Modimo ke motho wa mofuta ofe?

Modimo ke motho yo o sa bonaleng wa moya. O bopile magodimo le lefatshe le sengwe le sengwe se se tshelang. Ga go na ope yo o bopileng Modimo—ga a na tshimologo. (Pesalema 90:2) Modimo o batla gore batho ba mmatle le go itse boammaaruri ka ene.—Bala Ditiro 17:24-27.

Modimo ke motho yo re ka itseng leina la gagwe. Re ka ithuta ka dingwe tsa dinonofo tsa gagwe ka go tlhatlhanya ka dilo tse a di dirileng. (Baroma 1:20) Mme gore re itse Modimo sentle, re tshwanetse go ithuta Lefoko la gagwe e leng Baebele. Le dira gore re itse ka botho jwa Modimo jo bo lorato.—Bala Pesalema 103:7-10.

Modimo o ikutlwa jang ka tshiamololo?

Mmopi wa rona, Jehofa, o tlhoile tshiamololo. O bopile batho mo setshwanong sa gagwe. (Duteronome 25:16) Ke ka lebaka leo bontsi jwa rona re tlhoileng tshiamololo. Tshiamololo e ntsi e e leng teng ga e bakiwe ke Modimo. Modimo o file motho kgololesego ya go itlhophela. Ka maswabi, batho ba le bantsi ga ba dirise kgololesego eo ya go itlhophela sentle mme ba dira tshiamololo. Pelo ya ga Jehofa e utlwa botlhoko.—Bala Genesise 6:5, 6; Duteronome 32:4, 5.

Jehofa o rata tshiamiso e bile a ka se ka a letlelela tshiamololo go ya go ile. (Pesalema 37:28, 29) Baebele e solofetsa gore go ise go ye kae Modimo o tla fedisa tshiamololo yotlhe.—Bala 2 Petere 3:7-9, 13.

Baebele e solofetsa gore go ise go ye kae Modimo o tla tlisetsa batho botlhe tshiamiso