Fetela kwa tshedimosetsong

Fetela go diteng

 Babadi ba a Botsa . . .

A Batho Botlhe Ba na Le Tshono ya go Itse Modimo?

A Batho Botlhe Ba na Le Tshono ya go Itse Modimo?

Fa Jesu a ne a bodiwa gore taelo e kgolo thata ke efe, o ne a re: “O rate Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.” (Mathaio 22:37) Le fa go ntse jalo, pele batho ba ka rata Modimo, ba tshwanetse go nna le kitso e e boammaaruri kaga gagwe. (Johane 17:3) A batho botlhe ba na le tshono ya go nna le kitso eno?

Baebele ke yone buka ya konokono e e nang le kitso ya Modimo. (2 Timotheo 3:16) Batho ba le bantsi ba nna mo mafelong a go nang le Baebele mo go one. Bone batho bao ba ka tswa ba lalediwa nako le nako gore ba ithute Baebele e le gore ba nne le kitso e e boammaaruri ya Modimo. (Mathaio 28:19) Bangwe ba bone ba godisitswe ke batsadi ba ba lorato ba Bakeresete, ba ba ba rutang ka Modimo letsatsi lengwe le lengwe.—Duteronome 6:6, 7; Baefeso 6:4.

Le fa go ntse jalo, batho ba bangwe ba tshela mo maemong a a sa itumediseng. Ba bangwe ba tswa mo malapeng a a tletseng tshotlo, a mo go one batsadi ba bone ba sa ba bontsheng lorato lwa tlholego. (2 Timotheo 3:1-5) Go ka nna boima mo bathong ba ba goletseng mo maemong ao gore ba lebe Modimo e le Rre yo o lorato yo o kwa legodimong. Ba le bantsi ga ba a tsena sekolo, e leng se se dirang gore ba se ka ba kgona go bala Baebele. Le fa go ntse jalo, megopolo ya ba bangwe e foufaditswe ke dithuto tsa bodumedi jwa maaka kgotsa ba nna mo malapeng, mo setšhabeng kgotsa mo dinageng tse mo go tsone ba sa letlelelwang go rutiwa dithuto tse di boammaaruri tsa Baebele. (2 Bakorintha 4:4) A maemo a batho bao a dira gore ba se ka ba nna le tshono ya go ithuta ka Modimo le go mo rata?

Jesu o ne a dumela gore mathata a batho bangwe ba lebanang le one a tla dira gore go nne boima gore ba rate Modimo le go mo ikobela. (Mathaio 19:23, 24) Le fa go ntse jalo, Jesu o ne a gakolola barutwa ba gagwe gore le fa mathata mangwe a lebega a le magolo mo bathong, “mo Modimong dilo tsotlhe di a kgonega.”—Mathaio 19:25, 26.

Ela tlhoko dintlha tse di latelang: Jehofa Modimo o tlhomamisitse gore Lefoko la gagwe e leng Baebele ke buka e e anamisiwang thata go gaisa dibuka tsotlhe. Baebele e ne ya bolelela pele gore dikgang tse di molemo tsa Modimo le boikaelelo jwa gagwe ka lefatshe di tla rerwa mo “lefatsheng lotlhe le le nang le banni.” (Mathaio 24:14) Gompieno, Basupi ba ga Jehofa ba rera dikgang tse di molemo mo dinageng di feta 230 e bile ba gatisa dibuka tse di theilweng mo Baebeleng ka dipuo di ka nna 500. Tota le batho ba ba se nang Baebele ba sa ntse ba ka kgona go ithuta go le gontsi ka Modimo wa boammaaruri ka go ela tlhoko dilo tse a di dirileng.—Baroma 1:20.

Mo godimo ga moo, Lefoko la Modimo la re: “Jehofa o hukutsa dipelo tsotlhe, e bile o lemoga tshekamelo nngwe le nngwe ya dikakanyo. Fa o mmatla, o tla dira gore o mmone.” (1 Ditiragalo 28:9) Ka jalo le fa Jehofa a sa solofetse gore batho botlhe ba tla nna le tshono e e tshwanang, o tlhomamisa gore batho ba ba dipelo di ikanyegang ba tla newa tshono eo. E bile o tla tlhomamisa gore batho ba ba iseng ba tsamaye ba nne le tshono ya go ithuta kaga gagwe ba nne le tshono eo ka gore ba tsosediwe mo lefatsheng le lesha le le siameng.—Ditiro 24:15.