Fetela kwa tshedimosetsong

Ke Direng fa ke Kgothalediwa go Tlhakanela Dikobo?

Ke Direng fa ke Kgothalediwa go Tlhakanela Dikobo?

O ka nna wa botsa jaana: “A go botoka go ineela?” “Akere mongwe le mongwe o a go dira?”

Ema pele mme o akanye!

Boammaaruri: Ga se gore mongwe le mongwe o a go dira.

Ke boammaaruri gore o ka bala ka dipalo tse di kwa godimo tsa basha ba ba go dirang. Ka sekai, patlisiso nngwe kwa United States e ne ya senola gore fa bana ba kwa nageng eo ba fetsa sekolo se segolwane, ba le 2 mo go ba le 3 ba bone ba a bo ba setse ba simolotse go tlhakanela dikobo. Mme gape seo se kaya gore a le 1 mo go ba le 3–e leng palo e e kgolo—ga ba ise ba go simolole.

Go tweng ka ba ba setseng ba go simolotse? Babatlisisi ba fitlhetse gore bontsi jwa basha bano ba diragalelwa ke a le mangwe kgotsa go feta a manokonoko a a latelang.

Go ngomoga pelo. Bontsi jwa basha ba ba ileng ba tlhakanela dikobo pele ga lenyalo ba re ba ile ba go ikwatlhaela morago.

Go tlhakanela dikobo pele ga lenyalo go tshwana le go tsaya setshwantsho se sentle se se takilweng o bo o se dirisetsa go itshutlha dinao

Go se tshepe. Morago ga tlhakanelodikobo, molekane mongwe le mongwe o simolola go ipotsa jaana ka yo mongwe, ‘Motho yono o tlhakanetse dikobo le mang gape?’

Go swabisiwa. Tota basetsana ba le bantsi ba ka tlhopha go nna le mongwe yo o tla ba sireletsang, e seng yo o tla ba dirisang. Mme basimane ba le bantsi ba ikutlwa ba sa tlhole ba kgatlhegela mosetsana yo o neng a ineela go tlhakanela dikobo le bone.

Sa botlhokwa: Mmele wa gago o botlhokwa thata gore o ka o aba fela. Bontsha gore o ikemiseditse go dira se se siameng ka go ikobela melao ya Modimo e e thibelang tlhakanelodikobo pele ga lenyalo. Mme letsatsi lengwe fa o setse o le mo lenyalong, o ka tlhakanela dikobo. Mme o tla go itumelela ka botlalo—o sa tshwenyege, o sa ikwatlhaye e bile o sa ikutlwe o sa sireletsega jaaka gantsi go nna fa o sena go tlhakanela dikobo pele ga lenyalo.—Diane 7:22, 23; 1 Bakorintha 7:3.