Fetela kwa tshedimosetsong

A Jesu o Swetse mo Sefapaanong?

A Jesu o Swetse mo Sefapaanong?

Karabo ya Baebele

Batho ba le bantsi ba tsaya sefapaano e le letshwao le le tlwaelegileng thata la Bokeresete. Le fa go ntse jalo, Baebele ga e tlhalose selo se Jesu a bolaetsweng mo go sone, ka jalo ga go na ope yo o ka tlhomamisang gore se ne se ntse jang. Mme gone, Baebele e re naya bosupi jwa gore Jesu ga a swela mo sefapaanong mme o swetse mo koteng e e tlhamaletseng.

Gantsi Baebele e dirisa lefoko la Segerika e leng stau·rosʹ fa e bua ka selo se Jesu a bolaetsweng mo go sone. (Mathaio 27:40; Johane 19:17) Le fa gantsi baranodi ba ranola lefoko leno e le “sefapaano,” baithuti ba le bantsi ba Baebele ba dumela gore go tswa kwa tshimologong lefoko leno le kaya “kota e e tlhamaletseng.” * Go ya ka A Critical Lexicon and Concordance to the English and Greek New Testament, lefoko stau·rosʹ “ga le kaye magong a mabedi a a fapaantsweng.”

Gape Baebele e dirisa lefoko la Segerika e leng xyʹlon e le lekaelagongwe la lefoko stau·rosʹ. (Ditiro 5:30; 1 Petere 2:24) Lefoko leno le kaya “logong,” “kota” kgotsa “setlhare.” * Ka jalo, The Companion Bible e bolela jaana: “Ga go na sepe mo Segerikeng sa [Tesetamente e Ntšha] se se bontshang gore go ne go dirisitswe magong a mabedi a a fapaantsweng.”

A Modimo o amogela kobamelo e go dirisiwang sefapaano mo go yone?

Crux simplex—lereo la Selatine le le kayang kota e le nngwe e sekebekwa se bapolelwang mo go yone

Le fa Jesu a ka tswa a bolaetswe mo go eng, dintlha tse di latelang le ditemana tsa Baebele di bontsha gore ga re a tshwanela go dirisa sefapaano mo kobamelong.

  1. Modimo ga a amogele kobamelo e go dirisiwang ditshwantsho kgotsa matshwao mo go yone, go akaretsa le sefapaano. Modimo o ne a laela Baiseraele gore ba se ka ba dirisa “popego ya setshwantsho sepe” mo kobamelong ya bone mme Bakeresete le bone ba bolelelwa gore ba ‘tshabe kobamelo ya medingwana.’—Duteronome 4:15-19; 1 Bakorintha 10:14.

  2. Bakeresete ba lekgolo la ntlha la dingwaga ba ne ba sa dirise sefapaano mo kobamelong ya bone. * Bakeresete botlhe ba tshwanetse go latela dithuto tsa baaposetoloi le go etsa sekao sa bone.—2 Bathesalonika 2:15.

  3. Go dirisiwa ga sefapaano mo kobamelong go simologile mo bathong ba ba sa obameleng Modimo. * Makgolo a dingwaga morago ga loso lwa ga Jesu, fa dikereke di ne di sa latele dithuto tsa gagwe, maloko a masha a kereke a ne a “letlelelwa go tswelela a dirisa ditshwantsho le matshwao a one a boheitane,” go akaretsa le sefapaano. (The Expanded Vine’s Expository Dictionary of New Testament Words) Le fa go ntse jalo, Baebele ga e kgothaletse gore go dirwe barutwa ba basha ka go letlelela batho go dirisa matshwao a boheitane.—2 Bakorintha 6:17.

^ ser. 4 Bona New Bible Dictionary, Kgatiso ya Boraro, ya ga D. R. W. Wood, tsebe 245; Theological Dictionary of the New Testament, Bolumo VII, tsebe 572; The International Standard Bible Encyclopedia, Kgatiso e e Tokafaditsweng, Bolumo 1, tsebe 825; le The Imperial Bible-Dictionary, Bolumo II, tsebe 84.

^ ser. 5 Bona The Expanded Vine’s Expository Dictionary of New Testament Words, tsebe 1165; A Greek-English Lexicon, ya ga Liddell le Scott, Kgatiso ya Borobongwe, tsebe 1191-1192; le Theological Dictionary of the New Testament, Bolumo V, tsebe 37.

^ ser. 9 Bona Encyclopædia Britannica, 2003, mo setlhogong sa “Cross”; The Cross—Its History and Symbolism, tsebe 40; le The Companion Bible, Oxford University Press, appendix 162, tsebe 186.

^ ser. 10 Bona The Encyclopedia of Religion, Bolumo 4, tsebe 165; The Encyclopedia Americana, Bolumo 8, tsebe 246; le Symbols Around Us, tsebe 205-207.