Fetela kwa tshedimosetsong

Fetela go diteng

 Ithute mo Lefokong la Modimo

Go Tla Direga Eng ka Letsatsi la Katlholo?

Go Tla Direga Eng ka Letsatsi la Katlholo?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba tla itumelela go tlotla ka dikarabo tseno le wena.

1. Letsatsi la Katlholo ke eng?

“Katlholo ya Bofelo” ka Gustave Doré, 1832-1883

Jaaka go bontshitswe mo setshwantshong se se ka fa mojeng, batho ba le bantsi ba akanya gore ka Letsatsi la Katlholo batho ba le dimilione ba tla tlisiwa fa pele ga setulo sa Modimo gore ba atlholwe go ya ka ditiro tsa bone—ba bangwe ba duelwe ka botshelo kwa legodimong, ba bangwe bone ba tlhokofadiwe kwa diheleng. Le fa go ntse jalo, Baebele e bontsha gore boikaelelo jwa Letsatsi la Katlholo ke go golola batho mo tshiamololong. (Pesalema 96:13) Modimo o tlhomile Jesu go nna Moatlhodi yo o tla dirang gore batho ba direlwe tshiamiso gape.—Bala Isaia 11:1-5; Ditiro 17:31.

2. Letsatsi la Katlholo le tla dira jang gore go nne le tshiamiso gape?

Fa monna wa ntlha, Adame, a ne a tsuologela Modimo ka boomo o ne a dira gore bana ba gagwe botlhe ba nne le boleo, ba boge ba bo ba swe. (Baroma 5:12) Jesu o tla dirolola tshiamololo eo ka go tsosa batho ba ba dimilione ba ba suleng. Buka ya Tshenolo e senola gore seo se tla direga mo dingwageng tse di sekete fa Keresete Jesu a tla bo a busa.—Bala Tshenolo 20:4, 11, 12.

Batho ba ba tsosiwang ga ba ka ke ba atlholwa go ya ka se ba neng ba se dira pele ba swa, mme ba tla atlholwa go ya ka se ba se dirang fa se se mo “dikwalong tsa momeno” tse di umakiwang mo go Tshenolo kgaolo 20, se sena go senolwa. (Baroma 6:7) Moaposetoloi Paulo o ne a re bangwe ba batho ba ba tla tsosiwang ba bo ba nne le tshono ya go ithuta ka Modimo ke “ba ba siameng mmogo le ba ba sa siamang.”—Bala Ditiro 24:15.

 3. Go tla direga eng ka Letsatsi la Katlholo?

Batho ba ba tlhokafetseng ba sa itse Jehofa Modimo e bile ba sa mo direle ba tla nna le tshono ya go fetoga le go dira se se molemo. Fa ba dira jalo, tsogo ya bone e tla nna ‘tsogo ya botshelo.’ Le fa go ntse jalo, bangwe ba batho ba ba tsositsweng ba ka se batle go ithuta melao ya ga Jehofa. Tsogo ya bone e tla nna ‘tsogo ya katlholo.’—Bala Johane 5:28, 29; Isaia 26:10; 65:20.

Kwa bofelong jwa Letsatsi la Katlholo le le tla tsayang dingwaga di le sekete, Jehofa o tla dira gore batho ba itekanele jaaka kwa tshimologong. (1 Bakorintha 15:24-28) Ruri eo ke tsholofelo e e itumedisang mo bathong botlhe ba ba kutlo! Mo tekong ya bofelo, Modimo o tla golola Satane Diabolo mo moleteng o a tla bong a tswaletswe mo go one ka dingwaga di le sekete. Satane o tla leka gape go dira gore batho ba tlogele Jehofa mme ba ba sa reetseng Satane ba tla itumelela go tshelela ruri mo lefatsheng.—Bala Isaia 25:8; Tshenolo 20:7-9.

4. Ke letsatsi lefe le lengwe la katlholo le le tla solegelang batho molemo?

Gape Baebele e dirisa polelwana ‘letsatsi la katlholo’ fa e bua ka tiragalo e e tla fedisang tsamaiso eno ya dilo. Letsatsi leno la katlholo le tla tla ka tshoganyetso jaaka mo motlheng wa Morwalela wa ga Noa, o o neng wa fedisa kokomana yotlhe ya batho ba ba boikepo. Go a itumedisa gore go senngwa ga “baikepi” go tla dira gore go nne le maemo a masha a go tla nnang le ‘tshiamo mo go one.’—Bala 2 Petere 3:6, 7, 13.