Fetela kwa tshedimosetsong

Fetela go diteng

Barongwa ba Romelwa Go ya Go “Dira Barutwa”

Barongwa ba Romelwa Go ya Go “Dira Barutwa”

 Kalogo ya Bo128 ya Gileade

Barongwa ba Romelwa Go ya Go “Dira Barutwa”

“E LE gore batho ba ditšhaba tsotlhe ba utlwe dikgang tse di molemo, Bakeresete bangwe ba ne ba tshwanetse go ithaopela go tlogela ba malapa a bone le magae a bone go ya go rera dikgang tse di molemo kwa dinageng di sele.” David Splane yo e leng leloko la Setlhopha se se Laolang sa Basupi ba ga Jehofa, o ne a simolola tiragalo eno e e itumedisang le e e agang semoyeng ka mafoko ao.

Ka March 13, 2010, mo e batlang e le batho ba le 8 000, ba ne ba kopane mmogo mo kalogong ya bo128 ya Sekolo sa Baebele sa Watchtower sa Gileade. Ditsala, maloko a malapa le baeng ba ba tswang mo dinageng di le 27 tse di farologaneng ba ne ba le gone mo thulaganyong eno.

“Barutwa Ga ba A ka Ba Nna Fela Kwa Lapeng”

Modulasetulo, e bong Mokaulengwe Splane o ne a simolola thulaganyo ka go tlhalosa taelo eno ya ga Jesu: “Jalo tsamayang mme lo dire batho ba ditšhaba tsotlhe barutwa.” (Mathaio 28:19, 20) O ne a gatelela gore Jesu o ne a romela barutwa ba gagwe kwa bathong. Ke boammaaruri gore ka Pentekosete ya 33 C.E., batho ba ba neng ba tswa kwa Mesopotamia, Afrika Bokone le kwa dikarolong di le dintsi tsa Mmusomogolo wa Roma ba ne ba ya kwa Jerusalema mme ba utlwa dikgang tse di molemo. Sebui se ne sa re le fa go ntse jalo, “barutwa ga ba a ka ba nna fela kwa lapeng mme ba letela gore batho ba ba tswang mo ditšhabeng tsotlhe ba tle kwa go bone. Ba ne ba tshwanetse go ya kwa karolong e e kwa kgakalakgakala ya lefatshe gore ba fitlhele batho.”—Ditiro 1:8.

Mokaulengwe Splane o ne a re: “Jesu ga a ka a bolelela barutwa ba gagwe fela gore ba dire eng. O ne a ba ruta kafa ba ka dirang seo ka gone. Ga a ka a ba bolelela fela gore ba rapele; o ne a ba ruta gore ba rapele jang. Ga a ka a ba bolelela fela gore ba rere; o ne a ba bontsha gore ba rere jang. Ga a ka a ba bolelela fela gore ba nne barutisi ba ba molemo; o ne a ba bontsha mekgwa e e molemo le e e nang le matswela ya go ruta.”

Fa modulasetulo a ne a bua le batsadi ba baalogi o ne a nopola mafoko ano a Jesu a neng a a tlhomamisetsa barutwa ba gagwe: “Bonang! Ke na le lona malatsi otlhe go fitlha bokhutlong jwa tsamaiso eno ya dilo.” (Mathaio 28:20) Mokaulengwe Splane o ne a tlhomamisetsa bareetsi gore Jesu o ne a tla tswelela a tlhokomela baithuti kwa dikabelong tsa bone kwa dinageng di sele.

“Gatelang Pele Mme lo Ipelafatse”

Anthony Morris yo e leng leloko la Setlhopha se se Laolang o ne a kgothaletsa baithuti gore ba ‘gatele pele mme ba ipelafatse.’ O ne a re go na le go ipelafatsa ka tsela e e siameng le e e sa siamang. Go ipelafatsa ka tsela e e sa siamang go akaretsa go ikgalaletsa. Go ipelafatsa ka tsela e e siameng go tlhalosiwa jaana mo go 1 Bakorintha 1:31: “Yo o ipelafatsang, a a ipelafatse mo go Jehofa.” Mokaulengwe Morris o ne a re: “Ke sengwe se motho a ka ipelafatsang ka sone—go nna le temogo le kitso ka Jehofa Modimo. Tota e bile, tshiamelo e kgolo e nna le wena re nang le yone—ke go bidiwa ka leina le le boitshepo, go nna mongwe wa Basupi ba ga Jehofa.”—Jeremia 9:24.

