Fetela kwa tshedimosetsong

Fetela go diteng

Baebele e Fetola Matshelo a Batho

Baebele e Fetola Matshelo a Batho

 Baebele e Fetola Matshelo a Batho

LEKGAREBE le le godisitsweng botlhoko le ne la bona jang bokao jwa mmatota mo botshelong? Ke eng se se tlhotlheleditseng motho yo o neng a tsuologela tsamaiso ya puso e bile a rata thubakanyo gore a nne moreri wa dikgang tse di molemo yo o ratang kagiso? Bala dipego tseno gore o bone dikarabo.

“Ke ne ke Batla go Ratwa ka Pelo ya me Yotlhe.”—INNA LEZHNINA

NGWAGA O A TSHOTSWENG KA ONE: 1981

NAGA E A TSHOLETSWENG KWA GO YONE: RUSSIA

BOTSHELO JWA GAGWE JWA PELE: O GODISITSWE BOTLHOKO

TSELA E KE NENG KE TSHELA KA YONE PELE: Ke tshotswe ke batsadi ba ba sa utlweng mo ditsebeng mme le nna ga ke utlwe mo ditsebeng. Dingwaga tsa me tsa ntlha tse thataro di ne di le monate. Go tswa foo batsadi ba me ba ne ba tlhalana. Tota le fa ke ne ke le monnye, ke ne ke tlhaloganya gore tlhalo e kaya eng mme go tlhalana ga bone go ne ga nkutlwisa botlhoko fela thata. Fa batsadi ba me ba sena go tlhalana, Rre le nkgonne wa mosimane ba ne ba nna kwa Troitsk mme nna le Mmè re ne ra fudugela kwa Chelyabinsk. Fa nako e ntse e tsamaya, Mmè o ne a nyalwa gape. Rre yo a neng a mo nyala o ne a nwa bojalwa thata mme gantsi o ne a betsa nna le Mmè.

Ka 1993, nkgonne yo ke neng ke mo rata o ne a nwela mo metsing. Kotsi eno e ne ya tshosa lelapa la rona fela thata. Mmè o ne a simolola go nwa mme le ene a ntshotla fela jaaka Rre. Ke ne ka simolola go batla botshelo jo bo botoka. Ke ne ke batla go ratwa ka pelo ya me yotlhe. Ke ne ka simolola go ya kwa dikerekeng tse di farologaneng ke batla kgomotso mme ka se ka ka e bona.

KAFA BAEBELE E FETOTSENG BOTSHELO JWA ME KA GONE: Fa ke na le dingwaga di le 13, moithuti yo ke neng ke tsena le ene mo tlelaseng, yo e neng e le Mosupi wa ga Jehofa, o ne a mpolelela dipolelo dingwe tsa Baebele. Ke ne ke itumelela go ithuta ka batho ba go buiwang ka bone mo Baebeleng ba ba jaaka Noa le Jobe, ba ba neng ba direla Modimo le fa ba ne ba lebana le maemo a a thata. Go ise go ye kae, ke ne ka ithuta Baebele le Basupi mme ka ya kwa dipokanong tsa bone.

Go ithuta Baebele go ne ga dira gore ke itse dithuto tse dintsi tsa boammaaruri. Ke ne ka amiwa ke go itse gore Modimo o na le leina. (Pesalema 83:18) Ke ne ka kgatlhiwa ke go bona kafa Baebele e boleletseng pele ka nepo ka teng maemo a a neng a tla nna teng mo “metlheng ya bofelo.” (2 Timotheo 3:1-5) Gape ke ne ka itumelela thata go ithuta ka tsholofelo ya tsogo. Akanya fela—ke tla bona kgaitsadiake gape!—Johane 5:28, 29.

 Le fa go ntse jalo, ga se batho botlhe ba ba neng ba itumelela selo seno se sesha se se neng se intumedisa. Mmè le Rre wa bobedi ba ne ba sa rate Basupi ba ga Jehofa. Ba ne ba leka go nkgatelela gore ke kgaotse go ithuta Baebele. Mme ke ne ke rata se ke neng ke se ithuta, ka jalo ke ne ke ipoleletse gore nka se tlogele.

Go itshokela kganetso ya ba lelapa la gaetsho go ne go se motlhofo. Selo se sengwe se se neng sa tshosa lelapa la gaetsho ke fa kgaitsadiake yo mmotlana—yo o neng a tle a ye le nna kwa dipokanong tsa Basupi ba ga Jehofa—le ene a ne a nwela. Le fa go ntse jalo, ka metlha Basupi ba ne ba nkema nokeng. Ba ne ba mpontsha lorato lo ke neng ke sa bolo go lo batla botshelo jwa me jotlhe. Ke ne ke itse gore jono e tshwanetse ya bo e le jone bodumedi jwa boammaaruri. Ka 1996, ke ne ka kolobediwa go nna Mosupi wa ga Jehofa.

KAFA KE SOLEGETSWENG MOLEMO KA GONE: Ke na le dingwaga di le thataro ke nyetswe ke monna yo o molemo yo o bidiwang Dmitry. Re direla mmogo kwa ofising ya lekala ya Basupi ba ga Jehofa kwa St. Petersburg. Fa nako e ntse e tsamaya, batsadi ba me ba ne ba se tlhole ba ganetsa se ke se dumelang jaaka pele.

Ruri ke lebogela go bo ke itse Jehofa! Go mo direla go dirile gore botshelo jwa me bo nne le bokao jwa mmatota.

“Ke ne Ke na le Dipotso Tse Dintsi Tse di Neng di Ntshwenya.”—RAUDEL RODRÍGUEZ RODRÍGUEZ

NGWAGA O A TSHOTSWENG KA ONE: 1959

NAGA E A TSHOLETSWENG KWA GO YONE: CUBA

BOTSHELO JWA GAGWE JWA PELE: O NE A TSUOLOGELA TSAMAISO YA PUSO

TSELA E KE NENG KE TSHELA KA YONE PELE: Ke tsholetswe kwa Havana, kwa Cuba mme ka golela mo lefelong le le humanegileng le dintwa tsa mo mebileng di neng di tlwaelegile mo go lone. Fa ke ntse ke gola ke ne ka rata motshameko o o tshamekiwang ka go digela motho fa fatshe le metshameko e mengwe ya ntwa.

Ke ne ke dira sentle kwa sekolong, mme batsadi ba me ba ne ba nkgothaletsa go ya yunibesithing. Fa ke le koo, ke ne ka simolola go nna le boikutlo jwa gore tsamaiso ya dipolotiki ya naga ya  rona e tshwanetse go fetolwa. Ke ne ka swetsa ka gore ke tsuologe. Nna le moithuti mongwe yo ke neng ke tsena le ene mo tlelaseng, re ne ra tlhasela lepodise lengwe ka boikaelelo jwa go le tseela tlhobolo. Morago ga go mekamekana le lone le ne la sala le gobetse thata mo tlhogong. Ka ntlha ya tlhaselo eo nna le moithuti yo ke neng ke tsena le ene mo tlelaseng re ne ra latlhelwa mo kgolegelong mme ra atlholelwa go bolawa ka go thuntshiwa. Ke ne ke na le dingwaga di le 20 fela mme ke ne ke tloga ke swa!

Fa ke ntse ke le esi mo seleng ya kgolegelo, ke ne ka akanya kafa ke tla itshwarang ka gone fa ke thuntshiwa. Ke ne ke sa batle go bontsha gore ke tshogile. Gape ke ne ke na le dipotso tse dintsi tse di neng di ntshwenya. Ke ne ke ipotsa jaana: ‘Ke eng fa lefatshe le tletse tshiamololo e kana kana? A go tla tsamaya go nna le botshelo jo bo botoka?’

KAFA BAEBELE E FETOTSENG BOTSHELO JWA ME KA GONE: Kgabagare katlholo e re neng re e neilwe ya loso e ne ya fetolwa mme ra atlholelwa dingwaga tse 30 kwa kgolegelong. Ka yone nako eo ke ne ka kopana le bangwe ba Basupi ba ga Jehofa, ba ba neng ba tshwerwe ka ntlha ya bodumedi jwa bone. Ke ne ka kgatlhiwa ke tsela e Basupi ba neng ba le pelokgale ka yone e bile ba le kagiso. Le fa ba ne ba tsentswe mo kgolegelong go sa tshwanela, ba ne ba sa galefa.

