Fetela kwa tshedimosetsong

Fetela go diteng

Mogatisi wa Bogologolo o Anamisa Baebele

Mogatisi wa Bogologolo o Anamisa Baebele

 Mogatisi wa Bogologolo o Anamisa Baebele

HISITORI ya dibuka tse di kwadilweng ka seatla le memeno e simologile dingwaga di le diketekete tse di fetileng. Le fa go ntse jalo, dibuka tse di gatisitsweng ga se tsa bogologolo thata. Dibuka tsa ntlha tse di itsegeng tse di gatisitsweng di ne di dirilwe kwa China ka 868 C.E., go dirisiwa magong a a gabilweng go gatisa. Mo e ka nnang ka 1455 kwa Jeremane, Johannes Gutenberg o ne a dira motšhine wa go gatisa wa tshipi le go gatisa Baebele ya ntlha ka Selatine.

 Le fa go ntse jalo, dingwaga di se kae moragonyana, fa madirelo a go gatisa a sena go tlhomiwa, go anamisiwa ga Dibaebele le dibuka tse dingwe e ne ya nna selo se se tlwaelegileng. Nuremberg e ne ya nna lefelo la konokono la bodirelo jwa go gatisa kwa Jeremane mme moagi wa mo lefelong leo e bong Anton Koberger a ka tswa a nnile mongwe wa bagatisi ba ntlha ba Baebele mo lefatsheng lotlhe ba ba ileng ba nna le seabe se segolo mo tirong eno.

Batho ba ditso tsotlhe ba tshwanetse go leboga bagatisi bano ba bogologolo, go akaretsa le Anton Koberger. Ka jalo, a re sekasekeng se Koberger a ileng a se dira.

“Go Tlhokomelwa ga Buka e le Nngwe—Baebele”

Koberger o ne a bula bogatisetso jwa ntlha kwa Nuremberg ka 1470. Bogatisetso jono bo ne bo dirisa metšhine e le 24 ka nako e le nngwe, bo na le badiri ba le 100, batho ba ba ithutetseng ditiro dingwe le badiri ba bangwe kwa Basel, Strasbourg, Lyon le kwa ditoropong tse dingwe tsa kwa Yuropa. Koberger o ne a gatisa dibuka tsa Selatine le dikgatiso tse dingwe tse dintsi tsa saense tsa motlha oo. Ka nako ya fa a ntse a dira tiro eno ya gagwe, o ne a gatisa dibuka le Dibaebele di le 236 tse di farologaneng. Tse dingwe di ne di na le ditsebe di le dintsi, nngwe le nngwe ya tsone e ne e gatisiwa ka motšhine wa seatla.

Metšhine ya ga Koberger e ne e dirisa ditlhaka tsa maemo a a kwa godimo thata mme seo se ne sa dira gore dibuka tsa gagwe di itsege thata ka gonne di ne di le dintle e bile go le motlhofo go di bala. Mokwalahisitori mongwe e bong Alfred Börckel o ne a kwala jaana: “Ka metlha Koberger o ne a tlhomamisa gore ditlhaka tse a di dirisang go gatisa ke tse disha. O ne a sa letlelele gore go dirisiwe tse di onetseng.” Mo godimo ga moo, dibuka le Dibaebele tse dintsi tsa ga Koberger di ne di na le ditshwantsho, mme ditshwantsho tseo di ne di dirilwe mo logonnyeng lo lo gabilweng.

Mokwadi yo o ileng a kwala ka Koberger e bong Oscar Hase o ne a kwala gore go tswa kwa tshimologong go ya kwa bokhutlong jwa tiro ya ga Koberger, “go tlhokomelwa ga buka e le nngwe—Baebele—go ne go bonala mo tirong yotlhe ya gagwe.” Koberger le badirikaene ba ne ba dira ka natla go batla mekwalo ya Baebele e e neng e le gone e e boammaaruri. Tiro eno e tshwanetse ya bo e ne e se motlhofo, e re ka mekwalo e mentsi ya seatla e e kwaletsweng mo letlalong e ne e le matlotlo a a botlhokwa thata a a neng a beilwe kwa mafelong mangwe a baitlami, batho ba ne ba e adimiwa fela ka nako e khutshwane—fa e le gore ba ne ba letlelelwa go e adima—gore ba e kwalolole.

