Fetela kwa tshedimosetsong

Fetela go diteng

 Babadi Ba Botsa Jaana . . .

Boammaaruri ke Eng ka Keresemose?

Boammaaruri ke Eng ka Keresemose?

Batho ba le dimilione mo lefatsheng lotlhe ba keteka Keresemose ka mabaka a a sa tshwaneng. Bangwe ba itumelela go nna le ditsala le ba malapa mo dipakeng tseno tsa boikhutso. Ba bangwe ba akanya ka Modimo kgotsa ba dirisa nako ya bone go thusa bahumanegi. Ga go pelaelo gore ditiro tseno ka botsone di molemo. Le fa go ntse jalo, bothata ke gore di amanngwa le dilo tse di seng boammaaruri ka letsatsi leno la boikhutso.

Sa ntlha, batho ba bantsi ba ba ketekang letsatsi leno ba dumela gore Keresemose ke letsatsi la ga Jesu la botsalo. Le fa go ntse jalo, baitsehisitori ba re letlha la botsalo jwa gagwe ga le itsiwe. The Christian Book of Why ya re “Bakeresete ba bogologolo ba ne ba sa keteke letsatsi lepe e le botsalo jwa ga Jesu” ka gonne ba batla “go ikgaoganya le ditlwaelo dipe fela tsa boheitane.” Se se kgatlhang ke gore, ga go gope mo Baebele e reng Jesu o ne a keteka letsatsi la gagwe la botsalo kgotsa la motho yo mongwe. Go na le moo, o ne a laela balatedi ba gagwe gore ba gopole loso lwa gagwe.—Luke 22:19.

Sa bobedi, baithuti ba bantsi ba dumela gore dingwao tse dintsi tsa Keresemose di tswa mo madumeding a e seng a Bokeresete le mo meetlong ya boheitane. Dingwe tsa tsone di akaretsa Santa Claus, setlhare sa mistletoe le sa Keresemose, go abelana dimpho, go tshuba dikerese le ditlhatshana tsa Yule log, go kgabisa ka dikgare le go opela dipina tsa Keresemose. Fa buka ya The Externals of the Catholic Church e tlhalosa mengwe ya meetlo eno ya re: “Fa re aba kgotsa re amogela dimpho tsa Keresemose, re pega dikgare tse tala mo matlong a rona le mo dikerekeng, ke ba le bakae ba rona ba ba ka tswang ba itse gore re dira meetlo ya boheitane?”

“Fa re aba kgotsa re amogela dimpho tsa Keresemose, re pega dikgare tse tala mo matlong a rona le mo dikerekeng, ke ba le bakae ba rona ba ba ka tswang ba itse gore re dira meetlo ya boheitane?”—The Externals of the Catholic Church

Mme gone, o ka tswa o ipotsa gore ke eng se se phoso ka go dira meetlo eno e e lebegang e siame. Bona karabo mo ntlheng eno ya boraro. Modimo o kgala go kopanngwa ga dingwao tsa boheitane le kobamelo e e itshekileng. Jehofa Modimo o ne a dirisa moporofeti wa gagwe e bong Amose go bolelela baobamedi ba gagwe ba ba seng kutlo ba kwa Iseraele wa bogologolo jaana: “Ke tlhoile meletlo ya lona, ke e ganne . . . Tlosang pheretlhego ya dipina tsa lona mo go nna.”—Amose 5:21, 23.

Goreng a ne a ba kgalemela jalo? Ela tlhoko se batho ba bogosi jwa kwa bokone jwa Iseraele wa bogologolo ba neng ba se dira. Kgosi ya bone ya ntlha e bong Jeroboame o ne a tlhoma dinamane tse pedi tsa gauta mo metseng ya Dana le Bethele gore batho ba di obamele go na le go obamela Jehofa Modimo kwa tempeleng ya kwa Jerusalema. Gape kgosi e ne ya simolola meletlo ya bo ya tlhoma baperesiti gore ba thuse batho go e keteka.—1 Dikgosi 12:26-33.

Go ne go ka lebega e kete Baiseraele bao ba ne ba dira jalo ka lebaka le le utlwalang. A mme ba ne ba sa dire dilo tseno tsotlhe go obamela Modimo le go mo itumedisa? Mafoko a Modimo a neng a a bua a dirisa Amose le baporofeti ba bangwe a bontsha sentle kafa Modimo a ikutlwang ka gone ka ditlwaelo tseo. Modimo o ne a bua jaana a dirisa moporofeti Malaki: “Ke nna Jehofa; ga ke a fetoga.” (Malaki 3:6) A seno ga se re bontshe kafa Modimo a ikutlwang ka gone ka meletlo e mentsi ya Keresemose e e ketekiwang gompieno?

Fa batho ba le dimilione ba sena go sekaseka dintlha tse di fa godimo, ba ne ba swetsa ka gore ba se ka ba keteka Keresemose. Ba itumedisiwa e bile ba kgotsofadiwa ke go fetsa nako le ditsala tsa bone le ba malapa le go thusa bahumanegi ka nako epe fela mo ngwageng.