1 Dikgosi 10:1-29

10  Jaanong kgosigadi ya Sheba+ e ne e utlwa pego ka ga Solomone malebana le leina la ga Jehofa.+ Ka jalo a tla go mo leka ka dipotso tse di akabatsang.+  La bofelo a goroga mo Jerusalema ka mokoloko o mogolo thata,+ dikamela+ di sikere leokwane+ la balema le gouta e ntsi thata le maje a a tlhokegang; mme a tsena kwa go Solomone mme a simolola go bua le ene ka sotlhe se pelo ya gagwe+ e neng e se ratile thata.  Solomone le ene a mmolelela dikgang tsotlhe tsa gagwe.+ Go ne go se na kgang epe e e fitlhegileng mo kgosing e kgosi e neng ya se ka ya e mmolelela.+  E rile kgosigadi ya Sheba e bona botlhale jotlhe jwa ga Solomone+ le ntlo e a neng a e agile,+  le dijo tsa tafole+ ya gagwe le go nna ga batlhanka ba gagwe le tirelo ya mo tafoleng ya batho ba gagwe ba ba abang dijo le diaparo tsa bone le dino+ tsa gagwe le ditlhabelo tsa gagwe tse di fisiwang tse a neng a di isa a le kwa ntlong ya ga Jehofa ka metlha, foo a felelwa ke maatla.  Ka jalo a raya kgosi a re: “Lefoko le ke le utlwileng kwa lefatsheng la me ka dikgang tsa gago le ka botlhale jwa gago+ le boammaaruri.  Mme ga ke a ka ka dumela mafoko ao go fitlha ke tla, gore matlho a me a tle a bone; mme bona! ke ne ke sa bolelelwa le fa e le sephatlo.+ O gaisitse ka botlhale le ka katlego dilo tse di utlwilweng tse ke neng ka di reetsa.+  Go itumela banna ba gago;+ go itumela+ batlhanka bano ba gago ba ba emang fa pele ga gago ka metlha, ba reetsa botlhale jwa gago!+  E kete Jehofa Modimo wa gago a ka bakwa,+ yo o go ipeletseng+ ka go go baya mo setulong sa bogosi sa Iseraele;+ ka gonne Jehofa o rata Iseraele ka bosakhutleng,+ mo e leng gore o ne a go tlhoma go nna kgosi+ gore o diragatse tshwetso+ ya boatlhodi le tshiamo.”+ 10  Go tswa foo a naya+ kgosi ditalenta di le lekgolo le masome a mabedi tsa gouta+ le leokwane+ le lentsi thata la balema le maje a a tlhokegang. Ga go ise go ke go tlhole go tlisiwa leokwane le lentsi jalo la balema le le lekanang le le kgosigadi ya Sheba e neng ya le naya Kgosi Solomone. 11  Mme lesomo la dikepe+ tsa ga Hirame tse di neng di tshotse gouta e e tswang kwa Ofire+ gape di ne tsa tlisa dikota tsa ditlhare+ tsa maalaguma di le dintsi thata le maje a a tlhokegang+ go tswa kwa Ofire. 12  Mme kgosi ya direla ntlo ya ga Jehofa+ le ntlo ya kgosi ditshegetso ka dikota tsa ditlhare tsa maalaguma, le diharepa+ le diletswa tsa megala+ tsa baopedi. Dikota tsa ditlhare tsa maalaguma tse di tshwanang le tseno ga di ise di tle le fa e le go bonwa go tla go fitlha mo letsatsing leno. 13  Mme Kgosi Solomone ka boene a naya kgosigadi ya Sheba sotlhe se a se ratang se a neng a se kopile, kwantle ga se a neng a se mo naya ka ntlha ya go aba ka bopelotshweu+ ga ga Kgosi Solomone. Morago ga moo a retologa a boela kwa lefatsheng la gagwe, ene mmogo le batlhanka ba gagwe.+ 14  Mme selekanyo sa bokete jwa gouta+ e e neng ya tla kwa go Solomone mo ngwageng o le mongwe se ne se fitlha go ditalenta tsa gouta+ di le makgolo a le marataro le masome a marataro le borataro, 15  kwantle ga banna ba maeto le poelo e e tswang mo bagwebing le dikgosi+ tsotlhe tsa Baaraba+ le balaodi ba lefatshe. 