Dibaebele Tsa Selatine le Sejeremane

Koberger o ne a gatisa dithanolo tse di sa tshwaneng di le 15 tsa Biblia Latina (Baebele ya Selatine), thanolo ya ntlha e ne ya nna gone ka 1475. Dithanolo tse dingwe di ne di na le ditshwantsho tsa araka ya ga Noa, Melao e e Lesome le tempele ya ga Solomone. Ka 1483, Koberger o ne a gatisa dikhopi tsa Biblia Germanica (Baebele ya Sejeremane) di ka nna 1 500—e e neng e le palo e e kwa godimo ka nako eo. Baebele eno e ne e na le ditshwantsho tse di fetang 100 tse di neng di dirilwe mo logonnyeng lo lo gabilweng go dira gore babadi ba kgatlhegele molaetsa, go tlhalosa se se kwadilweng le go gopotsa batho ba ba sa kgoneng go bala ka dipolelo tse ba di itseng tsa Baebele. Moragonyana ditshwantsho tse di mo Baebeleng eno di ne tsa nna le tlhotlheletso e kgolo mo bagatising ba Baebele, segolobogolo bagatisi ba Baebele ya Sejeremane.

Baebele ya ga Koberger ya Sejeremane ya 1483 e ne ya itsege thata mme e ne ya nna yone fela thanolo ya bofelo ya Sejeremane e Koberger a neng a tla e gatisa. Le fa barulaganyi ba dikgatiso tsa gagwe ba ile ba fetola tsela ya go baya mafoko ka kelotlhoko gore a dumalane le Vulgate ya Selatine e e amogetsweng ke kereke, o ne a theile thanolo ya gagwe mo thanolong ya Se-Waldensia ya lekgolo la bo14 la dingwaga e e neng e thibetswe. * Ngwaga o o latelang, Mopapa Innocent VIII o ne a ya go senya setšhaba sa Ba-Waldensia. Morago ga moo, dithibelo tse kereke e neng e di beile di ne tsa tswelela di oketsega kgatlhanong le Dibaebele tsa dipuo tse di tlwaelegileng. Ka March 22, 1485, Bishopomogolo e bong Berthold wa kwa toropong ya Mainz, kwa Jeremane, o ne a ntsha molao wa gore go se ka ga ranolwa Baebele ka Sejeremane. Mo ngwageng o o latelang ka January 4, Berthold o ne a ntšhafatsa molao oo. Ka ntlha ya thibelo eno, Koberger ga a ka a tlhola a leka go gatisa Baebele ka Sejeremane.

Le fa go ntse jalo, matsapa a ga Anton Koberger ga a ka a nna a lefela. O ne a di goga kwa pele ka go dirisa mokgwa o mosha wa go gatisa go dira dibuka tse di farologaneng gore batho ba kgone go di reka ka tlhwatlhwa e e kwa tlase le gore di nne gone kwa Yuropa. Ka jalo tiro ya ga Koberger e ne ya thusa gore batho ba maemo a a kwa tlase ba nne le Baebele.

[Ntlha e e kwa tlase]

^ ser. 11 Bona setlhogo se se reng “Ba-waldo Ba Tlogela Bokgelogi ba Nna Baporotesetanta,” mo makasineng wa Tora ya Tebelo wa March 15, 2002.

[Ditshwantsho mo go tsebe 26]

Go tswa kwa molemeng go ya kwa mojeng: Logong lo lo gabilweng lo lo nang le setshwantsho sa ga Daniele a le mo mongobong wa ditau; Tlhaka ya ntlha e kgolo ya letlhare la gouta; Ditlhaka tse di bonalang sentle

[Setshwantsho mo go tsebe 26]

Koberger

[Ditshwantsho mo go tsebe 26]

Mekwalo ya dibaebele tsa ga Koberger tsa seLatine le seJeremane, tse di bontshang mekgabisa le dikakgelo tse di kaga Genesise 1:1

[Metswedi ya Ditshwantsho mo go tsebe 26]

All Bible photos: Courtesy American Bible Society Library; Koberger: Mit freundlicher Genehmigung der Linotype GmbH