Sebui se ne sa gatelela botlhokwa jwa go itsise leina la ga Jehofa ka go ba bolelela maitemogelo a morongwa mongwe wa kwa Afrika. Morongwa yono le mosadi wa gagwe ba ne ba le mo loetong go ya go neela puo e e theilweng mo Baebeleng. Fa ba goroga mo lefelong le dikoloi di phuruphudiwang mo go lone, lekawana lengwe la lesole le ne la supa mokaulengwe ka tlhobolo le bo le mmotsa gore ke ene mang. Mosadi wa gagwe yo o neng a sa ntse a gopola thapiso e ba neng ba e neilwe kwa Gileade, o ne a mo sebela jaana, “Mmolelele gore o mongwe wa Basupi ba ga Jehofa le gore o ya go neela puo e e theilweng mo Baebeleng.” O ne a dira jalo, mme lesole la ba letla gore ba fete. Mo letsatsing le le latelang, banyalani bano ba ne  ba utlwa mo radiong gore poresidente o ne a boleletse masole gore a batle babolai ba ba neng ba ipitsa barongwa! Go na le gore ba ikitsise e le barongwa ba ne ba re ke Basupi ba ga Jehofa mme seo se ne sa boloka botshelo jwa bone. Mokaulengwe Morris o ne a konela puo ya gagwe ka go re: “Fa lo goroga kwa dikabelong tsa lona, lo tsweleleng pele mme lo ipelafatse. Ipelafatseng ka sotlhe se Jehofa a tla se fitlhelelang fa a ntse a lo dirisa gore a galalediwe ka bosakhutleng.”

“A lo Tla Diragatsa Kabelo ya Lona?”

Geoffrey Jackson yo e leng leloko la Setlhopha se se Laolang e bile e ne e le morongwa, o ne a thusa baithuti ba baalogi go sekaseka potso e e fa godimo. O ne a botsa jaana, “Go kaya eng fa re re motho ke morongwa?” O ne a tlhalosa gore lefoko “morongwa” le tswa mo lefokong la Selatine le le kayang motho kgotsa setlhopha sa batho se se amogetseng kabelo e e kgethegileng. Re le Basupi ba ga Jehofa, tiro ya rona ke go rera dikgang tse di molemo le go thusa batho ba bangwe go itse Jehofa. Fa re dira tiro eno re etsa Jesu Keresete yo ka metlha a neng a nna a akantse ka yone fa a ne a le mo lefatsheng. Jesu o ne a bolelela Mmusi wa Moroma e bong Ponto Pilato a re: “Ke tletse sone seo mo lefatsheng, gore ke supe ka ga boammaaruri.”—Johane 18:37.

Sebui se ne sa thusa baithuti go akanya ka pego e e mo Baebeleng e e ka ga ntwa ya kwa Jeriko. Batlhabani ba Baiseraele ba ne ba tsoga phakela ka malatsi a le marataro, ba apara diaparo tsa tlhabano ba bo ba gwanta go dikologa Jeriko, go tswa foo ba bo ba boela morago. Sebui se ne sa re: “Batho ba ne ba ka leba tiro eno e le go tlhoka tlhaloganyo e bile e sa tlwaelega.” O ne a re masole mangwe a ka tswa a ile a akanya jaana, ‘Ruri ke tshenyo ya nako.’ Le fa go ntse jalo, ka letsatsi la bosupa Baiseraele ba ne ba laelwa go dikologa motse ka makgetlo a le supa mme morago ga moo, ba ne ba tshwanetse go tlhaba mokgosi o mogolo wa ntwa. Seo sa felela ka eng? Dipota tsa Jeriko di ne tsa gosomana!—Joshua 6:13-15, 20.

Mokaulengwe Jackson o ne a tlotla ka dintlha di le nnè tse re ka ithutang tsone mo pegong ya motse wa Jeriko. (1) Go botlhokwa go nna kutlo. Re tshwanetse go dira dilo ka tsela ya ga Jehofa, e seng go akanya gore go di dira ka tsela ya rona go botoka. (2) Go botlhokwa go nna le tumelo mo go Jehofa le go mo ikanya. “Ka tumelo dipota tsa Jeriko di ne tsa wela fa fatshe,” mme e se ka go bo di digilwe ke batho. (Bahebera 11:30) (3) Re tshwanetse go nna pelotelele. Fa nako e ntse e tsamaya, masego a ga Jehofa a tla “go tlela.” (Duteronome 28:2) (4) O se ka wa latlhela seditse. O se ka wa lebala kabelo ya gago. Mokaulengwe Jackson o ne a sobokanya dintlha tse a tlotlileng ka tsone ka gore, “Fa lo akanya ka dintlha tseno, lo tla dira kabelo ya lona go baka le go galaletsa Jehofa.”

