28  Nayang Jehofa, lona malapa a ditšhaba,Nayang Jehofa kgalalelo le nonofo.+ 29  Nayang Jehofa kgalalelo ya leina la gagwe,+Tsholang mpho mme lo tle fa pele ga gagwe.+Ikobeleng Jehofa lo le mo mokgabong o o boitshepo.+ 30  Nnang mo ditlhabing tse di botlhoko thata ka ntlha ya gagwe, lona lotlhe batho ba lefatshe!Le naga e e ungwang e tlhomamisitswe thata:Ga e kitla e reketlisiwa+ le ka motlha. 31  A magodimo a ipele, le lefatshe le itumele,+Mme a ba bue mo gare ga ditšhaba ba re, ‘Jehofa ka boene ke kgosi+ jaanong!’ 32  A lewatle le dume jaaka maru le se se tletseng mo go lone,+A naga e itumele le sotlhe se se mo go yone.+ 33  Mme gape a ditlhare tsa sekgwa di ponyege ka boipelo ka ntlha ya ga Jehofa,+Gonne o tlile go atlhola lefatshe.+ 34  Ntshetsang Jehofa ditebogo, gonne o molemo,+Gonne bopelonomi jwa gagwe jwa lorato+ ke jwa bosakhutleng. 35  Mme lo re, ‘Re boloke tlhe Modimo wa poloko ya rona,+Re phuthe o re golole mo ditšhabeng,+Gore re ntshetse leina la gago le le boitshepo+ ditebogo, re bue ka boitumelo ka pako+ ya gago. 36  A go bakwe Jehofa Modimo wa Iseraele go tswa bosasimologeng go ya bosakhutleng.’”+Mme batho botlhe ba re: “Amen!” mme ba baka Jehofa.+ 37  Mme a tlogela Asafe+ moo fa pele ga letlole la kgolagano ya ga Jehofa le bomorwarraagwe gore ba direle+ fa pele ga Letlole ka metlha, kafa go se se batlegang letsatsi lengwe le lengwe;+ 38  le Obede-edome le bomorwarraagwe, ba le masome a le marataro le borobedi, le Obede-edome morwa Jeduthune le Hosa jaaka balebedi ba dikgoro; 39  le moperesiti Sadoke+ le baperesiti bomorwarraagwe fa pele ga motlaagana wa ga Jehofa mo lefelong le le kwa godimo le le neng le le kwa Gibeone,+ 40  gore ba isetse Jehofa ditshupelo tse di fisiwang mo sebesong sa tshupelo e e fisiwang ka metlha mo mosong le mo maitseboeng le go e ntshetsa sotlhe se se kwadilweng mo molaong wa ga Jehofa o a neng a o laolela Iseraele;+ 41  ba na le Hemane+ le Jeduthune le banna ba bangwe botlhe ba ba tlhophilweng ba ba neng ba tlhaotswe+ ka maina gore ba leboge Jehofa,+ ka gonne “bopelonomi jwa gagwe jwa lorato ke jwa bosakhutleng”;+ 42  ba na le Hemane+ le Jeduthune,+ gore ba letse diterompeta+ le disemebala le diletswa tsa pina ya Modimo wa boammaaruri; le bomorwa+ Jeduthune kwa kgorong. 43  Mme batho botlhe ba ya mongwe le mongwe kwa ntlong ya gagwe.+ Ka jalo Dafide a ya go segofatsa ntlo ya gagwe.

Dintlha Tse di Kwa Tlase