Fetela kwa tshedimosetsong

Fetela go diteng

 Atamalana le Modimo

“Mogologolo wa Malatsi a Nna”

“Mogologolo wa Malatsi a Nna”

BAEBELE ya re: “Ga go motho ope yo o kileng a bona Modimo ka nako epe.” (Johane 1:18) Tsela e Modimo a lebegang ka yone e galalela thata mo go se nang motho ope wa nama le madi yo o ka mmonang a bo a tshela. (Ekesodo 33:20) Le fa go ntse jalo, mo dipegong dingwe, Jehofa o ne a dira gore banna ba ba rileng ba bone ponatshegelo ya legodimo. Mongwe wa banna bao e ne e le moporofeti Daniele. Ga go pelaelo gore se a neng a se bona se ne sa dira gore a tlotle Modimo fela thata, mme ke se le rona re tshwanetseng go se dira. Ela tlhoko kafa Daniele a tlhalosang ka gone se a ileng a se bona mo ponatshegelong. *Bala Daniele 7:9, 10.

“Mogologolo wa Malatsi.” Sereto se se reng “Mogologolo wa Malatsi,” se se dirisiwang ke Daniele fela, se bua ka mongwe yo o nang le malatsi a le mantsi (kgotsa yo o godileng). (Daniele 7:9, 13, 22) Jehofa o godile go le kana kang? E re ka e le “Kgosi ya bosakhutleng,” o sa le a ntse a le gone—mme o tla tswelela a le gone. (1 Timotheo 1:17; Jude 25) Go nna gone ga Modimo ka bosaengkae go re tlhomamisetsa gore botlhale jwa gagwe ga bo ka ke jwa lekanngwa ka gonne Baebele e amanya bogolo le botlhale. (Jobe 12:12) Boammaaruri ke gore, go thata gore megopolo ya rona e e lekanyeditsweng e tlhaloganye kgopolo ya go nnela ruri. Mme gone, a tota re tshwanetse go lebelela gore re tlhaloganye ka botlalo Modimo yo botlhale jwa gagwe bo ka se bapisiweng le bope?—Baroma 11:33, 34.

Ela tlhoko gore Mogologolo wa Malatsi o ne “a nna.” Ka ntlha yang? Ditemana tse di dikologileng di re naya lesedinyana, ka go dirisa mafoko a a jaaka “Tsheko” le ‘katlholo.’ (Daniele 7:10, 22, 26) Ka jalo, mo ponatshegelong, Jehofa o ne a ntse fa fatshe e le Moatlhodi. O ne a tla atlhola bomang? Ditšhaba tsa lefatshe, tse di ileng tsa tlhalosiwa pelenyana mo ponatshegelong ya ga Daniele jaaka dibatana. * (Daniele 7:1-8) Jehofa ke Moatlhodi yo o ntseng jang?

“Diaparo tsa gagwe di ne di le ditshweu fela jaaka kapoko, mme moriri wa tlhogo ya gagwe o ne o tshwana le boboa jo bo phepa.” Mmala o mosweu ke sesupo sa tshiamo le bophepa. Gantsi boboa jwa dinku bo nna le mmala o mosweu. Ka jalo, moriri o o tshwanang le boboa o ne o tla nna mosweu. A o ka leka go akanya se Daniele a se boneng? A ka leitlho la mogopolo o bona Moatlhodi yo o nang le moriri o mosweu gongwe a apere seaparo se se nang le mmala o o bosweu jwa kapoko? Dipapiso tseno di re tlhomamisetsa gore dikatlholo tsa ga Jehofa di siame e bile di botlhale. Ke Moatlhodi yo re tshwanetseng go mo ikanya thata le go mo tlotla.

Ke Moatlhodi yo re tshwanetseng go mo ikanya thata le go mo tlotla

“Go ne go na le dikete di le sekete tse di neng di mo direla, le dikete di le lesome di menagane ga dikete di le lesome tse di neng di eme fa pele ga gagwe.” Badiredi bano ba kwa legodimong ke bomang? Baebele e tlhalosa baengele e le “badiredi ba [Modimo].” (Pesalema 104:4) Baengele ba Modimo ba ba ka tswang ba le dimilione tse di makgolokgolo ba tshwaregile ‘ka go diragatsa lefoko la gagwe le go dira thato ya gagwe.’ (Pesalema 103:20, 21) A seo ga se bosupi jo bongwe jo bo bontshang gore botlhale jwa Modimo ga bo ka ke jwa lekanngwa le bope? Ke mang yo mongwe kwantle ga ga Jehofa yo o neng a ka kgona go nna le lesomo la kwa legodimong le le rulagantsweng sentle e bile le dira ka natla ka makgolokgolo a dingwaga?

Ponatshegelo ya ga Daniele e dira gore re ikanye Jehofa, Mogologolo wa Malatsi. Dikatlholo tsa gagwe di siame e bile botlhale jwa gagwe bo ka ikanngwa. Ke eng fa o sa ithute mo go oketsegileng malebana le kafa o ka atamalanang ka gone le Modimo yo o botlhale go gaisa ope fela?

Dikgaolo Tsa Baebele Tse di ka Balwang ka October:

Daniele 4-12Hosea 1-14

^ ser. 3 Tota Daniele ga a ka a bona Modimo. Go na le moo, Modimo o ne a tsenya mo mogopolong wa gagwe ditshwantsho tse di bonalang sentle tsa kwa legodimong. Morago ga foo, fa Daniele a tlhalosa se a se boneng, o ne a dirisa dikapuo, tse di akaretsang go tlhalosa Modimo jaaka e kete ke motho. Dipapiso tseo di re thusa go tlhaloganya gore Modimo o ntse jang mme ga di a tshwanela go tsewa e le dilo tsa mmatota.

^ ser. 5 Go bona motlotlo o o kaga ponatshegelo ya ga Daniele ya dibatana, bona kgaolo 9 ya buka ya Ela Tlhoko Boporofeti Jwa ga Daniele! e e gatisitsweng ke Basupi ba ga Jehofa.