Fetela kwa tshedimosetsong

Fetela go diteng

 SETLHOGO SA KA FA NTLE | A GO BOTLHOKWA GO RAPELA?

Goreng Modimo a Batla Gore re mo Rapele?

Goreng Modimo a Batla Gore re mo Rapele?

Modimo o batla re nna ditsala tsa gagwe.

Ditsala di a tlotla gore di nne le kamano e e molemo. Ka tsela e e tshwanang, Modimo o batla gore re bue le ene, re nne ditsala tse di atamalaneng le ene. A re: “Lo tla mpitsa lo bo lo tla go nthapela, ke tla lo reetsa.” (Jeremia 29:12) Fa o bua le Modimo, o tla mo ‘atamela mme o tla go atamela.’ (Jakobe 4:8) Baebele e re tlhomamisetsa jaana: “Jehofa o gaufi le botlhe ba ba mmitsang.” (Pesalema 145:18) Fa re nna re rapela, kamano ya rona le Modimo e tla gola.

“Jehofa o gaufi le botlhe ba ba mmitsang.”—Pesalema 145:18

Modimo o batla go go thusa.

Jesu o ne a re: “Ke mang mo go lona yo fa morwawe a mo kopa senkgwe—ga a na go mo naya leje, ga ke re? Kgotsa, gongwe, o tla kopa tlhapi—ga a na go mo naya noga, ga ke re? Jalo, fa lona . . . lo itse kafa lo ka nayang bana ba lona dimpho tse di molemo ka gone, a bo Rraalona yo o kwa magodimong a tla naya bogolo jang ne dilo tse di molemo ba ba mo kopang!” (Mathaio 7:9-11) Boammaaruri ke gore Modimo o batla gore o mo rapele ka gonne ‘o a go kgathalela’ e bile o batla go go thusa. (1 Petere 5:7) E bile o batla gore o mmolelele fa o na le mathata. Baebele ya re: “Lo se ka lwa tlhobaela ka sepe, mme mo go sengwe le sengwe ka thapelo le mokokotlelo mmogo le go ntshiwa ga ditebogo a dikopo tsa lona di itsisiwe Modimo.”—Bafilipi 4:6.

Batho ba na le keletso ya go atamalana le Modimo.

Baitse ba tlholego ya motho ba lemogile gore batho ba le bantsi ba tsaya go rapela go le botlhokwa. Tota le balatolamodimo bangwe le batho ba ba dumelang gore Modimo ke masaitsiweng ba bona go le botlhokwa go rapela. * Seno se bontsha gore batho ba bopilwe ba na le keletso ya go atamalana le Modimo. Jesu o ne a re: “Go itumela ba ba tshwenyegang ka se ba se tlhokang semoyeng.” (Mathaio 5:3) Tsela e le nngwe fela ya go dira seno, ke ka go bua le Modimo ka metlha.

Fa re rapela Modimo jaaka a batla re dira, re ka solegelwa molemo jang?

^ ser. 8 Ka 2012, mokgatlho wa Pew Research Center o ne wa dira patlisiso e e neng ya bontsha gore diperesente di le 11 tsa balatolamodimo kwa United States ba rapela mo e ka nnang gangwe mo kgweding.