Fetela kwa tshedimosetsong

Ke Direng fa ke Jewa ke Bodutu?

Ke Direng fa ke Jewa ke Bodutu?

Se o ka se dirang

1. Akanya thata ka dilo tse o kgonang go di dira. (2 Bakorintha 11:6) Le fa gone go le molemo go itse makoa a gago, gape go na le dilo tse dintsi tse o di kgonang. Go lemoga bokgoni jwa gago go tla dira gore o kgone go itshepa mme o tlogele go itseela kwa tlase o bo o fenya bodutu. Ipotse jaana, ‘Dilo tse ke di kgonang ke dife?’ Akanya ka dingwe tsa ditalenta kgotsa dinonofo tse di molemo tse o nang le tsone.

2. Bontsha ba bangwe gore o ba kgatlhegela go tswa pelong. Simolola ka go bontsha batho ba se kae fela gore o a ba kgatlhegela. Mosha mongwe yo o bidiwang Jorge a re: “Go botsa fela ba bangwe gore ba ntse ba tswelela jang kana go ba botsa ka tiro ya bone go go thusa go ba itse botoka.

O ka aga borogo jo bo tla go kopanyang le balekane ba gago

Ntlha e e ka thusang: O se ka wa tsalana fela le dithaka tsa gago. Bangwe ba ditsala tse di neng di atamalane thata tse go kwadilweng ka tsone mo Baebeleng e ne e le batho ba ba neng ba sa lekane gotlhelele, jaaka Ruthe le Naomi, Dafide le Jonathane le Timotheo le Paulo. (Ruthe 1:16, 17; 1 Samuele 18:1; 1 Bakorintha 4:17) Gakologelwa gape gore motlotlo ke wa batho ba babedi, ga go bue motho a le mongwe fela. Batho ba itumelela go tlotla le batho ba ba ba reetsang. Ka jalo, fa e le gore o ditlhong, gakologelwa—ga o tlhoke go nna wena fela o buang mo motlotlong!

3. “Utlwela ba bangwe botlhoko.(1 Petere 3:8) Tota le fa o sa dumalane le tsela e mongwe a lebang dilo ka yone, nna pelotelele mme o mo letle gore a bue. Tlhoma mogopolo mo dilong tse lo dumalanang ka tsone. Fa o akanya gore o tshwanetse go tlhalosa gore ga o dumalane le kgang nngwe, dira jalo ka moya wa bonolo le go akanyetsa maikutlo a yo mongwe.

Ntlha e e ka thusang: Bua le ba bangwe ka tsela e o ka ratang batho ba bua le wena ka yone. Go nna manganga go sa tlhokege le go rumolana, go tlhapatsa le go kgala ba bangwe ka go itira botoka go dira fela gore ba se ka ba atamalana le wena. Ba ka go rata thata fa o dira gore ‘puo ya gago ka metlha e nne ya bopelontle.’—Bakolosa 4:6.