Fetela kwa tshedimosetsong

BASHA BA BOTSA JAANA

A go Kotsi go Dirisa Dilo Tse di Amanang le Madimona?

A go Kotsi go Dirisa Dilo Tse di Amanang le Madimona?

Wena o akanyang?

  • A go kotsi go dirisa di-horoscope, boto ya wiji (Ouija) kgotsa go kopa thuso mo bathong ba go tweng ba kgona go go bolelela gore go tla diregang mo nakong e e tlang?

  • A go leba ditori tse di buang ka dilo tseno go siame fela kgotsa a go na le kotsi nngwe e re tlhokang go e ela tlhoko?

Re tlile go thusiwa go bona gore ke eng batho ba rata dilo tseno le gore goreng re tlhoka go nna kelotlhoko ka tsone.

 Goreng batho ba di rata?

Dilo tseno di bontshiwa thata mo difiliming, mo mananeong a thelebishene, mo metshamekong ya dibidio le mo dibukeng mme batho ba teng ba dira madi a mantsi tota. Seo se dirile gore basha ba le bantsi ba simolole go kgatlhegela dilo tse di jaaka di-horoscope, madimona, di-vampire le boloi. Mme ba ka tswa ba dira jalo ka ntlha ya mabaka a a latelang:

  • Ba batla go itse gore a ruri go na le madimona le baengele.

  • Ba tshwenyegile gore go tlile go diragalang mo nakong e e tlang.

  • Ba batla go leka go bua le batho ba ba tlhokafetseng.

Mabaka a bone a ka tswa a se phoso. Ka sekai, ga go phoso go batla go itse gore go tla diragalang mo nakong e e tlang kgotsa go gopola motho yo o tlhokafetseng. Mme go na le dilo tse di kotsi tse o tlhokang go di ela tlhoko.

 Goreng o tlhoka go nna kelotlhoko?

Baebele e re tlhagisa gore re nne kelotlhoko thata mo dilong tse di tsamaisanang le bodimona. Ka sekai, ya re:

“Go se ka ga fitlhelwa mo go wena ope yo o . . . dirisang boitseanape, yo o dirang maselamose kgotsa ope yo o batlang ditshupo dipe kgotsa moloi, kgotsa yo o dirisang lefoko la maselamose go kolopa ba bangwe kgotsa ope yo o lopang kgakololo mo go yo o buang le meya kgotsa yo o dirang tiro ya go bolelela ditiragalo pele kgotsa ope yo o botsang baswi. Gonne mongwe le mongwe yo o dirang dilo tseno o makgapha mo go Jehofa, mme Jehofa Modimo wa gago o ba leleka fa pele ga gago ka ntlha ya dilo tse di makgapha tseno.”—Duteronome 18:10-12.

Goreng Baebele e re kgalemelela dilo tseno?

  • Fa re di dira, re dirisana le madimona. Baebele ya re baengele bangwe ba ile ba tlhanogela Modimo ba bo ba nna baba ba gagwe. (Genesise 6:2; Jude 6) Baengele bano ba ba bidiwang madimona ba tsietsa batho ba dirisa batho ba go tweng ba kgona go bua le batho ba ba suleng, ba go tweng ba kgona go go bolelela gore go tlile go diregang mo nakong e e tlang le baloi. Fa re dirisa dilo tseno, re tla nna baba ba Modimo.

  • Bodimona bo dira gore batho ba tseye gore go na le batho ba ba itseng gore go tla diragalang mo nakong e e tlang. Mme mo Baebeleng, Modimo a re ke ene fela a kgonang go ‘bolela bokhutlo go tswa kwa tshimologong, le dilo tse di iseng di dirwe go tswa bogologolong.’—Isaia 46:10; Jakobe 4:13, 14.

  • Bodimona bo dira gore batho ba dumele gore batho ba ba suleng ba kgona go bua le ba ba tshelang. Mme Baebele ya re: “Baswi . . . ga ba itse sepe gotlhelele, le gone . . . ga go na tiro le fa e le go loga maano le fa e le kitso le fa e le botlhale kwa Sheole [kgotsa Lebitla], lefelo le o yang kwa go lone.”—Moreri 9:5, 10.

Ke ka moo Basupi ba ga Jehofa ba sa dirisaneng le dilo tse di tsamaisanang le bodimona. Gape ga ba bale dibuka le go leba difilimi tse di buang ka dilo tse di jaaka di-zombi, di-vampire le dipoko. Maria a re: “Fa e le gore [filimi] e na le bodimonanyana, ga ke a tshwanela go e sheba.” *

Fela jaaka sekebekwa se ka dira gore o akanye gore ga se kitla se go tsietsa, madimona le one a ka itira ba masika a gago ba ba tlhokafetseng

 Se o ka se dirang

  • Ipolelele gore wena ga o kitla o dira dilo tse Jehofa a sa di batleng.—Ditiro 24:16.

  • Latlha sengwe le sengwe se o nang le sone se se tsamaisanang le bodimona. Bala Ditiro 19:19, 20 mme o bone se Bakeresete ba bogologolo ba ileng ba se dira.

Gopola gore fa o sa itlose bodutu ka dilo tse di tsamaisanang le madimona, o bontsha gore o mo letlhakoreng la ga Jehofa. Mme seo se dira gore Jehofa a itumele.—Diane 27:11.

^ ser. 24 Seo ga se reye gore difilimi tsotlhe di rotloetsa bodimona ka tlhamalalo. Mme Bakeresete ba reetsa matswalo a bone a ba a katisitseng ka Baebele go tila go itlosa bodutu ka dilo tse di tsamaisanang le bodimona.—2 Bakorintha 6:17; Bahebera 5:14.