Fetela kwa tshedimosetsong

A Lefatshe le Tlile go Senngwa?

A Lefatshe le Tlile go Senngwa?

Karabo ya Baebele

Nnyaa, lefatshe ga le na go senngwa ka molelo kgotsa go emisediwa ka polanete e nngwe. Baebele ya re Modimo o dirile lefatshe gore batho ba nnele ruri mo go lone.

  • “Basiami ba tla rua lefatshe, mme ba tla aga mo go lone ka bosakhutleng.”—Pesalema 37:29.

  • “[Modimo] o thaile lefatshe mo mafelong a lone a a tlhomameng; ga le kitla le reketlisiwa ka bosakhutleng, kgotsa ka bosaengkae.”—Pesalema 104:5.

  • “Lefatshe le eme ka bosakhutleng.”—Moreri 1:4.

  • “Mmopi wa lefatshe le Modiri wa lone, Ene yo o le tlhomamisitseng thata, yo o sa le bopelang lefela, yo o le bopetseng go nniwa.”—Isaia 45:18.

A batho ba tla senya lefatshe?

Modimo ga a na go letla batho ba senya lefatshe ka go le kgotlela, ka dintwa kgotsa ka sepe fela. Go na le moo, o tla “senya ba ba senyang lefatshe.” (Tshenolo 11:18) O tla dira seo jang?

Modimo o tla fedisa dipuso tsa batho tse di paletsweng ke go tlhokomela lefatshe a bo a tlhoma Bogosi jwa gagwe. (Daniele 2:44; Mathaio 6:9, 10) Kgosi ya Bogosi joo e tla nna Morwawe e bong Jesu Keresete. (Isaia 9:6, 7) Fa Jesu a ne a le mo lefatsheng, o ne a bontsha gore o na le maatla a go laola dilo tsa tlholego. (Mareko 4:35-41) Fa Jesu a busa o tla laola lefatshe le dilo tsotlhe tse di mo go lone. O tla dira gore lefatshe le nne jaaka le ne le ntse kwa tshimong ya Edene.—Mathaio 19:28; Luke 23:43.

A Baebele ga e re lefatshe le tla jewa ka molelo?

Nnyaa. Batho ba akanya jalo ka gonne ba buisiwa ke go bona mafoko a a mo go 2 Petere 3:7 e e reng: “Magodimo le lefatshe tse di gone jaanong di boloketswe molelo.” Go na le dintlha tse pedi tsa botlhokwa tse di re thusang go tlhaloganya gore mafoko ao a kayang:

  1. Mo Baebeleng, mafoko a a reng “magodimo,” “lefatshe” le “molelo” a kaya dilo tse di farologaneng. Ka sekai Genesise 11:1 ya re “lefatshe lotlhe la tswelela le na le puo e le nngwe fela.” Mo temaneng eno “lefatshe” le kaya batho.

  2. Ditemana tse di tlang pele ga 2 Petere 3:7 di re thusa go tlhaloganya gore magodimo, lefatshe le molelo tse go buiwang ka tsone di kayang. Temana 5 le 6 di dira sekai ka Morwalela wa ga Noa ka gonne ka nako eo, “lefatshe” le le ileng la senngwa, e ne e se polanete ya rona, go na le moo, e ne e le batho ba ba bosula. (Genesise 6:11) Gape Morwalela oo o ile wa senya “magodimo,” e leng batho ba ba bosula ba ba neng ba busa lefatshe ka nako eo. Ka jalo, go sentswe batho ba ba bosula e seng polanete ya rona. Noa le ba lelapa la gagwe ba ile ba falola Morwalela mme ba tswelela ba tshela mo lefatsheng.—Genesise 8:15-18.

Fela jaaka Morwalela o ile wa senya batho ba ba bosula, “molelo” o Baebele o buang ka one mo go 2 Petere 3:7 o tla senya batho ba ba bosula e seng polanete ya rona. Modimo o re solofetsa gore go tla nna le “magodimo a masha le lefatshe le lesha” mme “go tla nna tshiamo mo go tsone.” (2 Petere 3:13) “Lefatshe le lesha” le le kayang batho ba ba siameng le tla busiwa ke “magodimo a masha” a a emelang Bogosi Jwa Modimo. Bogosi joo bo tla dira gore lefatshe le nne paradaise.—Tshenolo 21:1-4.