Fetela kwa tshedimosetsong

Fetela go diteng

A o Ka Ikanya Bodumedi Malebana le Boitsholo?

A o Ka Ikanya Bodumedi Malebana le Boitsholo?

Sylvia yo o tlhokomelang batho ba ba godileng a re: “Ke ne ke tsena kholetšhe e e nang le batho ba le bantsi ba ba neng ba re ba mo bodumeding. Le fa go ntse jalo, ba ne ba tsietsa mo ditlhatlhobong e bile ba dirisa diokobatsi tse di seng ka fa molaong. Bodumedi bo ne bo se na tlhotlheletso epe mo matshelo a bone.”

Monna mongwe yo o bidiwang Lionel a re: “Batho ba ke berekang le bone ba bua maaka ba re ba lwala le fa tota ba sa lwale. Ba mo bodumeding fela mme ga bo ba thuse ka sepe—bo ntse jaaka fanitšhara e ba kgabisang ka yone.”

Bodumedi ga bo na tlhotlheletso epe mo matshelong a batho ba le bantsi. Ba le bantsi gompieno ba ‘na le sebopego sa boineelo jwa bomodimo mme ba latola maatla a jone.’ (2 Timotheo 3:5) Baeteledipele ba bone ga ba a ba tlhomela sekao se se siameng, e bile baruti ga ba neye matsomane a bone kgakololo e ba e tlhokang ya Dikwalo e ba tshwanetseng go tshela ka yone. Ga go gakgamatse go bo ba le bantsi ba akanya gore Modimo ga a kgathale gore ba tshela jang.

BAEBELE E RUTA ENG?

Baebele e bontsha gore Modimo o na le maikutlo mme tsela e re tshelang ka yone e mo ama thata. Fa Baiseraele ba bogologolo ba ne ba tsuologela Modimo, “ba ne ba mo utlwisa botlhoko.” (Pesalema 78:40) Le fa go ntse jalo, go nna le ‘boipelo jo bogolo kwa legodimong’ fa motho a fetola boitshwaro jwa gagwe jo bo sa siamang a dira jalo go tswa pelong. (Luke 15:7) Fa motho a simolola go anaanela dinonofo tse dintle tsa ga Rraarona yo o kwa legodimong, lorato lwa gagwe mo Modimong lo a gola mme lo mo tlhotlheletsa gore a rate se Modimo a se ratang le go tlhoa se Modimo a se tlhoileng.—Amose 5:15.

BASUPI BA GA JEHOFA BA DIRA JANG MO NTLHENG ENO?

Lokwalodikgang lwa Deseret News lwa kwa Salt Lake City, Utah, U.S.A. lo bolela gore, Basupi ba ga Jehofa “ba thusa batho gore ba tokafatse dikamano tsa bone tsa lelapa e bile ba ba thusa go nna baagi ba ba ikanyegang.” Gape lokwalodikgang lo ne lwa bolela jaana: “Maloko a bone a tshela ka melao e e kwa godimo ya boitsholo. Ba dumela gore go goga, go nwa bobe, go dirisa diokobatsi ka tsela e e sa tshwanelang, boitsholo jo bo botlhaswa jwa tlhakanelodikobo le bosodoma ke mekgwa e e senyang kamano ya bone le Modimo.”

A baeteledipele ba bodumedi ba thusitse matsomane a bone go dirisa melao ya Modimo ya boitsholo?

Go ithuta ka botho jwa Modimo go thusa Basupi jang? Sylvia yo o umakilweng pelenyana a re: “Boferefere bo tlwaelegile mo tirong ya go tlhokomela batho ba ba godileng. Go motlhofo gore motho a kopanele le batho ba ba dirang jalo. Mme go tlhaloganya kafa Jehofa * a ikutlwang ka teng go nthusa gore ke dire se se siameng. Ke itumetse e bile ke na le kagiso ya mogopolo.” Sylvia o dumela gore go tshela ka melaometheo ya tumelo ya gagwe go ile ga tokafatsa botshelo jwa gagwe.

^ ser. 9 Jehofa ke leina la Modimo le le dirisiwang mo Baebeleng.