O ka nna wa botsa jaana, ‘Fa e le gore Modimo o itse sengwe le sengwe, go akaretsa le se ke se akanyang le dilo tse ke di tlhokang, ke ka ntlha yang fa ke tshwanetse go rapela?’ Eno ke potso e e botlhokwa. A Jesu ga a ka a re Modimo “o itse dilo le fa e le dife tse lo di tlhokang le pele ga lo mo kopa?” (Mathaio 6:8) Kgosi Dafide wa Iseraele wa bogologolo o ne a lemoga seno, mme o ne a kwala jaana: “Gonne ga go na lefoko lepe mo lolemeng lwa me, mme bona! wena Jehofa, o setse o le itse lotlhe fela.” (Pesalema 139:4) Ka jalo, ke ka ntlha yang fa re tshwanetse go rapela Modimo? Go araba potso eno, a re tlhatlhobe se Baebele e se buang ka dithapelo tsa baobamedi ba Modimo. *

“Atamelang Modimo, mme o tlaa lo atamela.”—Jakobe 4:8

 THAPELO E RE ATAMETSA GAUFI LE MODIMO

Le fa gone Baebele e re Jehofa * Modimo o itse sengwe le sengwe, e bontsha gape gore ga a kgatlhegele go nna fela le dintlha ka baobamedi ba gagwe. (Pesalema 139:6; Baroma 11:33) Mogopolo wa gagwe o o sa lekanyediwang ga o tshwane le wa khomputara e e bolokang tshedimosetso ka batho ba e sa itseng sepe ka bone. Tota e bile, Modimo o kgatlhegela maikutlo a rona a a kwa tengteng ka gonne o batla gore re atamalane le ene. (Pesalema 139:23, 24; Jakobe 4:8) Ke ka lone lebaka leo Jesu a neng a kgothaletsa barutwa ba gagwe gore ba rapele, le fa tota Rraagwe a itse dilo tsa botlhokwa tse re di tlhokang. (Mathaio 6:6-8) Fa re bulela Mmopi wa rona mafatlha ka metlha, re tla tswelela re atamalane le ene.

Ka dinako dingwe re ka fitlhela go le thata go itse selo sa botlhokwa se re ka se kopang mo thapelong. Mo maemong a a ntseng jalo, Modimo a ka nna a leba ka kwa ga maikutlo a rona a re sa mmolelelang one, a bo a dirisa kitso ya gagwe e e itekanetseng ka rona gore a re neye dilo tse re di tlhokang. (Baroma 8:26, 27; Baefeso 3:20) Fa re lemoga gore Modimo o re thusitse ka tsela nngwe mo botshelong, tota le fa e le ka ditsela tse di sa lemotshegeng, re ikutlwa re atamalane le ene.

A MODIMO O ARABA DITHAPELO TSOTLHE?

Baebele e re tlhomamisetsa gore Modimo Mothatayotlhe o araba dithapelo tsa batlhanka ba gagwe ba ba ikanyegang, mme gape e re naya mabaka a go bo a sa arabe dithapelo dingwe. Ka sekai, ka nako ya fa thubakanyo e ne e aname kwa Iseraele wa bogologolo, Modimo o ne a tlhotlheletsa moporofeti wa gagwe Isaia gore a bolelele batho jaana: “Le fa lo dira dithapelo tse dintsi, ga ke a reetsa; diatla tsa lona di tletse tshololo ya madi.” (Isaia 1:15) Go a utlwala gore, batho ba ba nyatsang molao wa Modimo kgotsa ba ba nang le maitlhomo a a sa siamang ba ka se solofele gore Modimo a ba reetse.—Diane 28:9; Jakobe 4:3.

Ka fa letlhakoreng le lengwe, Baebele ya re: “Go sa kgathalesege gore ke eng se re se kopang kafa thatong ya gagwe, o a re utlwa.” (1 Johane 5:14) Le fa go ntse jalo, a seno se kaya gore Modimo o tla naya baobamedi ba gagwe sengwe le sengwe se ba se kopang? Nnyaa. Akanya ka moaposetoloi Paulo, yo o neng a kopa Modimo gararo gore a mo ntshe “mutlwa mo nameng.” (2 Bakorintha 12:7, 8) Gongwe Paulo a ka tswa a ne a tshwenngwa ke bokoa jwa matlho jo bo sa foleng. Maemo ano a tshwanetse a bo a ne a mo ngomola pelo tota! Paulo o ne a neilwe mpho ya go fodisa le go tsosa batho ka kgakgamatso, le fa go ntse jalo, o ne a tshwanelwa ke go itshokela bolwetse jwa gagwe. (Ditiro 19:11, 12; 20:9, 10) Le fa gone dithapelo tsa gagwe di sa arabiwa ka tsela e a neng a e lebeletse, Paulo o ne a amogela karabo ya Modimo ka kanaanelo.—2 Bakorintha 12:9, 10.

