Fetela kwa tshedimosetsong

Fetela go diteng

Bogosi Jwa Modimo ke Eng?

Bogosi Jwa Modimo ke Eng?

 Ithute mo Lefokong la Modimo

Bogosi Jwa Modimo ke Eng?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba ka itumelela go tlotla ka dikarabo tseno le wena.

1. Bogosi jwa Modimo ke eng?

Bogosi jwa Modimo ke puso e e busang e le kwa legodimong. Bo tla emisetsa dipuso tsotlhe tse dingwe mme bo tla dira gore thato ya Modimo e dirwe kwa legodimong le mo lefatsheng. Ka jalo, Bogosi jwa Modimo e tla bo e le yone puso e e molemo e re e tlhokang.—Bala Daniele 2:44; Mathaio 6:9, 10.

Bogosi bo tshwanetse go nna le kgosi. Jehofa o tlhomile Morwawe e bong Jesu gore a nne Kgosi ya Bogosi jwa Gagwe.—Bala Luke 1:30-33.

2. Ke ka ntlha yang fa Jesu e le Mmusi yo o tshwanelang?

Morwa Modimo ke Kgosi e e tshwanelang ka gonne o pelonomi, o emela se se siameng e bile o na le maatla a a lekaneng go thusa batho. (Mathaio 11:28-30) Fa Jesu a sena go tsosiwa o ne a tlhatlogela kwa legodimong mme a simolola go leta kafa seatleng sa ga Jehofa sa moja. (Bahebera 10:12, 13) La bofelo Modimo o ne a mo naya maatla a go simolola go busa a le kwa legodimong.—Bala Daniele 7:13, 14.

3. Ke bomang ba ba tla busang le Jesu?

Setlhopha sa batho ba ba bidiwang “baitshepi” se tlhophiwa ke Modimo gore se buse le Jesu kwa legodimong. (Daniele 7:27) Batho ba ntlha ba ba neng ba tlhophiwa go nna baitshepi e ne e le baaposetoloi ba ba ikanyegang ba ga Jesu. Jehofa o ile a nna a tlhopha banna le basadi ba ba boitshepo go fitlha gompieno. Fela jaaka Jesu, ba tsosiwa ka mmele wa moya.—Bala Johane 14:1-3; 1 Bakorintha 15:42-45.

Ke batho ba le kae ba ba yang kwa legodimong? Jesu o ne a re ke “letsomanyane.” (Luke 12:32) Palo ya bone fa e feletse e tla nna 144 000 mme ba tla busa lefatshe ba na le Jesu.—Bala Tshenolo 5:9, 10; 14:1.

 4. Bogosi jwa Modimo bo simolotse leng go busa?

Jesu o ne a nna Kgosi ka 1914. * Nakwana fela morago ga moo, o ne a latlhela Satane le madimona a gagwe mo lefatsheng. (Tshenolo 12:7-10, 12) Fa e sale ka nako eo, mathata a batho a oketsegile fela thata. Dintwa, dithoromo tsa lefatshe, mauba, malwetse a leroborobo le go tlhoka molao ke karolo ya sesupo sa gore tsamaiso eno ya dilo e mo malatsing a yone a bofelo. (2 Timotheo 3:1-5) Batho botlhe ba ba batlang go solegelwa molemo ke Bogosi jwa Modimo ba tshwanetse go ithuta gore ba ka dirang go nna balatedi ba Kgosi, Jesu.—Bala Luke 21:7, 10, 11, 31, 34, 35.

5. Bogosi jwa Modimo bo dira eng?

Ka tiro e e dirwang mo lefatsheng lotlhe, Bogosi jwa Modimo bo setse bo thusa dimilionemilione tsa batho mo ditšhabeng tsotlhe go ithuta se Modimo a se batlang. (Mathaio 24:14) Fa bo fedisa tsamaiso eno e e boikepo ya dilo mo lefatsheng bo tla sireletsa “boidiidi jo bogolo” jwa batho ba ba ikanyegang ba ba tla busiwang ke Jesu.—Bala Tshenolo 7:9, 10, 13-17.

Mo lobakeng lwa dingwaga di le 1 000, Bogosi bo tla dira lefatshe paradaise kgato ka kgato. Kwa bofelong, Jesu o tla busetsa Bogosi kwa go Rraagwe. (1 Bakorintha 15:24-26) A go na le mongwe yo o mo itseng yo o ka ratang go mmolelela ka Bogosi jwa Modimo?—Bala Pesalema 37:10, 11, 29.

Fa o batla tshedimosetso e e oketsegileng, bona kgaolo 8 le 9 ya buka ya Totatota Baebele e Ruta Eng? e e gatisitsweng ke Basupi ba ga Jehofa.

[Ntlha e e kwa tlase]

^ ser. 13 Fa o batla tshedimosetso malebana le kafa boporofeti jwa Baebele bo re bontshang ngwaga wa 1914 ka gone, bona tsebe 215-218 ya buka ya Totatota Baebele e Ruta Eng? e e gatisitsweng ke Basupi ba ga Jehofa.