Basupi ba ne ba nthuta gore Modimo o na le se a ikaeletseng go se direla batho. Ba ne ba mpontsha go tswa mo Baebeleng gore o tla fetola lefatshe go nna paradaise e mo go yone go tla bong go se na bokebekwa le tshiamololo. Ba ne ba nthuta gore lefatshe le tla tlala ka batho ba ba molemo ba ba tla nnang le tshono ya go tshelela ruri mo maemong a a siameng.—Pesalema 37:29.

Ke ne ke itumelela se Basupi ba neng ba se nthuta mme botho jwa me bo ne bo sa tshwane le jwa bone. Ke ne ke akanya gore nka se kgone go nna ke sa tseye letlhakore mo dipolotiking kgotsa go ineela fela fa ke rumolwa. Ka jalo, ke ne ka swetsa ka gore ke ipalele Baebele ka bonna. Fa ke sena go e fetsa ke ne ka lemoga gore Basupi ba ga Jehofa ke bone fela batho ba ba itshwarang jaaka Bakeresete ba bogologolo.

Fa ke ntse ke ithuta Baebele, ke ne ka lemoga gore ke tshwanetse go dira diphetogo tse dikgolo mo botshelong jwa me. Ka sekai, ke ne ke tshwanetse go fetola tsela e ke neng ke bua ka yone ka gonne ke ne ke na le mokgwa wa go dirisa puo ya matlhapa. Gape ke ne ke tshwanetse go tlogela go goga. Mme ke ne ke tla tshwanelwa ke go kgaotsa go tsaya letlhakore mo dikgannyeng tsa dipolotiki. Go ne go se motlhofo go dira diphetogo tseno, mme ka iketlo ke ne ka kgona ka thuso ya ga Jehofa.

Nngwe ya diphetogo tse di boima tse ke neng ke tshwanetse go di dira e ne e le go ithuta go laola bogale jwa me. Ke sa ntse ke rapelela go nna le boikgapo mo kgannyeng eno. Ke thusitswe thata ke ditemana tsa Baebele tse di jaaka Diane 16:32, e e reng: “Yo o bonya go galefa o botoka go gaisa monna yo o thata, mme yo o laolang moya wa gagwe o botoka go gaisa yo o thopang motse.”

Ka 1991, ke ne ka kolobediwa go nna Mosupi wa ga Jehofa. Ke ne ka kolobediwa kwa kgolegelong mo motomong o mogolo wa metsi. Mo ngwageng o o latelang, bangwe ba rona magolegwa re ne ra gololwa mme ra romelwa kwa Spain ka gonne re ne re na le ba masika koo. Fa ke sena go goroga kwa Spain, ka bonako fela ke ne ka ya kwa dipokanong tsa Basupi ba ga Jehofa. Basupi ba koo ba ne ba nkamogela jaaka e kete re ne re sa bolo go itsane, mme ba ne ba nthusa fa ke simolola botshelo sesha.

KAFA KE SOLEGETSWENG MOLEMO KA GONE: Ke itumetse e bile ke direla Modimo ke na le mosadi wa me le bomorwadiake. Ke na le tshiamelo ya go dirisa nako ya me e ntsi ke thusa batho ba bangwe go ithuta Baebele. Ke a tle ke lebe kwa morago ke gopole nako ya fa ke ne ke le lekawana le le neng le tloga le swa, mme ke anaanela fela thata dilo tse di molemo tse ke di boneng fa e sa le ka nako eo. Kwantle ga gore ke a tshela, gape ke na le tsholofelo. Ke lebile pele kwa Paradaiseng e e solofeditsweng—ka nako ya fa go tla bo go rena tshiamiso le fa “loso lo tla bo lo seyo.”—Tshenolo 21:3, 4.

[Mafoko a a mo go tsebe 19]

“Ke ne ka amiwa ke go itse gore Modimo o na le leina”

[Setshwantsho mo go tsebe 20]

Nna le monna wa me re itumelela go bontsha batho ba ba sa utlweng mo ditsebeng dikgatiso tsa puo ya diatla