Fetela kwa tshedimosetsong

A Modimo o Amogela Madumedi Otlhe?

A Modimo o Amogela Madumedi Otlhe?

Karabo ya Baebele

Nnyaa, Modimo ga a amogele madumedi otlhe. Baebele e na le dikai di le dintsi tsa madumedi a a sa itumediseng Modimo. Dikai tseno di wela mo dikarolong tse pedi.

Karolo 1: Go obamela medimo ya maaka

Baebele fa e tlhalosa kobamelo ya maaka e dirisa mafoko a a jaaka “moya fela o o hemelwang kwa ntle,” “lefela,” le ‘dilo tse go se nang sepe se se mosola mo go tsone.’ (Jeremia 10:3-5; 16:19, 20) Jehofa * Modimo o ne a laela Baiseraele jaana: “O se ka wa nna le medimo epe e sele kgatlhanong le sefatlhego sa me.” (Ekesodo 20:3, 23; 23:24) Fa Baiseraele ba ne ba obamela medimo e mengwe, ‘bogale jwa ga Jehofa bo ne jwa ba tukela.’Dipalo 25:3; Lefitiko 20:2; Baatlhodi 2:13, 14.

Modimo o sa ntse a ikutlwa fela jalo ka go obamela “ba ba bidiwang ‘medimo.’” (1 Bakorintha 8:5, 6; Bagalatia 4:8) O laela ba ba batlang go mo obamela go tlogela go ikopanya le ba ba obamelang medingwana, ka go re: “Jalo tswang mo gare ga bone, lo bo lo itomolole.” (2 Bakorintha 6:14-17) Goreng Modimo a ka bua jalo fa e le gore o amogela madumedi otlhe?

Karolo 2: Go obamela Modimo wa boammaaruri ka tsela e a sa e amogeleng

Ka dinako tse dingwe, Baiseraele ba ne ba obamela Modimo ba dirisa ditsela tsa go obamela medimo ya maaka, mme Jehofa o ne a gana gore kobamelo ya boammaaruri e kopanngwe le ya maaka. (Ekesodo 32:8; Duteronome 12:2-4) Jesu o ne a kgala baeteledipele ba bodumedi ka tsela e ba neng ba obamela Modimo ka yone; ba ne ba itira e kete ba rata Modimo mme e ne e le baitimokanyi ba ba neng ba “itlhokomolositse dilo tse di bokete segolo tsa Molao, e leng, tshiamiso le kutlwelobotlhoko le boikanyegi.”—Mathaio 23:23.

Ka tsela e e tshwanang, gompieno Modimo o amogela fela kobamelo e e theilweng mo boammaaruring. Boammaaruri joo bo fitlhelwa mo Baebeleng. (Johane 4:24; 17:17; 2 Timotheo 3:16, 17) Tota madumedi a dithuto tsa one di leng kgatlhanong le Baebele a katosetsa batho kgakala le Modimo. Dithuto tse dintsi tse batho ba akanyang gore di tswa mo Baebeleng, tse di jaaka, modimo rara modimo morwa modimo moya o o boitshepo, moya ga o swe le dihele, di tswa mo bathong ba ba neng ba obamela medimo ya maaka. Go dumela dilo tseno ke “lefela” kgotsa ga go na mosola wa sepe, ka gonne di emisetsa melao ya Modimo ka dingwao tsa bodumedi.—Mareko 7:7, 8.

Modimo o tlhoile boitimokanyo. (Tito 1:16) Gore batho ba kgone go atamalana le Modimo, bodumedi bo tshwanetse go ama tsela e ba tshelang ka yone mme e se ka ya nna meetlo fela. Ka sekai, Baebele ya re: “Fa motho mongwe a ipona a le moobamedi kafa mokgweng le fa go ntse jalo a sa laole loleme lwa gagwe, mme a tswelela a tsietsa pelo ya gagwe, mofuta wa kobamelo wa motho yono ga o na mosola. Mofuta wa kobamelo o o phepa le o o sa leswafalang go ya ka pono ya Modimo wa rona le Rara ke ono: go tlhokomela masiela le batlholagadi mo pitlaganong ya bone, le motho go ipoloka a se na selabe se se tswang mo lefatsheng.” (Jakobe 1:26, 27) Baebele e e Boitshepo e bitsa kobamelo e e phepa e e senang boitimokanyo e re ke “tumelo e e itshekileng.”