Fetela kwa tshedimosetsong

Fetela go diteng

 Ruta Bana ba Gago

A o Kile wa Ikutlwa o Kgaphetswe Kwa Thoko?

A o Kile wa Ikutlwa o Kgaphetswe Kwa Thoko?

MOTHO yo o kgaphetsweng kwa thoko ke yo o sa amogelweng ke batho ba bangwe mo setlhopheng sa bone. E ka tswa e le wa mmala kgotsa wa lotso lo sele kgotsa a bua kana a dira dilo ka tsela e e sa tshwaneng le ya bone. A o a tle o ikutlwe o kgaphetswe kwa thoko? *

A re tlotle ka monna mongwe yo o kileng a ikutlwa jalo. Leina la gagwe e ne e le Mefiboshethe. A re utlwe gore e ne e le mang le gore ke eng fa a ne a ikutlwa a kgaphetswe kwa thoko. Fa e le gore o a tle o ikutlwe jalo, o ka ithuta go le gontsi mo go Mefiboshethe.

Mefiboshethe e ne e le morwa Jonathane, tsala e kgolo ya ga Dafide. Pele Jonathane a swela kwa ntweng, o ne a raya Dafide a re: ‘O direle bongwanake molemo.’ Dafide o ne a nna kgosi. Dingwaga moragonyana o ne a gopola mafoko a ga Jonathane mme Mefiboshethe o ne a sa ntse a tshela. O ne a gobala botlhoko fa a ne a sa le monnye. O ne a palelwa ke go tsamaya sentle botshelo jotlhe jwa gagwe. A o kgona go lemoga gore ke eng fa a ne a ka ikutlwa a kgaphetswe kwa thoko?

Dafide o ne a batla go direla morwa wa ga Jonathane molemo. Ka jalo, Dafide o ne a rulaganya gore ntlo ya ga Mefiboshethe e nne gaufi le ya gagwe kwa Jerusalema le gore a je kwa tafoleng ya ga Dafide. Monna yo go tweng Siba le bomorwawe mmogo le batlhanka ba gagwe ba ne ba tla nna batlhanka ba ga Mefiboshethe. Ruri Dafide o ne a naya morwa Jonathane tlotlo! A o itse gore go ne ga direga eng morago ga moo?

Dafide o ne a nna le mathata mo lelapeng la gagwe. Abesalome, mongwe wa bomorwa Dafide, o ne a mo tsuologela mme a leka go itira kgosi.  Dafide o ne a tshwanelwa ke go sia gore a falotse botshelo jwa gagwe. Mefiboshethe o ne a batla go tsamaya le Dafide fa batho ba bangwe ba bantsi ba ne ba tsamaya le ene. Ditsala tseno tsa ga Dafide di ne di itse gore ke ene a neng a tshwanetse go nna kgosi. Le fa go ntse jalo, Mefiboshethe o ne a ka se kgone go tsamaya le bone ka gonne o ne a palelwa ke go tsamaya sentle.

Mme Siba o ne a bolelela Dafide gore Mefiboshethe o ne a setse ka gonne tota a batla go nna kgosi. Dafide o ne a dumela maaka ao! Ka jalo, o ne a naya Siba sotlhe se e leng sa ga Mefiboshethe. Go ise go ye kae, Dafide o ne a fenya ntwa e a neng a e lwa le Abesalome mme a boela kwa Jerusalema. Jaanong Dafide o ne a reetsa se Mefiboshethe a neng a re se diragetse. Dafide o ne a swetsa ka gore Mefiboshethe le Siba ba kgaogane tshimo ya ga Mefiboshethe. O akanya gore Mefiboshethe o ne a dirang?

Ga a ka a ngongorega a re tshwetso e Dafide a e dirileng ga e a siama. Mefiboshethe o ne a itse gore kgosi e ne e tlhoka kagiso gore e dire tiro ya yone sentle. Ka jalo, o ne a re Siba a tseye tshimo yotlhe. Selo se se botlhokwa mo go Mefiboshethe e ne e le gore motlhanka wa ga Jehofa e bong Dafide o boetse kwa Jerusalema e le kgosi.

Mefiboshethe o ne a boga fela thata. Gantsi o ne a ikutlwa a kgaphetswe kwa thoko. Le fa go ntse jalo, Jehofa o ne a mo rata le go mo tlhokomela. Re ka ithutang mo go seno?— Tota le fa re dira se se siameng, bangwe ba ka bua maaka ka rona. Jesu o ne a re: “Fa lefatshe le lo tlhoile, lo a itse gore le ntlhoile pele ga le tlhoa lona.” Batho ba ile ba bo ba bolaya Jesu! Re ka tlhomamisega gore fa re dira se se siameng, Modimo wa boammaaruri, Jehofa, o tla re rata—Morwawe e bong Jesu, le ene o tla re rata.

^ ser. 3 Fa o bala le ngwana, letshwao la thaladi le go gakolola gore o eme mme o mo kgothaletse go ntsha maikutlo a gagwe.