16  Mme Kgosi Solomone a dira dithebe tse dikgolo di le makgolo a mabedi tsa gouta e e pekantsweng+ (a baya dishekele di le makgolo a marataro tsa gouta mo thebeng nngwe le nngwe e kgolo),+ 17  le dithejana di le makgolo a mararo tsa gouta e e pekantsweng (a baya bomaena ba gouta mo thejaneng nngwe le nngwe).+ Go tswa foo kgosi ya di baya mo Ntlong ya Sekgwa sa Lebanona.+ 18  Mo godimo ga moo, kgosi ya dira setulo se segolo sa bogosi+ sa lonaka lwa tlou+ mme a se manega gouta e e itshekisitsweng.+ 19  Go ne go na le mapalamelelo a le marataro a a yang kwa setulong sa bogosi, mme setulo sa bogosi se ne se na le marulelo a a kgogoropo fa morago ga sone, mme go ne go na le maikaego a mabogo mo letlhakoreng leno le mo letlhakoreng lele fa lefelong la go nna, mme ditau+ tse pedi di ne di eme fa thoko ga maikaego a mabogo.+ 20  Mme go ne go na le ditau di le lesome le bobedi di eme foo mo godimo ga mapalamelelo a marataro, mo letlhakoreng leno le mo letlhakoreng lele. Go ne go se na bogosi bope jo bongwe jo bo neng bo na le sepe se se dirilweng fela jaaka sone.+ 21  Dijana tsotlhe tsa go nwela tsa ga Kgosi Solomone e ne e le tsa gouta, le dijana tsotlhe tsa Ntlo ya Sekgwa sa Lebanona+ e ne e le tsa gouta e e itshekileng.+ Go ne go se na sepe sa selefera; mo metlheng ya ga Solomone e ne e tsewa e se sepe gotlhelele. 22  Gonne kgosi e ne e na le lesomo la dikepe tsa Tareshishe+ mo lewatleng mmogo le lesomo la dikepe tsa ga Hirame. Gangwe mo dingwageng dingwe le dingwe di le tharo lesomo la dikepe tsa Tareshishe le ne le tla le tshotse gouta+ le selefera, lonaka lwa tlou,+ le dikgabo le diphikoko. 23  Ka jalo Kgosi Solomone o ne a le mogolo ka dikhumo+ le botlhale+ go feta dikgosi tse dingwe tsotlhe tsa lefatshe. 24  Mme batho botlhe ba lefatshe ba ne ba batla sefatlhego sa ga Solomone gore ba utlwe botlhale jwa gagwe jo Modimo o neng o bo tsentse mo pelong ya gagwe.+ 25  Mme mongwe le mongwe wa bone o ne a tlisa mpho ya gagwe,+ dilwana tsa selefera+ le dilwana tsa gouta le diaparo le dibetsa+ le leokwane la balema, dipitse le bommoulo,+ e le selo sa ngwaga le ngwaga.+ 26  Mme Solomone a nna a phutha dikara tse di oketsegileng le dipitse tsa ntwa; a nna le dikara di le sekete le makgolo a manè le dipitse tsa ntwa di le dikete di le lesome le bobedi,+ mme a di tlogela di emisitswe mo metseng ya dikara di le gaufi le kgosi mo Jerusalema.+ 27  Mme kgosi ya dira gore selefera mo Jerusalema e nne jaaka maje,+ mme ya dira gore dikgong tsa mosedara di nne dintsi thata+ jaaka ditlhare tsa mosikamore tse di kwa Shefela. 28  Mme Solomone o ne a na le dipitse tse a neng a di romelelwa go tswa Egepeto, mme setlhopha sa bagwebi ba kgosi se ne se tle se tseye motlhape wa dipitse ka tlhwatlhwa.+ 29  Mme kara e ne e na le go tla mme e ne e romelwa go tswa kwa Egepeto ka dipapetla tsa selefera di le makgolo a le marataro, le pitse ka di le lekgolo le masome a matlhano; mme go ne go ntse jalo ka dikgosi tsotlhe tsa Bahite+ le dikgosi tsa Siria. Ba ne ba romela ka tsone.

Dintlha Tse di Kwa Tlase