Fetela kwa tshedimosetsong

GO THUSA LELAPA

Go Tila go Phatloga ka Bogale

Go Tila go Phatloga ka Bogale

Motho yo o nyalaneng le ene o dira sengwe kgotsa o bua sengwe se se go galefisang mme wena o itira e kete ga o a galefa. Go tswa foo o a go lemoga gore o galefile mme o nna a go botsa gore a o siame. Seo se go tena le go feta. Ke eng se o ka se dirang gore o se ka wa phatloga ka bogale?

 Se o tlhokang go se itse

  • Go galefa thata go ka go lwatsa. Dipatlisiso di bontsha gore batho ba ba sa kgoneng go itshwara fa ba galefile ba feleletsa ba tsenwe ke malwetse a a jaaka high blood, malwetse a pelo, malwetse a tlhaloganyo e bile mmele wa bone ga o kgone go sila dijo sentle. Gape go galefa go ka dira gore motho a tlhoke boroko, a tshwenyege thata, a nne le mathata a letlalo kgotsa a tshwarwe ke stroke. Ke ka moo Baebele e reng: “Lesa bogale . . . , [ka gonne] bo isa bosuleng.”—Pesalema 37:8, Tswana Central.

  • Go gatelela maikutlo fa o galefile go kotsi. Go nna o galefile go ka tshwantshiwa le bolwetse jo bo bolaelang motho mo teng. Ka sekai, motho a ka simolola go sa tshepe batho kgotsa go ba tshwayatshwaya diphoso. Motho yo o ntseng jalo ga a kgone go tshela le batho e bile a ka feleletsa a itshenyeditse lenyalo.

 Se o ka se dirang

  • Se se go kgatlhang ka botho jwa gagwe. Kwala dilo tse tharo tse o di ratang ka motho yo o nyalaneng le ene. Fa a dira sengwe se se go galefisang, akanya ka dilo tseo. Seno se ka go thusa gore o se ka wa mo galefela thata.

    Baebele ya re: “Lo nne ba ba lebogang.”—Bakolosa 3:15, Tswana Central.

  •  Ithute go itshwarela. Sa ntlha, leka go reetsa motho yo o nyalaneng le ene fa a go tlhalosetsa maikutlo a gagwe. Seno se tla go thusa gore o kgone go mo tlhaloganya. (1 Petere 3:8) Go tswa foo ipotse gore a selo se a se dirileng se maswe thata mo o sa kgoneng go mo itshwarela.

    Baebele ya re: “Ke bontle . . . go tlhokomologa tlolo.”—Diane 19:11.

  •  Bua sentle fa o tlhalosa maikutlo a gago. Ka sekai, go na le gore o mo reye o re: “Fa o tsamaile o bo o sa nfounele o mpolelela gore o kae, o mpontsha gore ga o nkakanyetse,” mo reye o re: “Ke tshwenyega thata ka wena fa go nna bosigo mme ke sa itse gore a o siame kwa o leng teng.” Go bua sentle go tla go thusa gore o se ka wa galefa.

    Baebele ya re: “A puo ya lona ka metlha e nne ya bopelontle, e lokilwe ka letswai.”—Bakolosa 4:6.

  •  Ithute go reetsa. Fa o sena go bua, letla motho yo o nyalaneng le ene gore a arabe mme o se ka wa mo tsena ganong. Fa a sena go bua, boeletsa se a ntseng a se bua go bona gore a o mo tlhalogantse sentle. Go reetsa go ka go thusa gore o se ka wa galefa.

    Baebele ya re: “O tshwanetse go nna bonako go utlwa, bonya go bua.”—Jakobe 1:19.