Fetela kwa tshedimosetsong

Nka Dirang go Tokafatsa Maduo A me A Sekolo?

Nka Dirang go Tokafatsa Maduo A me A Sekolo?

Se o ka se dirang

Akanya dilo tse di molemo! O se ka wa itsenya mo kotsing ya go retelelwa ka go akanya gore ga o ka ke wa kgona go tokafatsa. Fa o faraferwe ke dikakanyo tsa go nyatsa bokgoni jwa gago, di emisetse ka tse di molemo. Ka sekai, fa batho (gongwe kwantle ga lebaka) ba ne ba kgala moaposetoloi Paulo ba re ga a na bokgoni jwa go bua, o ne a araba jaana: “Le fa ke se setswerere mo puong, eleruri ga ke a nna jalo mo kitsong.” (2 Bakorintha 10:10; 11:6) Paulo o ne a itse makoa a gagwe. Mme gape o ne a itse dilo tse a di kgonang. Go tweng ka wena? O na le bokgoni mo dilong dife? Fa o sa kgone go akanya ka dipe, ke eng fa o sa botse mogolo mongwe yo o go emeng nokeng? Tsala e e ntseng jalo e ka go thusa go lemoga le go tokafatsa dilo tse o nang le bokgoni mo go tsone.

Nna le mekgwa e e molemo ya go ithuta. O ka se atlege fela kwa sekolong o sa dire sepe. Ga go ka tsela e nngwe, o tshwanetse go ithuta. Gone ke boammaaruri gore mafoko ao ka boone fela a ka nna a se utlwale a le monate. Le fa go ntse jalo, go ithuta go mosola. E bile tota, fa o dira maiteko, o ka go itumelela. Mme fa o batla go nna le mekgwa e e molemo ya go ithuta, o tla tshwanelwa ke go rulaganya nako ya gago. Gakologelwa—go ithuta go tshwanetse ga tla pele. Ke boammaaruri gore Baebele ya re go na le “nako ya go tshega” le “nako ya go tlolaka.” (Moreri 3:1, 4; 11:9) Ka jalo, fela jaaka bontsi jwa basha, o ka tswa o batla go nna le nako ya go itlosa bodutu. Mme Moreri 11:4 e tlhagisa jaana: “Yo o lebeletseng phefo ga a na go jala peo; mme yo o lebileng maru ga a na go roba.” O ithuta eng foo? O se ka wa nnela go re ‘ke tla.’ O ka se kgone go fetsa tiro ya botlhokwa. Ithute pele, o tla tshameka morago. O se ka wa tshwenyega—o ka kgona go bona nako ya go di dira tsoopedi!

Fela jaaka go kuka ditshipi go ka aga mesifa, mekgwa e e molemo ya go ithuta e ka tokafatsa maduo a gago kwa sekolong.