Fetela kwa tshedimosetsong

Fetela go diteng

A o Ne o Itse?

A o Ne o Itse?

A Bakeresete ba ne ba tshaba kwa Judea pele Jerusalema e senngwa ka 70 C.E.?

“Fa lo bona Jerusalema a dikologilwe ke masole a a thibeletseng, itseng gore go kgakgabadiwa ga gagwe go atametse. A ba ba kwa Judea ba simolole go tshabela kwa dithabeng, mme a ba ba mo gare ga gagwe ba tloge.” (Luke 21:20, 21) Jesu o ne a naya barutwa ba gagwe ditaelo tseo tse di malebana le tshenyo e e neng e tla tlela Jerusalema. A go na le bosupi jwa gore barutwa ba ne ba reetsa tlhagiso ya ga Jesu?

Masome a le mmalwa a dingwaga morago ga loso lwa ga Jesu, masole a Baroma a eteletswe pele ke Cestius Gallus a ne a tsena kwa Palesetina gore a e tsogologele. Tlhaselo eo e ne ya tlhomamisiwa ke rahisitori mongwe wa Mojuda e bong Josephus yo o neng a tshela ka nako eo. Mophato wa masole a Baroma o ne wa dikaganyetsa Jerusalema e bile go ne go lebega o tla tlhasela. Ka tshoganyetso, Gallus le mophato wa gagwe ba ne ba boela morago. Rahisitori mongwe wa kereke e bong Eusebius a re Bakeresete ba ba neng ba nna kwa Judea ba ne ba nna le tshono ya go tshabela kwa Pela, motse o o kwa kgaolong e e dithaba ya Dekapolise.

Dingwaga di se kae moragonyana, ka 70 C.E., masole a mangwe a Baroma a eteletswe pele ke Mojenerale Titus a ne a boela kwa motsemogolong wa Bajuda a bo a o dikaganyetsa. Mo nakong eno, masole ano a ne a senya motse ono e leng se masole a ga Gallus a neng a sa se dira. Batho ba le dikete di le makgolo ba ne ba gaelelwa kwa Jerusalema ba bo ba swa.

“Bomorwa baporofeti” e ne e le bomang?

Dipego tsa Baebele tse di buang ka moporofeti Samuele, Elija le Elisha di bua ka banna ba ba neng ba bidiwa “bomorwa baporofeti.” Ka sekai, fa Elisha a ne a tlhoma Jehu go nna kgosi ya Iseraele, o ne a roma “mongwe wa bomorwa baporofeti,” gore a ye go mo tlotsa.—2 Dikgosi 9:1-4.

Bakanoki ba dumela gore polelwana eno ga e bue ka bana ba baporofeti ba mmatota mme e bua ka setlhopha sa bakaedi kgotsa batho ba ba nnang mmogo e bile ba dira mmogo. Go ya ka Journal of Biblical Literature, go ka direga gore maloko a setlhopha seno e ne e le batho “ba ba neng ba ineetse mo tirelong ya ga Yahweh [Jehofa] ba le kafa tlase ga moporofeti yo e neng e le . . . rraabone wa semoya.” (2 Dikgosi 2:12) Tota e bile, pego ya go tlodiwa ga ga Jehu, ya re moemedi wa ga Elisha ke “motlhokomedi wa moporofeti.”—2 Dikgosi 9:4.

Go lebega “bomorwa baporofeti” ba ne ba tshela botshelo jo bo sa raraanang. Go bolelwa fa sengwe sa ditlhopha tseo tsa motlha wa ga Elisha se ne sa ikagela lefelo la bonno, se dirisa selepe se se neng se adimilwe. (2 Dikgosi 6:1-5) Sengwe se se bontshang gore bangwe mo ditlhopheng tseno ba ne ba nyetse, ke gore go buiwa ka motlholagadi wa “bomorwa baporofeti.” (2 Dikgosi 4:1) Go lebega Baiseraele ba ba ikanyegang ba ne ba anaanela bomorwa baporofeti e bile pego nngwe e bontsha gore ba ne ba ba abela dimpho tsa dijo.—2 Dikgosi 4:38, 42.