“Eno ke tshepo e re nang le yone mo go ene, gore, go sa kgathalesege gore ke eng se re se kopang kafa thatong ya gagwe, o a re utlwa.”—1 Johane 5:14

Ke boammaaruri gore dithapelo tsa batho bangwe mo Baebeleng di ile tsa arabiwa ka kgakgamatso. (2 Dikgosi 20:1-7) Mme dikarabo tse di ntseng jalo di ne di sa tlwaelega, tota le mo motlheng wa Baebele. Badumedi bangwe ba ne ba ikutlwa ba kgobegile marapo fa go ne go bonala e kete Modimo ga a araba dithapelo tsa bone. Kgosi Dafide o ne a botsa jaana: “O tla ntebala ka lobaka lo lokae Jehofa? Ka bosaengkae?” (Pesalema 13:1) Mme fa Dafide, yo o nang le tumelo a lemoga kafa Jehofa a mo thusitseng gantsi ka gone, o ne a tlhomamisetsa Modimo gore o a mo ikanya. Mo go yone thapelo eo, Dafide o ne a re: “Fa e le nna, ke ikantse bopelonomi jwa gago.” (Pesalema 13:5) Fela jaaka Dafide, baobamedi ba Modimo gompieno ba ka nna ba tshwanelwa ke go nnela ruri mo thapelong go fitlha ba bona Modimo a araba dithapelo tsa bone.—Baroma 12:12.

 KAFA MODIMO A ARABANG DITHAPELO KA GONE

Modimo o araba dithapelo tsa dilo tse tota re di tlhokang.

Ka maikaelelo a a siameng, ga se gantsi batsadi ba ba lorato ba nayang bana ba bone se ba se batlang nako nngwe le nngwe fa ba se batla. Ka tsela e e tshwanang, Modimo a ka nna a se ka a araba dithapelo tsa rona ka tsela e re akanyang gore o tshwanetse go di araba ka yone kgotsa ka nako e re solofetseng gore o tla di araba ka yone. Le fa go ntse jalo, re ka tlhomamisega gore Mmopi wa rona, fela jaaka rre yo o lorato, o tla araba dithapelo tsa rona tsa dilo tse re di tlhokang ka nako e e tshwanetseng le ka tsela e e tshwanetseng.—Luke 11:11-13.

Karabo ya Modimo fa o mo kopa thuso, e ka tla ka Baebele

Modimo a ka araba ka ditsela tse di sa lemotshegeng.

Jaanong go tweng fa e le gore re rapelela gore re gololwe mo bothateng bongwe jo bo sa kgaotseng? A re tshwanetse go swetsa ka gore, ka gonne thapelo ya rona e sa arabiwa ka kgakgamatso nngwe, go raya gore Jehofa ga a e araba gotlhelele? Nnyaa, go tla bo go le botlhale gore re tlhatlhobe gore a Modimo o re thusitse ka ditsela tse re sa di lemogeng. Ka sekai, gongwe tsala nngwe e e lorato e re diretse sengwe se re neng re se tlhoka ka nako e re neng re se tlhoka thata ka yone. (Diane 17:17) A go ka tswa go diregile ka tsela nngwe gore tsala eno e e lorato e tlhotlheleditswe ke Jehofa e re thuse? Mo godimo ga moo, Modimo a ka nna a araba dithapelo tsa rona a dirisa Baebele. Mo go yone, re ka nna ra bona botlhale jo bo ka re thusang go emelana le maemo a a bokete.—2 Timotheo 3:16, 17.

Modimo a ka nna a dirisa ditsala tse di re kgathalelang gore di re neye thuso ka nako e e tshwanetseng

Go na le gore Modimo a tlose mathata a batho ba lebanang le one, gantsi o ba naya maatla a go emelelana le one. (2 Bakorintha 4:7) Ka sekai, fa Jesu a ne a kopa Rraagwe gore a tlose bothata jo a lebaneng le jone, a boifa gore bo tla tlisa kgobo mo leineng la Modimo, Jehofa o ne a romela moengele gore a tle go nonotsha Morwaawe. (Luke 22:42, 43) Ka tsela e e tshwanang, Modimo a ka nna a dirisa tsala e re atamalaneng le yone gore e re nonotshe ka nako e re tlhokang go nonotshiwa ka yone. (Diane 12:25) E re ka karabo e e tshwanang le eno e ka tla ka tsela e e sa lemotshegeng, re ka nna ra tshwanelwa ke go ntsha matlho dinameng mo tseleng e Modimo a arabang dithapelo tsa rona ka yone.

Dikarabo dingwe di tshwanetse go letela nako ya Modimo.

