Fetela kwa tshedimosetsong

Baebele e a Reng ka Monna le Mosadi ba ba Nnang Mmogo ba sa Nyalana?

Baebele e a Reng ka Monna le Mosadi ba ba Nnang Mmogo ba sa Nyalana?

Karabo ya Baebele

Baebele e a re Modimo o batla gore batho ba “ithibe mo boitsholong jo bo sa siamang jwa tlhakanelodikobo.” (1 Bathesalonika 4:3) Mo Baebeleng, mafoko a a reng “boitsholo jo bo sa siamang jwa tlhakanelodikobo” a akaretsa boaka, go tlhakanela dikobo ga batho ba bong jo bo tshwanang le go tlhakanela dikobo ga monna le mosadi ba ba sa nyalanang.

 Ke eng fa Modimo a batla gore monna le mosadi ba ba batlang go nna mmogo ba nyalane semolao?

  • Lenyalo ke thulaganyo e e tswang kwa Modimong. O ile a e simolola fa a ne a nyadisa monna le mosadi ba ntlha. (Genesise 2:22-24) O ne a sa e direla gore monna le mosadi ba nne mmogo fela ba sa nyalana.

  • Modimo o itse gore ke eng se se siametseng batho. O dirile gore lenyalo e nne kgolagano e e nnelang ruri fa gare ga monna le mosadi, e e tla solegelang molemo le go sireletsa botlhe mo lelapeng. Akanya ka sekai seno. Fela jaaka ditaelo tse di tlang le fanitšhara e o e rekileng di go bontsha gore o ka e kopanya jang ka tsela e e siameng, ditaelo tsa Modimo le tsone di re bolelela gore re ka dira eng re nne le lenyalo le le atlegileng. Ka metlha melao ya Modimo e solegela molemo batho ba ba e reetsang.—Isaia 48:17, 18.

    Ditaelo tse di tlang le fanitšhara e o e rekileng di go bontsha gore o ka e kopanya jang ka tsela e e siameng. Ditaelo tsa Modimo le tsone di re bolelela gore re ka dira eng re nne le lenyalo le le atlegileng

  • Go tlhakanela dikobo lo sa nyalana go ka nna le ditlamorago tse di botlhoko. Ka sekai, go ka felela ka gore motho a ime a sa batle, a nne le malwetse a a tshelanwang a tlhakanelodikobo le go tshwenyega thata mo maikutlong.

  • Modimo o neile banna le basadi bokgoni jwa go nna le bana ka go tlhakanela dikobo. Modimo o leba botshelo bo le boitshepo e bile o tsaya bokgoni jwa go nna le bana e le mpho e e tlhwatlhwakgolo. Modimo o batla gore re tlotle mpho eno ka go tlotla thulaganyo ya lenyalo.—Bahebera 13:4.

 A go phoso go nna mmogo pele ga lo nyalana ka boikaelelo jwa go bona gore a lo tla atlega?

Fa lo batla go nna le lenyalo le le atlegileng, ga go tlhokege gore lo nne nakonyana mmogo pele lo ise lo nyalane. Go na le moo, monna le mosadi ba nna le kamano e e molemo fa ba ikemiseditse go nna mmogo e bile ba dira mmogo ka natla go fenya mathata a ba nnang le one. * Lenyalo le nonotsha boikemisetso jwa bone jwa go nna mmogo.—Mathaio 19:6.

 Monna le mosadi ba ba nyalaneng ba ka dira eng gore lenyalo la bone le nonofe?

Ga go na manyalo a a se nang mathata. Le fa go ntse jalo, banyalani ba ka nna le lenyalo le le atlegileng fa ba dirisa kgakololo ya Baebele. Ela tlhoko dikai tse di latelang: