Fetela kwa tshedimosetsong

DIPOTSO TSE BASHA BA DI BOTSANG

Ke Direng Fa ke Sa Tshwane le Batho ba Bangwe?

Ke Direng Fa ke Sa Tshwane le Batho ba Bangwe?

“Fa o sa tshwane le batho ba bangwe, ga o kitla o nna le ditsala, ga o kitla o tshela monate e bile ga o na bokamoso. Ga go na ope yo o tla go ratang.”—Carl.

A mosha yono o feteletsa dilo? Go ka tswa go le jalo. Mme gone, batho ba le bantsi ba ka dira sengwe le sengwe fela gore ba se ka ba iphitlhela ba le mo seemong se se tlhalosiwang ke Carl. A go ntse jalo le ka wena? Setlhogo seno se tla go thusa go bona gore ke eng se o ka se dirang gore o nne le ditsala.

 Ke eng fa batho ba batla go tshwana le ba bangwe?

  • Ga ba batle go nna matlhaodi. “Nako nngwe ke ne ka bona dinepe tsa ditsala tsa me ba ile go ijesa monate mme ba ne ba sa ntaletsa. Ke ne ke ipotsa gore kante ke ba dirileng. Ke ne ke tsaya gore ga ba nthate.”—Natalie.

    SE O KA AKANYANG KA SONE: A o kile wa ikutlwa e kete dithaka tsa gago ga di go rate kgotsa ga di batle go nna tsala ya gago? A o ne wa dira sengwe gore ba kgone go go rata? O ile wa dira eng?

  • Ba batla go tshwana le ba bangwe. “Batsadi ba me ga ba batle ke nna le founu. Fa bana ba bangwe ba kopa gore ke ba fe dinomoro tsa me ke bo ke re ga ke na founu, ba tlhola ba re: ‘Wa reng? E le gore o na le dingwaga di le kae?’ Fa ke ba bolelela gore ke na le dingwaga di le 13, ba gakgamala tota go bo ke se na founu.”—Mary.

    SE O KA AKANYANG KA SONE: Ke melao efe e batsadi ba gago ba go beetseng yone e e ka dirang gore o se ka wa tshwana le dithaka tsa gago? O ikutlwa jang ka melao eo?

  • Ga ba batle go kgerisiwa. “Bana ba kwa sekolong ga ba rate bana ba ba sa direng dilo tse bone ba di dirang. Fa o sa dire dilo tse ba di dirang, ba a go kgerisa.”—Olivia.

    SE O KA AKANYANG KA SONE: A o kile wa kgerisiwa ka gonne o sa dire dilo tse dithaka tsa gago di di dirang? O ile wa ikutlwa jang?

  • Ga ba batle ditsala tsa bone di ba tlhanogela. “Ke ne ke leka go tshwana le dithaka tsa me. Ke ne ke bua jaaka bone, e bile ke ne ke tlhola ke tshega le fa metlae ya bone e sa tshegise. Fa ba tshega ka mongwe, le nna ke ne ke tshega le fa gone ke itse gore motho yoo o tlile go utlwa botlhoko.”—Rachel.

    SE O KA AKANYANG KA SONE: Go botlhokwa go le kae mo go wena gore dithaka tsa gago di go rate? A o kile wa fetola tsela e o buang kgotsa e o itshwarang ka yone e le fela gore dithaka tsa gago di go rate?

 Se o tshwanetseng go se itse

  • Go leka go tshwana le ba bangwe go ka go bakela mathata. Jang? Ka gonne ba ka nna ba lemoga gore o leka go ba etsa. Brian yo o nang le dingwaga di le 20 a re: “Fa ke leka go etsa bana ba ke tsenang sekolo le bone, seo se dira gore ba se ka ba batla go nna ditsala tsa me. Ke ne ka lemoga gore batho ba a go bona fa o leka go itira se o seng sone.”

    SE O KA SE DIRANG: Akanya ka dilo tse di botlhokwa thata mo go wena. Baebele ya re: ‘Tlhomamisa dilo tse di botlhokwa thata.’ (Bafilipi 1:10) Ka jalo, ipotse jaana: ‘Ke eng se se botlhokwa thata mo go nna? A ke go leka go tshwana le batho ba ba sa tsheleng ka melao ya Modimo kgotsa ke go itshwara sentle?’

    “Go leka go tshwana le ba bangwe ga go thuse. Batho bao ga ba kitla ba go rata e bile go dira jalo ga go kitla go dira gore o itumele.”—James.

  • Go leka go tshwana le ba bangwe go ka fetola botho jwa gago. Go ka dira gore o nne fela o dira se ba bangwe ba batlang gore o se dire. Jeremy a re: “Ke ne ke tlhola ke dira sengwe le sengwe fela se dithaka tsa me di se dirang, tota le dilo tse di tlhabisang ditlhong. Ke ne ke ba letla gore ba ntaole.”

    SE O KA SE DIRANG: Tshela go ya ka melao ya Modimo. O se ka wa nna jaaka lebodu le le nnang le fetofetola mebala. Baebele ya re: “O se ka wa dira selo fela ka gonne ba bangwe ba se dira.”—Ekesodo 23:2. Holy Bible—Easy-to-Read Version.

    Ke ne ke itira e kete ke rata dilo tse ba di ratang, mmino, metshameko, diaparo le makeup . . . Ke ne ke leka go nna jaaka bone. Mme gone, ba ne ba kgona go lemoga gore tota ga ke rate dilo tseo. Le nna ke ne ke itse gore ga se gore ke a di rata. Ke ne ke nna fela ke utlwile botlhoko. Ke ne ke sa tlhole ke itse gore tota ke nna mang. Ke ne ka ithuta gore ga se gore mongwe le mongwe fela yo o kopanang le ene o tla tshwana le wena kgotsa o tla go rata. Nna pelotelele mme o gopole gore go tsaya nako go nna le ditsala tsa mmatota e bile go tsaya nako go gola.”—Melinda.

  • Fa o leka go tshwana le ba bangwe, o ka feleletsa o dira dilo tse di sa siamang. Chris a re: “Ntsale o ne a simolola go dira dilo tse di sa siamang gore a tshwane le dithaka tsa gagwe. O ne a simolola go dirisa diritibatsi. O ne a feleletsa a di rata thata mme seo se batlile se mo senyetsa botshelo.”

    SE O KA SE DIRANG: O se ka wa tlwaelana le batho ba ba dirang dilo tse di sa siamang. Baebele ya re: “Yo o tsamayang le batho ba ba botlhale o tla nna botlhale, mme yo o dirisanang le dimatla dilo ga di na go mo tsamaela sentle.”—Diane 13:20.

    “Gone go ga go phoso go leka go nna le ditsala. Mme gone ga o a tshwanela go dira dilo tse di sa siamang e le fela gore o kgatlhe ditsala tsa gago. Ditsala tse di siameng ke batho ba ba sa go tlhotlheletseng gore o dire dilo tse di sa siamang.”—Melanie.

    Leka seno: Fa o leka go itirela ditsala, o se ka wa batla fela batho ba ba ratang dilo tse o di ratang. Batla batho ba ba tshelang go ya ka melao ya Modimo le ba ba itshwarang sentle.

    Diaparo dingwe di ka se go tshwanele. Ka tsela e e tshwanang, batho bangwe ba ka se go thuse gore o itshware sentle