Fetela kwa tshedimosetsong

 Ruta Bana ba Gago

Jeremia Ga a Ka a Latlhela Seditse

Jeremia Ga a Ka a Latlhela Seditse

A O A tle o ikutlwe o kgobegile marapo e bile o batla go latlhela seditse?— * Ba le bantsi ba ikutlwa jalo. Jeremia yo mmotlana le ene o ne a ikutlwa jalo. Le fa go ntse jalo, o ne a sa letle gore dilo tse batho ba bangwe ba di buang kgotsa ba di dirang di dire gore a ineele. A re tlotleng kafa Jeremia a neng a le botlhokwa ka gone mo Modimong, le fa gone a ne a ikutlwa e kete o batla go ineela.

Pele Jeremia a tsholwa, Modimo wa boammaaruri e bong Jehofa o ne a mo tlhopha go nna moporofeti gore a tlhagise batho gore ba ne ba sa itumedise Modimo. A o a itse gore Jeremia o ne a raya Jehofa a reng dingwaga moragonyana?— “Ga ke itse go bua, gonne ke mosimanyana fela.”

O akanya gore Jehofa o ne a araba Jeremia jang?— Ka bopelonomi le ka tsela e e tlhomameng, Modimo o ne a re: “O se ka wa re, ‘Ke mosimanyana fela.’ Mme o ye kwa go botlhe ba ke tla go romang kwa go bone; mme o bue sengwe le sengwe se ke tla se go laelang. O se ka wa boifa.” Ka ntlha yang? Jehofa o ne a re: “Ke na le wena go go golola.”—Jeremia 1:4-8.

Le fa go ntse jalo, jaaka go umakilwe fa godimo, moragonyana Jeremia o ne a kgobega marapo. Seno ke ka gonne o ne a sotliwa ka go bo a direla Modimo. O ne a re: ‘Mongwe le mongwe o tshega ka nna letsatsi lotlhe e bile o a ntshotla.’ Ka jalo o ne a swetsa ka gore a latlhele seditse. O ne a re: “Ga ke na go mo umaka [Jehofa], e bile ga ke na go tlhola ke bua mo leineng la gagwe.” A mme tota o ne a latlhela seditse?

Jeremia o ne a re: ‘Mo pelong ya me lefoko la ga Jehofa le ne le ntse jaaka molelo o o tukang o tswaletswe mo marapong a me, ke ne ka lapa go o tshola.’ (Jeremia 20:7-9) Le fa ka dinako tse dingwe Jeremia a ne a boifa, lorato lo a neng a rata Jehofa ka lone lo ne lwa dira gore a se ka a tlogela go bua ka ene. A re bone kafa Jeremia a neng a sirelediwa ka gone ka gonne a sa ka a latlhela seditse.

Jehofa o ne a raya Jeremia a re a tlhagise batho gore Jerusalema e tlile go senngwa fa ba ne ba sa fetole ditsela tsa bone tse di bosula. Fa Jeremia a ba tlhagisa, ba ne ba galefa mme ba re: “Monna yo o tshwanelwa ke katlholo ya loso.” Le  fa go ntse jalo, Jeremia o ne a ba kopa gore ba ‘utlwe lentswe la ga Jehofa.’ Morago ga moo o ne a re: ‘Lo tshwanetse go itse gore fa lo mpolaya, lo bolaya motho yo o se nang molato, ka go bo Modimo o nthomile gore ke bue le lona.’ A o itse gore go ne ga diragala eng morago ga moo?—

Baebele ya re: “Dikgosana le batho botlhe ba raya baperesiti le baporofeti ba re: ‘Monna yo ga a tshwanelwe ke katlholo epe ya loso, gonne o buile le rona mo leineng la ga Jehofa Modimo wa rona.’” Ka jalo, Jehofa o ne a sireletsa Jeremia gonne a sa letla poifo gore e dire gore a latlhele seditse. A re bone gore go ne ga diragala eng ka Urija, moporofeti yo mongwe wa ga Jehofa, yo o neng a dira dilo ka tsela e e farologaneng.

Baebele ya re: ‘Urija o ne a nna a porofeta kgatlhanong le Jerusalema a bua mafoko a Jeremia a neng a a bua.’ A o itse gore Urija o ne a dira eng fa Kgosi Jehoiakime a ne a mo galefela?— O ne a boifa, a tlogela go dira thato ya Modimo mme a tshabela kwa Egepeto. Ka jalo, kgosi e ne ya romela banna go ya go mmatla le go tla le ene. A o itse gore kgosi e e bosula eno e ne ya dira eng fa ba sena go tla le ene?— E ne ya bolaya Urija ka tšhaka!—Jeremia 26:8-24.

O akanya gore ke eng fa Jehofa a ile a sireletsa Jeremia mme a sa ka a sireletsa Urija?— Le fa Jeremia a ka tswa a ne a boifa fela jaaka Urija, ga a ka a tlogela go direla Jehofa kgotsa a tshaba. Ga a ka a latlhela seditse. Re ka ithuta eng mo sekaong sa ga Jeremia?— Gore ka dinako dingwe re ka nna ra fitlhela go le thata go dira se Modimo a reng re se dire, mme ka dinako tsotlhe re tshwanetse go mo ikanya le go mo ikobela.

^ ser. 3 Fa o bala le bana, letshwao la thaladi le go gakolola gore o eme mme o ba botse potso.