Dintlha Tse Dingwe Tsa Thulaganyo

“Rata Baebele le Mokwadi wa Yone.” Seno ke setlhogo sa puo e e neng ya neelwa ke Maxwell Lloyd yo e leng leloko la Komiti ya Lekala la United States. O ne a raya baithuti a re: “Baebele e tshwanetse go nna buka ya mmatota mo go lona.” Go tswa foo, o ne a ba kgothatsa jaana: Lo se ka lwa letla gore lorato lo lo ratang Jehofa Modimo ka lone lo tsidifale. Lo se ka lwa lebelela gore mongwe le mongwe o tla tlhaloganya se lo se rutang. Ithuteng go dira gore dithuto tsa Baebele di tlhaloganyesege motlhofo gore tshedimosetso eo e fitlhelele dipelo tsa baithuti. Ikokobetseng. Lo se ka lwa dira e kete lo na le kitso e e gaisang ya batho ba bangwe. Rutang ka go tlhoma sekao. Batho ba lo ba rutang ba tshwanetse go lemoga gore lo rata Baebele thata.

“Elang Tlhoko Sentle Magakabe.” Michael Burnett yo e leng morutisi wa baithuti e bile e kile ya bo e le morongwa o ne a neela puo ya setlhogo se se fa godimo. O ne a re ka dinako tse dingwe re tla tlhobaela. Le fa go ntse jalo, gakologelwa kgakololo ya ga Jesu: “Elang tlhoko sentle gore magakabe ga a jale peo le fa e le go roba, . . . mme le fa go ntse jalo Modimo o a a fepa.” (Luke 12:24) Go ya ka kgolagano ya Molao, magakabe a ne a se phepa e bile a sa tshwanela go jewa. A ne a tsewa a ilega. (Lefitiko 11:13, 15) Le fa batho ba ka tswa ba a leba jang, Modimo o a a tlamela. Mokaulengwe Burnett o ne a re: “Ka jalo, fa lo tlhobaela thata mo isagweng, akanyang ka magakabe. Fa Modimo a tlhokomela nonyane e e seng phepa e bile e ilwa, ruri lo ka tlhomamisega gore o tla lo tlhokomela ka go bo lo le phepa mo matlhong a gagwe.”

“Ga ke Go Direle Phoso Epe.” Mark Noumair yo e leng morutisi yo mongwe wa sekolo sa  Gileade o ne a thusa batho ba ba neng ba le gone go sekaseka setshwantsho sa ga Jesu se se ka ga badiri mo tshimong ya mofine. Badiri bangwe ba ne ba bereka letsatsi lotlhe. Ba bangwe ba ne ba bereka ura e le nngwe fela. Le fa go ntse jalo, botlhe ba ne ba amogela tuelo e e tshwanang! Ba ba neng ba bereka lobaka lo loleele ba ne ba ngongorega. Mong wa tshimo ya mofine o ne a raya bangongoregi a re: “Ga ke go direle phoso epe. O dumalane le nna ka denario, ga ke re? Tsaya se e leng sa gago o tsamaye.” (Mathaio 20:13, 14) Re ithuta eng mo go seo? O se ka wa ipapisa le batho ba bangwe. Mokaulengwe Noumair o ne a re: “Go ipapisa le ba bangwe ka tsela e e sa siamang go tla dira gore lo se ka lwa itumela. Se se maswe le go feta go tla dira gore lo tlogele dikabelo tsa lona, lo tlogela tshiamelo e e tlhwatlhwakgolo ya tirelo.” Sebui se ne sa gopotsa baithuti gore Jesu o kaela thobo ya semoya mo motlheng wa rona e bile a ka direla balatedi ba gagwe dilo kafa a batlang ka gone. Fa Jehofa le Jesu ba swetsa ka gore ba direle ba bangwe se se fetang se ba go direlang sone, ga ba go fosetse. Tlhoma mogopolo mo go se o se direlwang mme o se ka wa letla gore “tuelo” ya batho ba bangwe e dire gore o tlogele tiro e Jehofa a go neileng yone.

