Fetela kwa tshedimosetsong

Fetela go diteng

 Babadi ba a Botsa . . .

A Boitumelo bo Ikaegile ka Lenyalo?

A Boitumelo bo Ikaegile ka Lenyalo?

A Baebele e ruta gore o tshwanetse go nyala kgotsa go nyalwa gore o kgotsofale kgotsa o itumele? Kwa tshimologong, go ka nna ga lebega e kete Lefoko la Modimo le tshegetsa kgopolo eo. Jang?

Go ya ka pego ya Genesise, Modimo o ne a bona gore “ga go molemo” gore monna wa ntlha e bong Adame a nne a le nosi. Ka jalo, Modimo o ne a bopa Efa go nna “motlatsi” wa ga Adame. (Genesise 2:18) Lefoko “motlatsi” le kaya sengwe se se dirang gore se sengwe se felele. Go tswa mo pegong eo, re ka nna ra swetsa ka gore motho ga a felela fa a sa nyala kgotsa a sa nyalwa. Mo godimo ga moo, dipego di le mmalwa tsa Baebele di dira gore go lebege e kete lenyalo ke lone le dirang gore motho a bone masego le boitumelo. Nngwe ya dipego tseo ke e e ka ga Ruthe.

Le fa go ntse jalo, a tota dipego tseo di kwaletswe go re ruta gore gompieno Bakeresete ba ka se ka ba itumela, ba kgotsofala kgotsa ya nna batho ba ba feletseng fa ba sa nyale le go nna le bana? Ga go a nna jalo. Motho yo o neng a feletse e bile a kgotsofetse go gaisa yo o kileng a tshela, e ne e le Jesu Keresete. Le fa go ntse jalo, o ne a nna a sa nyala go fitlha a swa. Jesu, monna yo o botlhale go gaisa yo o kileng a tshela, gape o ne a bontsha ka botlalo kafa Jehofa, “Modimo yo o itumetseng” a leng ka gone. (1 Timotheo 1:11; Johane 14:9) Jesu o ne a bontsha gore ke eng se se tlhokegang gore motho a itumele kgotsa a segofale mo lefatsheng leno. (Mathaio 5:1-12) Ga a ka a akaretsa lenyalo mo lenaaneng leo.

Ka jalo, a Baebele e a ikganetsa mo kgannyeng eno? Le e seng. Re tshwanetse go leba lenyalo re akantse ka boikaelelo jwa ga Jehofa ka lone. Le fa a ne a dirile gore lenyalo le tlisetse batho boitumelo, kamano e e molemo le kgomotso, ka dinako tse dingwe lenyalo le ne le le botlhokwa mo go diragatseng maikaelelo mangwe a a amanang le thato ya gagwe. Ka sekai, boikaelelo jwa Modimo ka Adame le Efa e ne e le gore ‘ba ate ba tlatse lefatshe.’ (Genesise 1:28) Go ne go se ope mo go Adame le Efa yo o neng a ka diragatsa boikaelelo jwa Modimo a le nosi. Go na le moo, ba ne ba tlhokana e bile mongwe le mongwe wa bone o ne a dira gore yo mongwe a felele ka tsela nngwe e e kgethegileng.

Ka tsela e e tshwanang, Jehofa o ne a na le boikaelelo jo bo kgethegileng ka lenyalo le botshelo jwa lelapa fa a ne a dirisana le setšhaba sa Iseraele sa mo lefatsheng. O ne a batla gore setšhaba sa gagwe se nne segolo gore se se ka sa fenngwa ke baba ba sone. Gape boikaelelo jwa gagwe e ne e le gore Mesia, yo o neng a tla golola batho ba ba ikanyegang mo ditlamoragong tsa boleo le loso, a tlhage mo lotsong lwa Juda. (Genesise 49:10) Ka jalo, basadi ba ba ikanyegang ba Baiseraele ba ne ba tsaya go nyalwa le go nna le bana e le tshiamelo e e kgethegileng mme go sa nyalwe kgotsa go sa nne le bana ba go tsaya go tlhabisa ditlhong e bile go hutsafatsa.

Mme go tweng ka gompieno? A taelo ya Modimo ya bogologolo ya go ‘tlatsa lefatshe’ e pateletsa Bakeresete ba gone jaanong ba tshelang mo lefatsheng le le tletseng ka batho, gore ba nyale le go nna le bana? Nnyaa. (Mathaio 19:10-12) Ga go tlhole go tlhokega gore Modimo a sireletse losika lo Mesia a neng a tla tlhaga mo go lone kgotsa a sireletse setšhaba se Mmoloki a neng a tla tsholwa mo go sone. Mme jaanong, Bakeresete ba tshwanetse go leba jang go tsena mo lenyalong le go sa tsene mo go lone?

Boammaaruri ke gore, go tsena mo lenyalong le go sa tsene mo go lone, ka bobedi go ka tsewa e le dimpho tse di tswang kwa Modimong. Jaaka o itse, mpho e e tshwanelang motho yo o rileng e ka nna ya se ka ya tshwanela yo mongwe. Lenyalo ke thulaganyo e e boitshepo e e ka dirang gore motho a bone lorato, botsalano le motheo o o tlhomameng wa lelapa. Mo letlhakoreng le lengwe, gape Baebele e bontsha sentle gore batho ba ba tsenang mo lenyalong mo lefatsheng leno la batho ba ba sa itekanelang ba tla lebana le mathata kgotsa “pitlagano mo nameng.” Mme Jehofa ga a lebe go sa nyale e le selo se se tlhabisang ditlhong kgotsa se se hutsafatsang. Go na le moo, Lefoko la gagwe le tlhalosa gore go sa tsene mo lenyalong go na le melemo e e rileng e batho ba ba leng mo lenyalong ba se nang yone.—1 Bakorintha 7:28, 32-35.

Ka jalo, Baebele e tekatekano fa e tlhalosa go tsena mo lenyalong le go sa tsene mo lenyalong. Jehofa yo e leng Mosimolodi wa lenyalo le lelapa, o batla gore batlhanka ba gagwe botlhe ba itumele ba bo ba kgotsofale, ba ka tswa ba le mo lenyalong kgotsa ba se mo go lone.