Fetela kwa tshedimosetsong

BASHA BA BOTSA JAANA

Goreng ke Tlhoka go ya Kwa Holong ya Bogosi?

Goreng ke Tlhoka go ya Kwa Holong ya Bogosi?

Basupi ba ga Jehofa ba kopana gabedi mo bekeng kwa mafelong a a bidiwang Diholo Tsa Bogosi. Go diragalang kwa diholong tseo e bile go ya teng go ka go thusa jang?

 Go diragalang kwa Holong ya Bogosi?

Kwa Holong ya Bogosi o ka ithuta dilo tsa botlhokwa tse di mo Baebeleng. Go ya teng go ka go thusa go:

  • ithuta ka Modimo.

  • tlhaloganya dilo tse di diregang mo lefatsheng.

  • nna motho yo o botoka.

  •  kopana le ditsala tsa nnete.

A o ne o itse gore, lefelo le Basupi ba ga Jehofa ba kopanang kwa go lone le bidiwa Holo ya Bogosi ka gonne selo se go buiwang thata ka sone ke Bogosi Jwa Modimo?—Mathaio 6:9, 10; 24:14; Luke 4:43.

 Goreng o tlhoka go ya teng?

Dilo tse o di ithutang di tla go thusa. Melao ya Baebele e o ithutang yone kwa Holong ya Bogosi e tla go thusa go “bapala botlhale.” (Diane 4:5) Seo se raya gore Baebele e tla kgona go go thusa go dira ditshwetso tse di siameng. Gape Baebele e ka go thusa go bona dikarabo tsa dipotso tsa botlhokwa tse di jaaka:

Tseno ke dingwe tsa ditlhogo tse go buiwang ka tsone Sontaga mongwe le mongwe:

  • Ke Eng fa re Tshwanetse go Kaelwa ke Baebele?

  • O ka Bona Kae Thuso ka Dinako Tsa Mathata?

  • Se Bogosi Jwa Modimo bo re Direlang Sone Gone Jaanong.

“Mongwe wa bana ba ke tsenang sekolo le bone o ile a tla kwa Holong ya Bogosi. O ile a dula le rona mme ra leba le ene mo dibukeng tsa rona. Fa re tsamaya, o ile a mpolelela gore o kgatlhilwe ke tsela e batho ba neng ba tlhalosa dintlha ka yone. A re kwa kerekeng ya bone ga ba ithute Baebele jaaka rona.”—Brenda.

A o ne o itse gore, kwa Holong ya Bogosi ga o duele go nna mo setulong e bile ga go tsewe dikoleke?

O tla kopana le batho ba ba go kgothatsang. Baebele ya re lengwe la mabaka a go bo Bakeresete ba tshwanetse go kopana mmogo ke gore ba kgone go “kgothatsana.” (Bahebera 10:24, 25) Go monate go nna le batho ba ba tlotlang Modimo e bile ba akanyetsa ba bangwe go na le go ikakanyetsa ba le bosi fela.

“Le fa ke tle ke ikutlwe ke nyemile moko kgotsa ke feletswe ke maatla, batho ba ke kopanang le bone kwa Holong ya Bogosi ba dira gore ke ikutlwe botoka. Fa re le mo tseleng re boela gae, ke itumetse e bile e bile ke ikutlwa ke lapologetswe.”—Elisa.

A o ne o itse gore, go na le diphuthego tsa Basupi ba ga Jehofa di feta 120 000 mo lefatsheng lotlhe le gore ba kopana mo mafelong a a fetang 60 000? Ngwana le ngwaga go agiwa Diholo Tsa Bogosi di ka nna 1 500 gore batho ba kgone go kopanela mo go tsone. *

^ ser. 20 Fa o batla go bona lefelo le le gaufi le wena, tobetsa karolo e e reng “Dipokano Tsa Phuthego Tsa Basupi ba ga Jehofa” o bo o tobetsa karolo e e reng “Batla Lefelo le le Gaufi le Wena.”