Fetela kwa tshedimosetsong

Fetela go diteng

O re Neile Kgololesego ya go Itlhophela

O re Neile Kgololesego ya go Itlhophela

 Atamalana le Modimo

O re Neile Kgololesego ya go Itlhophela

2 DIKGOSI 18:1-7

BATSADI ba tshwanetse go tlhomela bana ba bone sekao se se molemo. Fa batsadi ba na le tlhotlheletso e e molemo mo ngwaneng, seo se ka thusa ngwana gore a nne le dinonofo tse di rategang le gore a dire ditshwetso tse di molemo mo botshelong. Ka maswabi, batsadi ba le bantsi ba tlhomela bana ba bone sekao se se sa siamang. A seno se raya gore bana bano ga ba ne ba atlega mo botshelong? Re bona karabo mo ntlheng e e kgothatsang thata e e boammaaruri—Jehofa Modimo o neile mongwe le mongwe wa rona mpho ya go itlhophela. Akanya ka kgang ya ga Hesekia, e e fitlhelwang mo go 2 Dikgosi 18:1-7.

Hesekia e ne e le “morwa Ahase kgosi ya Juda.” (Temana 1) Ahase o ne a faposa babusiwa ba gagwe mo kobamelong ya ga Jehofa e e itshekileng. Kgosi eno e e boikepo e ne e obamela Baale, e dira le meetlo ya go ntsha batho ditlhabelo. O ne a dira gore go bolawe mongwe wa bomorwarraagwe Hesekia, gongwe le ba bangwe. Ahase o ne a dira gore dikgoro tsa tempele di tswalwe mme “a itirela dibeso kwa sekhutlong sengwe le sengwe mo Jerusalema.” O ne ‘a kgopisa Jehofa.’ (2 Ditiragalo 28:3, 24, 25) Go bonala sentle gore rraagwe Hesekia o ne a le bosula tota. A mme Hesekia o ne a ka kgona go tila diphoso tse rraagwe a ileng a di dira?

Fa Hesekia a sena go tlhatlhama Ahase mo bogosing, o ne a bontsha gore o ne a ka se letle sekao sa ga rraagwe se se sa siamang se mo tlhotlheletsa. Hesekia o ne a “tswelela go dira se se siameng mo matlhong a ga Jehofa.” (Temana 3) Hesekia o ne a ikanya Jehofa, mme “ga itshupa go se na ope yo o tshwanang le ene mo dikgosing tsotlhe tsa Juda.” (Temana 5) Mo ngwageng wa ntlha wa puso ya gagwe, kgosi eno ya lekawana e ne ya simolola letsholo la kobamelo ya boammaaruri le le neng la felela ka gore go tlosiwe mafelo a a kwa godimo, kwa go neng go obamelwa medingwana ya boheitane teng. Tempele e ne ya bulwa sesha mme ga tsosolosiwa kobamelo e e itshekileng. (Temana 4; 2 Ditiragalo 29:1-3, 27-31) Hesekia “a nna a ngaparela Jehofa . . . , mme Jehofa a itshupa a na le ene.”—Temana 6, 7.

Ke eng se se neng sa dira gore Hesekia a kgone go tshela a sa tlhotlhelediwe ke sekao sa ga rraagwe se se sa siamang? Ga re itse go le kalo ka mmaagwe Hesekia yo leina la gagwe e neng e le Abija. A mme go ka direga gore mmaagwe Hesekia o ne a nna le tlhotlheletso e e molemo mo go morwawe? A sekao se se molemo sa ga Isaia, yo o neng a simolola go porofeta pele Hesekia a tsholwa, se ne sa tlhotlheletsa kgosana eno? * Baebele ga e re bolelele. Go sa kgathalesege gore o thusitswe ke eng, re ka tlhomamisega ka seno: Hesekia o ne a tlhopha go tshela ka tsela e e neng e farologane gotlhelele le ya ga rraagwe.

Sekai sa ga Hesekia se ka kgothatsa mongwe le mongwe fela yo o ka tswang a ile a godisiwa ke batsadi ba ba neng ba sa mo tlhomele sekao se se siameng. Ga go sepe se re ka se dirang ka dilo tsa nako e e fetileng; re ka se kgone go fetola dilo tse di botlhoko tse di re diragaletseng. Mme ditiragalo tse di ntseng jalo ga di reye gore re ka se atlege. Ditshwetso tse re di dirang gone jaanong di ka dira gore re nne le isagwe e e itumedisang. Fela jaaka Hesekia, re ka tlhopha go rata le go obamela Modimo wa boammaaruri e bong Jehofa. Go dira jalo go ka re naya botshelo jo bo kgotsofatsang gone jaanong mme go ka felela ka gore re bone botshelo jo bo sa khutleng mo lefatsheng le lesha la Modimo. (2 Petere 3:13; Tshenolo 21:3, 4) Ruri re tshwanetse go leboga Modimo yo o lorato ka go bo a neile mongwe le mongwe wa rona mpho e e tlhwatlhwakgolo—kgololesego ya go itlhophela!

[Ntlha e e kwa tlase]

^ ser. 4 Isaia o ne a simolola go porofeta mo e ka nnang ka 778 B.C.E. go fitlha nako nngwe morago ga 732 B.C.E. Hesekia o ne a simolola go busa ka 745 B.C.E. a na le dingwaga di le 25.