Fetela kwa tshedimosetsong

Fetela go diteng

 Babadi ba a Botsa . . .

A Basupi ba ga Jehofa Ba na Le Badiredi ba Basadi?

A Basupi ba ga Jehofa Ba na Le Badiredi ba Basadi?

Ee, Basupi ba ga Jehofa mo lefatsheng lotlhe ba na le badiredi ba basadi ba le dimilione di le mmalwa. Ke boidiidi jo bogolo jwa bareri ba dikgang tse di molemo tsa Bogosi jwa Modimo. Pesalema 68:11 e bua jaana ka tsela ya boporofeti ka badiredi bao: “Jehofa ka boene o ntsha lefoko; basadi ba ba bolelang dikgang tse di molemo ke lesomo le legolo.”

Le fa go ntse jalo, o se ka wa amanya bodiredi jwa basadi bano ba Basupi ba ga Jehofa le bodiredi jwa basadi ba e leng baruti mo madumeding a mangwe. Go na le dilo tse ba farologanang ka tsone. Ke dife tseo?

Ga ba rerele batho ba ba tshwanang. Gantsi baruti ba basadi ba dikereke tse di ipitsang tsa Bokeresete, ba batla go etelela pele mo teng ga diphuthego tsa bone e bile ba rerela maloko a dikereke tsa bone. Badiredi ba basadi ba Basupi ba ga Jehofa bone, ba rerela batho ba ba kwa ntle ga phuthego, ke gore, batho botlhe ba ba kopanang le bone fa ba rera ka ntlo le ntlo le gongwe le gongwe.

Tsela e nngwe e badiredi ba basadi ba Basupi ba ga Jehofa ba farologanang ka yone le ba madumedi a mangwe, ke ka tiro ya bone mo phuthegong. Baruti ba basadi ba dikereke tse di ipitsang tsa Bokeresete ba okamela maloko a phuthego ya bone e bile ba ba ruta dithuto tsa bodumedi jwa bone. Le fa go ntse jalo, badiredi ba basadi ba Basupi ba ga Jehofa ga ba rute mo phuthegong fa banna ba ba kolobeditsweng ba le teng. Banna ba ba tlhometsweng go nna barutisi ke bone fela ba ba dirang jalo.—1 Timotheo 3:2; Jakobe 3:1.

Baebele e tlhalosa gore ke banna fela ba ba neilweng maikarabelo a go okamela phuthego. Ela tlhoko thulaganyo e moaposetoloi Paulo a neng a e tlhoma fa a ne a kwalela molebedi ka ene e bong Tito: “Ka lebaka leno ke ne ka go tlogela kwa Kereta, gore o . . . tlhome banna ba bagolwane mo metseng ka go tlhatlologana.” Paulo o ne a oketsa ka gore monna mongwe le mongwe yo o tlhomilweng o tshwanetse go nna monna “yo go se nang se a latofadiwang ka sone, monna wa mosadi a le mongwe.” (Tito 1:5, 6) Paulo o ne a naya Timotheo ditaelo tse di tshwanang mo makwalong a gagwe a a tlhalosang dithulaganyo tsa phuthego fa a ne a re: “Fa monna ope a kgaratlhela tiro ya bolebedi, o eletsa tiro e e molemo. Jalo, molebedi o tshwanetse go nna yo o se nang se a ka tshwaiwang phoso ka sone, monna wa mosadi a le mongwe, . . . a tshwanelega go ruta.”—1 Timotheo 3:1, 2.

Ke ka ntlha yang fa maikarabelo a go okamela mo phuthegong a newa banna fela? Paulo a re: “Ga ke letle mosadi go ruta, kgotsa go dirisa taolo mo monneng, fa e se go nna ka tidimalo. Gonne Adame o ne a bopiwa pele, go tswa foo Efa.” (1 Timotheo 2:12, 13) Tsela e Modimo a neng a bopa dilo ka tatelano ka yone e bontsha lebaka la go bo Modimo a neile banna boikarabelo jwa go ruta le go okamela.

Badiredi ba ga Jehofa ba latela sekao sa Moeteledipele wa bone e bong Jesu Keresete. Morutwa Luke o ne a kwala jaana ka bodiredi jwa ga Jesu: “A simolola go eta go tswa motseng go ya motseng le go tswa motsaneng go ya motsaneng, a rera e bile a bolela dikgang tse di molemo tsa bogosi jwa Modimo.” Moragonyana, Jesu o ne a romela balatedi ba gagwe gore ba dire tiro e e tshwanang: “Ba tloga ba ralala karolo ya naga go tswa motsaneng go ya motsaneng o mongwe, ba bolela dikgang tse di molemo.”—Luke 8:1; 9:2-6.

Gompieno, badiredi ba ga Jehofa—banna le basadi—ba nna le seabe ka botlalo mo tirong e Jesu a neng a e bolelela pele: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.”—Mathaio 24:14.