Fetela kwa tshedimosetsong

Fetela go diteng

O ka Atamalana Jang le Modimo?

O ka Atamalana Jang le Modimo?

 Ithute mo Lefokong la Modimo

O ka Atamalana Jang le Modimo?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba ka itumelela go tlotla ka dikarabo tseno le wena.

1. A Modimo o reetsa dithapelo tsotlhe?

Jehofa o laletsa batho ba ditšhaba tsotlhe gore ba atamalane le ene ka thapelo. (Pesalema 65:2) Mme ga a reetse dithapelo tsotlhe. Ka sekai, fa Baiseraele ba ne ba nnela go dira bosula, Modimo o ne a se ka a reetsa dithapelo tsa bone. (Isaia 1:15) Gape dithapelo tsa monna yo o sotlang mosadi wa gagwe di ka kgoreletsega. (1 Petere 3:7) Le fa go ntse jalo, Modimo o tla utlwa le dithapelo tsa batho ba ba dirileng maleo a a masisi fa ba ikwatlhaya.—Bala 2 Ditiragalo 33:9-13.

2. Re tshwanetse go rapela jang?

Thapelo ke tshiamelo e bile ke karolo ya kobamelo ya rona, ka jalo re tshwanetse go rapela Jehofa fela. (Mathaio 4:10; 6:9) E re ka re sa itekanela mme re ka se ka ra ‘ya kwa go Rara’ ka borona, re tshwanetse go rapela mo leineng la ga Jesu ka gonne ke ene “tsela” e e tlhophilweng. (Johane 14:6) Jehofa ga a batle gore re rapele dithapelo tse re di tshwereng ka tlhogo kgotsa tse di kwadilweng mme o batla gore re rapele go tswa pelong.—Bala Mathaio 6:7; Bafilipi 4:6, 7.

Mmopi wa rona a ka utlwa le dithapelo tse di rapelwang mo pelong. (1 Samuele 1:12, 13) O re laletsa gore re rapele nako nngwe le nngwe, jaaka kwa tshimologong ya letsatsi le kwa bowelong jwa lone, fa re ja le fa re na le mathata.—Bala Pesalema 55:22; Mathaio 15:36.

3. Ke ka ntlha yang fa Bakeresete ba kopana mmogo?

Ga go motlhofo go atamalana le Modimo ka gonne re tshela le batho ba ba sa dumeleng mo Modimong le ba ba buang ka go sotla ka tsholofetso ya gagwe ya gore go tla nna le kagiso mo lefatsheng. (2 Timotheo 3:1, 4; 2 Petere 3:3, 13) Ka jalo re tshwanetse go kopana mmogo le badumedi ka rona gore re kgothatsane.—Bala Bahebera 10:24, 25.

O ka atamalana le Modimo fa o itsalanya le batho ba ba mo ratang. Dipokano tsa Basupi ba ga Jehofa di dira gore batho ba solegelwe molemo ke go bona kafa ba bangwe ba nang le tumelo ka gone.—Bala Baroma 1:11, 12.

  4. O ka atamalana jang le Modimo?

O ka atamalana le Jehofa ka go tlhatlhanya ka se o se ithutileng mo Lefokong la gagwe. Akanya ka ditiro tsa gagwe, ditsela tse a re kaelang ka tsone le ditsholofetso tsa gagwe. Go rapela ka dilo tse o di akanyeditseng kwa teng go ka dira gore o anaanele thata lorato le botlhale jwa Modimo.—Bala Joshua 1:8; Pesalema 1:1-3.

O ka atamalana le Modimo fela fa o mo ikanya e bile o na le tumelo mo go ene. Mme tumelo e tshwana le sengwe se se tshelang se se tlhokang go tlhokomelwa. O tshwanetse go fepa tumelo ya gago ka metlha ka go sekaseka mabaka a se o se dumelang.—Bala 1 Bathesalonika 5:21; Bahebera 11:1, 6.

5. Go atamalana le Modimo go tla go solegela molemo jang?

Jehofa o amega ka batho ba ba mo ratang. O ba sireletsa mo go sepe fela se se ka senyang tumelo ya bone le tsholofelo ya bone ya botshelo jo bo sa khutleng. (Pesalema 91:1, 2, 7-10) O re tlhagisa ka ditsela tsa go tshela tse di ka tsenyang botsogo jwa rona mo kotsing mme tsa re amoga boitumelo. Jehofa o re ruta tsela e e molemolemo ya go tshela.—Bala Pesalema 73:27, 28; Jakobe 4:4, 8.

Fa o batla tshedimosetso e e oketsegileng, bona kgaolo 17 ya buka ya Totatota Baebele e Ruta Eng? e e gatisitsweng ke Basupi ba ga Jehofa.