Maitemogelo le Dipotsolotso

Ka nako ya fa baithuti ba sekolo sa Gileade ba ne ba sa rutiwe kgotsa ba sa dire tiro ya sekolo morago ga tlelase, ba ne ba ya kwa diphuthegong tsa mo lefelong leo tsa Basupi ba ga Jehofa go ya go dira tiro ya go rera. Sam Roberson yo e leng mongwe wa barutisi ba sekolo sa Gileade, o ne a botsolotsa baithuti ka maitemogelo a ba nnileng le one fa ba le mo bodireding. Ka sekai, kgaitsadi Alessandra Kirchler o ne a kopana le mosadi mongwe yo o neng a tshwentswe thata ke gore morwawe o a goga. Moragonyana Alessandra o ne a mo etela gape a tshwere Tsogang! e e buang ka kgang eo. Go ne go se ope kwa lapeng, le fa go ntse jalo o ne a tlogela makasine oo. Kgabagare, Alessandra o ne a fitlhela mosadi yoo a bo a mo kopa gore a tsene. Mosadi yoo o ne a itumeletse setlhogo seo mme a re, “Gantsi ke tle ke ipotse gore Modimo o leka go nthuta eng ka mathata a a ntlisetsang one.” Alessandra o ne a mmontsha mo Baebeleng gore ga se Modimo a dirang gore re diragalelwe ke dilo tse di bosula. (Jakobe 1:13) Gone jaanong mosadi yono le morwawe ba itumelela go ithuta Baebele.

Melvin Jones wa Lephata la Tirelo o ne a botsolotsa bakaulengwe ba le bararo ba e kileng ya bo e le baalogi ba sekolo sa Gileade: Jon Sommerud yo o direlang kwa Albania; Mark Anderson, yo o direlang kwa Kenya; le James Hinderer yo o direlang mo Lephateng la Sekolo sa Puso ya Modimo. Botlhe ba ne ba dumalana ka gore sekolo sa Gileade ga se rute fela baithuti dithuto tsa motheo tsa Baebele mme gape se ba ruta go di dirisa, go sa kgathalesege gore baithuti bano ke bomang le gore ba direla kae.

Go tswa foo, mongwe wa baithuti o ne a bala lekwalo le ba le kwadileng le le amang maikutlo la go bontsha tebogo. John Barr, yo o nang le dingwaga di le 96 e bile e le ene yo mogolo ka dingwaga mo malokong a Setlhopha se se Laolang, o ne a konela thulaganyo ka thapelo le go kopa gore Jehofa a segofatse tiro ya baithuti ba setlhopha sa bo128 sa sekolo sa Gileade.

 [Tšhate/Mmapa mo go tsebe 31]

DIPALOPALO TSA SETLHOPHA

8 Palo ya dinaga tse ba tswang kwa go tsone

54 Palo ya baithuti

27 Palo ya banyalani

35.2 Palogare ya dingwaga tsa bone

19.1 Palogare ya dingwaga tsa bone ba kolobeditswe

13.8 Palogare ya bone ba le mo tirelong ya nako e e tletseng

[Mmapa]

(Go bona mokwalo o o feletseng, leba kgatiso)

Setlhopha se abetswe go ya kwa dinageng di le 25 tse di bontshitsweng fa tlase fano:

MAFELO A BA ABETSWENG KWA GO ONE

HONDURAS

GUATEMALA

NICARAGUA

DOMINICAN REPUBLIC

ARUBA

GUYANA

ECUADOR

BOLIVIA

PARAGUAY

LATVIA

ROMANIA

KOSOVO

SERBIA

ALBANIA

GUINEA

LIBERIA

CÔTE D’IVOIRE

GHANA

NAMIBIA

RWANDA

MADAGASCAR

MONGOLIA

TAIWAN

CAMBODIA

INDONESIA

(DIKABELO TSENO DI KAELWA KE LEKALA LA AUSTRALIA)

[Setshwantsho mo go tsebe 30]

Baithuti ba sekolo sa Gileade ba dira pontsho ya maitemogelo a ba nnileng le one fa ba rera

[Setshwantsho mo go tsebe 31]

Setlhopha sa bo128 sa Dialogane Tsa Sekolo sa Baebele sa Watchtower sa Gileade

Mo lenaaneng le le fa tlase, mela e balwa go tloga kwa pele go ya kwa morago, mme maina a tlhomagantswe go tloga kafa molemeng go ya kafa mojeng wa mola mongwe le mongwe.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.