Baebele ya re Modimo Mothatayotlhe o amogela batho ba ba ikokobeditseng ka ‘nako e e tshwanetseng.’ (1 Petere 5:6) Ka jalo, fa go bonala e kete o a diega mo tseleng e a arabang dithapelo tsa rona ka yone, ga re a tshwanela go swetsa ka gore Jehofa ga a re kgathalele. Go na le moo, ka go bo Mmopi wa rona yo o lorato a na le kitso e gaisang ya rona, ga go pelaelo gore o tlhatlhoba mekokotlelo ya rona go ikaegile ka se a itseng gore se molemo mo go rona.

“Jalo, ikokobetseng kafa tlase ga seatla se se thata sa Modimo, gore a tle a lo godise mo nakong e e tshwanetseng.”—1 Petere 5:6

Ka sekai: A re re o na le ngwana wa mosimane yo o go kopang gore o mo rekele baesekele. A o tla mo rekela yone ka gangwe fela? Fa o lemoga gore ga a ise a nne le maikarabelo a a oketsegileng go ka kgweetsa baesekele, o ka nna wa se ka wa e reka ka yone nako eo. Le fa go ntse jalo, go ise go ye kae o ka nna wa e reka ka nako e o lemogang gore o e tlhoka ka yone. Ka tsela e e tshwanang, Modimo a ka nna a re “naya dikopo tsa pelo ya [rona]” ka nako e e tshwanetseng fa re tswelela re rapela.—Pesalema 37:4.

TLHOMAMISEGA GORE JEHOFA O A REETSA

Baebele e kgothaletsa Bakeresete ba boammaaruri gore ba se ka ba latlhegelwa ke tsholofelo mo botlhokweng jwa thapelo. Bangwe ba ka nna ba re, ‘aitsane molomo o tlola noka e tletse!’ Ke boammaaruri gore fa e le gore re ntse re itshoketse bothata bongwe ka nako e telele kgotsa go tlhoka tshiamiso ka tsela nngwe, go  ka nna go nna thata go letela karabo ya Modimo. Le fa go ntse jalo, gone re dira sentle fa re sa lebale gore Jesu o ne a re ruta gore re nnele ruri mo thapelong.

Jesu o ne a dira setshwantsho sa motlholagadi yo o humanegileng yo o neng a nna a ya kwa moatlhoding mongwe yo o seng tekatekano go ya go batla tshiamiso. (Luke 18:1-3) Le fa gone moatlhodi yono a ne a gana go mo thusa, kwa bofelong o ne a ipolelela jaana: “Ke tla tlhokomela gore a bone tshiamiso, gore a tle a se ka a nna a tla mme a ntitaaka go feta selekanyo.” (Luke 18:4, 5) Go ya ka mokwalo wa puo ya ntlhantlha, moatlhodi o ne a thusa motlholagadi gore a se ka a tlhola a mo “itaya kafa tlase ga leitlho,” kgotsa ka puo ya tshwantshetso “go diga seriti [sa gagwe].” * Fa e le gore tota le moatlhodi yo o tletseng tshiamololo yo o boifang gore batho ba tla reng ka ene, a kgona go thusa motlholagadi, go tweng ka Modimo wa rona yo o re kgathalelang yo o tla nayang tshiamiso go botlhe ba ba “goelang kwa go one motshegare le bosigo”! Fela jaaka Jesu a buile, Modimo “o tla dira gore ba direlwe tshiamiso ka bofefo.”—Luke 18:6-8.

“Nnang lo kope, mme lo tla newa.”—Luke 11:9

Le fa gone ka dinako dingwe re ka lapisiwa ke go kopa thuso, ga re a tshwanela go latlhela seditse. Ka go nnela ruri mo thapelong, re a bo re bontsha gore re eletsa thata go bona thuso ya Modimo mo matshelong a rona. Gape re kgona go bona kafa Modimo a arabang dithapelo tsa rona ka gone, mme seo se dira gore re atamalane le ene. Ee, re ka tlhomamisega gore Jehofa o tla araba dithapelo tsa rona tse di siameng fa re tswelela re mo kopa ka tumelo.—Luke 11:9.

^ ser. 3 Fa re batla gore Modimo a reetse dithapelo tsa rona, re tshwanetse go leka ka natla go dira se a se batlang. Fa re dira jalo, re tla bona maatla a thapelo jaaka go tlotliwa ka one mo setlhogong seno. Go bona tshedimosetso e e oketsegileng, bona kgaolo 17 ya buka ya Totatota Baebele e Ruta Eng? e e gatisitsweng ke Basupi ba ga Jehofa.

^ ser. 5 Leina la Modimo ke Jehofa jaaka go tlhalosiwa mo Baebeleng.

^ ser. 22 Mo metlheng ya Baebele, Modimo o ne a lebeletse gore baatlhodi ba kgatlhegele batlholagadi le dikhutsana.—Duteronome 1:16, 17; 24:17; Pesalema 68:5.