BOIKOKOBETSO KE ENG?

Boikokobetso ke go sa nne le boikgodiso le boikgogomoso. Motho yo o boikokobetso ga a tseye ba bangwe ba le kwa tlase ga gagwe. Motho ope yo o sa itekanelang yo o boikokobetso o tshwanetse gape a nna tekatekano, a itse ditlhaelo tsa gagwe.

MOSHE O NE A BONTSHA JANG BOIKOKOBETSO?

Moshe ga a ka a nna boikgogomoso ka go bo a na le taolo. Gantsi, fa motho a newa taolo e e rileng, boikokobetso jwa gagwe—kgotsa go tlhoka boikokobetso—go bonala ka bonako. Setswerere sengwe sa puo e bong Robert G. Ingersoll o tlhalosa seno jaana: “Batho ba le bantsi ba kgona go itshokela mathata. Mme fa o batla go bona gore tota motho o ntse jang, mo neye taolo.” Malebana le seno, Moshe o ne a re tlhomela sekao se se molemo. Jang?

Moshe o ne a newa maikarabelo a magolo, ka gonne Jehofa o ne a mo laela gore a etelele Baiseraele pele. Le fa go ntse jalo, maemo ao ga a ka a dira gore Moshe a nne boikgogomoso. Ka sekai, ela tlhoko tsela e e boikokobetso e a neng a rarabolola kgang e e boima ya ditshwanelo tsa boswa ka teng. (Dipalo 27:1-11) E ne e le kgang e e boima ka gonne tshwetso e e neng e tla dirwa e ne e tla ama dikokomana tse di tlang.

Moshe o ne a tla tsibogela seo jang? A o ne a tla tsaya gore e re ka e le moeteledipele wa Iseraele, o ne a tshwanelega go dira tshwetso ka kgang eo? A o ne a tla ikaega ka bokgoni jwa gagwe jwa tlholego, maitemogelo a mantsi a a neng a na le one kgotsa ka go bo a itse kafa Jehofa a akanyang ka gone?

Gongwe motho yo o boikgogomoso o ne a tla dira jalo. Mme e seng Moshe. Pego ya Baebele e re bolelela jaana: “Moshe a isa kgang [eo] fa pele ga ga Jehofa.” (Dipalo 27:5) Akanya fela! Tota le morago ga go etelela setšhaba sa Iseraele pele ka dingwaga tse di ka nnang 40, Moshe o ne a ikaega e seng ka bokgoni jwa gagwe, mme o ne a ikaega ka Jehofa. Mo kgannyeng eno re bona boikokobetso jwa ga Moshe sentle.

Moshe o ne a sa ikgogomose ka bolaodi jwa gagwe. O ne a itumela fa Jehofa a ne a letla Baiseraele ba bangwe gore le bone e nne baporofeti mmogo le ene. (Dipalo 11:24-29) Fa mogogwadiagwe a ne a akantsha gore a neye batho ba bangwe tiro e nngwe, Moshe o ne a dirisa kakantsho ya gagwe ka boikokobetso. (Ekesodo 18:13-24) Mme go ya kwa bofelong jwa botshelo jwa gagwe, le fa a ne a sa ntse a nonofile mo mmeleng, Moshe o ne a kopa Jehofa gore a tlhome mongwe yo o tla mo tlhatlhamang. Fa Jehofa a ne a tlhopha Joshua, Moshe o ne a tshegetsa lekawana leno ka pelo yotlhe, a rotloetsa batho gore ba latele kaelo ya ga Joshua go ya kwa Lefatsheng le le Solofeditsweng. (Dipalo 27:15-18; Duteronome 31:3-6; 34:7) Eleruri Moshe o ne a go tsaya e le tshiamelo go etelela Baiseraele pele mo kobamelong. Mme ga a ka a baya bolaodi jwa gagwe kwa pele ga boitekanelo jwa ba bangwe.

RE KA ITHUTA ENG MO GO SENO?

Le ka motlha ga re batle go dira gore maatla, bolaodi kgotsa bokgoni jwa rona jwa tlholego bo dire gore re nne boikgogomoso. Gakologelwa: Gore re kgone go dira tiro ya ga Jehofa ka tsela e e siameng, boikokobetso jwa rona bo tshwanetse go nna botlhokwa go feta bokgoni jwa rona. (1 Samuele 15:17) Fa re le boikokobetso tota, re tla leka go dirisa kgakololo eno e e molemo ya Baebele: “Ikanye Jehofa ka pelo ya gago yotlhe mme o se ka wa ikaega ka tlhaloganyo ya gago.”—Diane 3:5, 6.

Gape sekao sa ga Moshe se re ruta gore re se ka ra tsaya maemo kgotsa maikarabelo a re nang le one a le botlhokwa thata.

A re solegelwa molemo fa re etsa sekao sa ga Moshe sa boikokobetso? Ee tota re solegelwa molemo! Fa re leka go nna le boikokobetso jwa mmatota, re dira gore go nne motlhofo mo bathong ba bangwe go dirisana le rona e bile re dira gore ba re rate. Se se botlhokwa le go feta, re dira gore Jehofa Modimo yo le ene a bontshang nonofo eno e ntle a re rate. (Pesalema 18:35) “Modimo o ganetsa ba ba mabela, mme o naya ba ba boikokobetso bopelonomi jo bo sa [ba] tshwanelang.” (1 Petere 5:5) A bo re na le mabaka a a utlwalang jang ne a go etsa boikokobetso jwa ga Moshe!